پاکستان جعلی نوٹ چھاپ کے ہندوستان گھل رہیا ہے :منموہن سنگھ

ہندوستان اک پاسے پاکستان تے مذاکرات دیاں گلاں کر رہیا ہے تے دوجے پاسے اوہنوں دبا وچ رکھن لئی الزام لاون دا سلسلہ وی جاری ہے۔ ایہہ الزام کوئی ہور نہیں آپوں وزیر اعظم منموہن سنگھ کر رہے نیں جنہاں دا دعویٰ ہے پئی سرحد پار توں ہندوستان وچ ات واد کیتی جارہی ہے تے سگوں جعلی کرنسی نوٹ چھاپ کے ہندوستان اسمگل کیتے جارہے نیں۔

من موہن سنگھ نے ایہہ گل اج نویں دہلی وچ داخلی سلامتی بارے اجلاس نال خطاب کردیاں ہوئیاں کہی۔ اوہناں نے کہیا بھاویں دو ہزار اٹھ تے نو وچ جموں تے کشمیر وچ ات واد دیاں واپریاں گھٹیاں نیں پر دخل اندازی ودھی ہے۔ سرحد پار کم کرن والے ہندوستان مخالف لوک جموں کشمیر وچ ات واد کر رہے نیں۔ ایہدے توں اڈ سرحد پار توں جعلی کرنسی نوٹ تیار کر کے ہندوستان اسمگل کیتے جارہے نیں۔ ایہدے تے قابو پاون لئی ریاستاں تے مرکز وچکار پکے جتناں دی لوڑ ہے۔ منموہن سنگھ دا کہنا سی پئی کھبے پاسے دی انتہا پسند جماعتاں ملک دی وچلی سلامتی لئی سب توں وڈا خطرہ ہے۔