Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> پاک بھارت میچ۔۔۔ جنگ تے جواء

پاک بھارت میچ۔۔۔ جنگ تے جواء

روز وار لوکائی
February 16th, 2015

ایڈیلڈ وچ ہو رہے ورلڈ کپ کرکٹ اندر پاکستان76 دوڑاں توں بھارت ہتھوں ہار گیا۔ ایہہ مجموعی طور چھیویں وار ہاریا اے۔ میچ اندر کجھ کھڈاریاں دی کم کاری بہت مایوس کُن رہی جد کہ کجھ نے چنگی کمکار وی وکھائی۔ میچاں وچ انجے ہوندا اے کہ کجھ کھڈاری توقع دے مطابق کھیڈ نہیں کھیڈ سکدے جد کہ کجھ توقع دے خلاف بہت چنگا کھیڈ جاندے نیں۔ ایسے میچ نال جڑی اک خبر مطابق ایس پاک بھارت میچ وچ پورے دیس اندر ارباں روپے جوئے وچ اُڈا دتے گئے۔ سکریناں لا کے مارکیٹاں، پلازیاں دیاں چھتاں، ہوٹلاں تے ڈھابیاں اُتے جواری متحرک رہے، سگوں اسلام آباد تے راولپنڈی ایس کم وچ وی ’’ملکی راجدھانی‘‘ ای ثابت ہوئے۔
پاک بھارت کرکٹ میچ ہو رہیا ہووے تاں پاکستان دی حد تک انج لگدا اے جیویں پوری دنیا اُتے ایہدے نالوں ودھ گھمبیر مسئلہ ہور کئی ہے ای نہیں۔ لوکاں دے جذبات اُسترے دی دھار اُتے آ جاندے نیں، پاکستان دی ہار دے نال ای ایتھے کئی لوکاں دیاں موتاں وی ہو جاندیاں نیں۔ کجھ لوک اپنے ٹی وی بھن کے حب الوطنی دا ثبوت دیندے نیں، کجھ نوں دل دا دورہ پے جاندا اے تے میچ دوران لوک نفل پڑھ پڑھ کے پاکستانی ٹیم دی جت دیاں دعاواں کردے نیں۔ کجھ میچ توں پہلاں ای دھماندے نظر آوندے نیں کہ جت ساڈا مقدر اے۔ ایس قسم دے اکا دُکا گیت نشر وی ہوندے رہندے نیں۔
کرکٹ میچ برطانوی طرز حکومت دی ایک عیاشی اے جیہڑی اوہناں نے اپنی اشرافیا واسطے ایجاد کیتی تے کینسر ورگا ایہہ روگ پاکستان ورگے پچھڑے دیساں وچ ایس انداز نال نظر آوندا اے کہ چار سال دے بال وی گلیاں وچ کرکٹ کھیڈ دے نظر آوندے نیں۔ چُٹھی والے گلیاں وچ تے سڑکاں اُتے کرکٹ عام ہو رہی ہوندی اے، بھاویں گیند نال کسے دا سر پاٹے تے بھاویں کسے دی باری تے روشن دان دے شیشے ٹُٹن، کسے نوں پرواہ نہیں ہوندی۔ حکومت تے اسلامی قسم دیاں جماعتاں دا سارا زور ’’ہندو تہوار‘‘ بسنت دے مکا ول اے ’’عیسائی کھیڈ‘‘ نوں مکاون وچ کسے دی دلچسپی نہیں۔ نہ ای کوئی ایہہ سوچدا اے کہ ایس کھیڈ دے نتیجے وچ ایس اسلامی دیس اندر کس حد تیکر جوئے دا کھلار ہوندا جا رہیا اے۔ لوک ہندو تہوار ہولی وانگوں کیویں مونہہ رنگدے نیں اوہ وی کسے مذہبی جماعت نوں نظر نہیں آوندی۔
کھیڈ نوں جنگ دا میدان بنا دینا اک ایسا کارناما اے جیہڑا پاکستان وچ ای ہو سکدا اے۔ کھیڈ دی ہار وچ کدھرے وی خود کشیاں نہیں ہوندیاں سوائے پاکستان دے، نہ ای انج دیاں خبراں آوندیاں نیں کہ جنج وچ دولھے نے اگے جان توں انکار کر دتا تے اصرار کیتا کہ اوہد امن پسند کھڈاری آؤٹ ہووے گا تاں اوہ نکاح وچ رلت کرے گا۔ اُتوں لے کے تھلے تیکر کرکٹ دا جنون قوم دے سر اُتے سوار اے۔ وزیراعظم ہوری آپ اینے شوقین نیں کہ اوہناں نے جذبات وچ آ کے کرکٹ میچ دوران لوڈ شیڈنگ کرن توں وی ڈک دتا۔ ایس قوم نوں ساینس یاں ریسرچ واسطے بجلی دستیاب نہیں پر کرکٹ ویکھن واسطے بجلی دی کوئی کمی نہیں۔ جیہناں نے زوال دے کھوہ وچ چھال مارنی ہووے اوہ قوماں انجے دے کسب ای کردیاں ہوندیاں نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels