اُتری وزیرستان دے شہر میران شاہ وچ پاکستانی فوج نے ہیلی کاپٹراں نال پمفلٹ سُٹے ہین جیہناں وچ لوکاں نوں دسیا گیا ہے پئی فوج اُتری وزیرستان وچ آپریشن نہیں کرے گی تے لوک فوج دا ساتھ دین۔
فوجی ہیلی کاپٹراں نال سٹے گئے ایس پمفلٹ وچ لکھیا ہویا ہے پئی فوج امن معاہدے دا پورا پورا پاس رکھے گی۔ کجھ لوک ایس معاہدے نوں توڑ نہیں چڑھن دینا چاہوندے۔ پمفلٹ وچ صاف لکھیا گیا ہے پئی کجھ ات وادی پاک فوج تے دھاڑے مار رہے ہین تے نال ایہہ کھپ پا رہے ہین پئی فوج آپریشن کرنا چاہوندی ہے۔
پمفلٹ وچ لکھیا گیا ہے پئی جس علاقے وچ فوج تے دھاڑا وجے گا اوتھے فوج نوں ات وادیاں دے خلاف کاروائی دا حق ہے تے ایس آپریشن دی ساری ذمے واری اوہناں لوکاں سر ہووے گی۔ اُنج فوج دا آپریشن کرن دا کوئی ارادہ نہیں ہے کیوں جو لوک پہلاں ای بڑا نقصان کروا چکے ہین۔ پمفلٹ وچ لوکاں نوں اپیل کیتی گئی ہے پئی اوہ امن نوں نقصان اپڑاؤن والیاں نوں ساہمنے لیاؤن تے اپنی دھرتی فوج تے حکومت دے خلاف نہ ورتن دیون۔
