Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> خبراں >> سرکار دی مناہی، اک عظیم و الشان پنجابی ریلی

سرکار دی مناہی، اک عظیم و الشان پنجابی ریلی

وچار ڈیسک
February 23rd, 2015
5 / 5 (1 Votes)

لاہور (پ ر) پاکستان پنجابی ادبی بورڈ نے لاہور وچ اک عظیم الشان ریلی دا اہتمام کیتا جیہدا مقصد پنجاب وچ مادری زبان کا نفاذ اے۔ پنجاب وچ زبان دے حق لئی چلائی جان والی ایہ تحریک صرف اک نکتہ تے اڑی اے کہ پرائمری توں گریجوایشن تک اک مضمون لازمی پڑھایا جاوے۔ ایس ریلی وچ ڈاکٹراں،وکیلاں، شاعراں، ادیباں، مزدوراں، کساناں، سیاسی کارکناں، استاداں، سوانیاں،پڑھیار تنظیماں تے سیاسی جماعتاں دے آگوواں نے شرکت کیتی۔
تحریک انصاف پنجاب دے صدر اعجاز احمد نے کہیا کہ اسیں 68 سال پنجابی نہ پڑھا کے ظلم کیتا۔ تحریک انصاف پنجابی زبان دی ترقی تے ایہنوں نصاب دا حصہ بنان لئی بھرپور جدوجہد کرے گی۔ اسیں ایس حق لئی ہر سطح پر آواز چکاں گے ۔ پاکستان پنجابی ادبی بورڈ دے صدر مشتاق صوفی نے پنجاب حکومت دی سخت نندیا کردے ہوئے کہیا کہ کئی دہائیاں توں پنجاب پر مسلم لیگ حکومت کر رہی اے پر پنجاب وچ لٹریسی ریٹ ودھ نہیں سکیا۔ پنجاب اپنی زبان دے حق توں محروم اے۔ ساڈا جلسہ تے جلوس نوں روکیا گیا۔ لاہور شہر وچ ساڈے بینر لاہ دتے گئے ۔ خوف و ہراس دی فضا پیدا کیتی گئی۔ ناصر باغ وچ عین ویلے اُتے جلسہ دی منسوخی پنجاب دشمنی اے، دوستی نہیں۔ ایتھے انتہا پسندوں نوں جلسہ و جلوس دی اجازت ہے پر شاعراں، ادیباں، وکیلاں تے مزدوراں نوں اپنے حق لئی گل کرن دی اجازت نہیں۔
خانوادہ سلطان باہو دے چشم و چراغ صاحبزادہ سلطان احمد علی نے کہیا کہ ساڈے بزرگاں نے پنجاب وچ امن، دوستی تے بھائی چارے دے ودھا لئی پنجابی زبان نوں اپنایا اتے اوہنوں ودھا دتا۔ انگریزاں نے آ کے ایس زبان نوں ختم کر کے ایس دھرتی وچ نفرت دے بی بیجے جد کہ پاکستان بنن دے بعد توں ہُن تک پنجابی زبان میں تعلیم تے روزگار دے موقعے پیدا نہیں کیتے جا رہے۔ ہُن ایس حق نوں ہور مندا نہیں ہون دیاں گے۔
پنجاب لوک لہر دے مرکزی آگو قسور بٹ نے کہا کہ کسے بھی قسم دے سیاسی دباؤ وچ آئے بغیر اپنی جدوجہد جاری رکھن گے۔ پنجاب حکومت ساڈے ایس مطالبے اُتے کوئی سنجیدہ توجہ دیون لئی تیار نہیں پر اسیں پوری سنجیدگی نال اپنی جدوجہد دا گھیرا ودھا رہے ہیں۔
پاکستان مسلم لیگ قائد اعظم دے مرکزی آگو تے سابق وزیر تعلیم میاں عمران مسعود نے کہیا کہ ساڈی حکومت نے پیلاک جیہا ادارہ قائم کیتا تے ہُن اسیں پنجابی زبان نوں سکولوں وچ پڑھان دا بندوبست کراں گے۔ اوہناں نے شاعرا ں، ادیباں، دانشوراں اور مزدوراں نوں یقین دوایا کہ اسیں زبان دے حق لئی چلائی جاون والی ایس تحریک دی بھرپور حمایت کرنے آں۔
جماعت اسلامی سے جُڑی نیشنل لیبر فیڈریشن پنجاب دے جنرل سیکرٹری شمیم اقبال نے کہیا محنت کشاں نوں اوہناں دی زبان توں محروم کیتا جا رہیا ہے۔ اوہ اپنی زبان وچ تعلیم حاصل کرن توں ملک وچوں ان پڑھتا ختم کیتی جا سکدی ہے۔
تحریک انصاف لاہور دے آگو ملک وقار نے کہیا کہ پنجابی زبان نوں پڑھان دی منگ ساڈا بنیادی تے فطری مطالبہ اے۔ اسیں ایہنوں ہر صورت نافذ کراں گے۔
انصاف سٹوڈنٹس فیڈریشن دے صدر منیب بٹ نے کہیا کہ روزگار ساڈا مڈھلا حق ہے، ایہ حق اسیں اپنی زبان لے کے داں گے۔انصاف سٹوڈنٹس فیڈریشن اپنے ایس مڈھلے حق لئی تحریک چلانا جاندی ہے تے ایس اُتے کوئی سمجھوتہ نہیں کرے گی۔
نعیم اقبال جنرل سیکرٹری کوکا کولا ایمپلائز یونین سی بی اے۔ اقبال قیصر ، امیر عبداللہ نیازی جے پی کوٹ ایمپلائز سی بی اے، محمود بٹ بھٹہ مزدور رہنما، بی ایل ایل ایف، کامریڈ عرفان، تیمور الرحمن توں اڈ سرگودھا، فیصل آباد، پاک پتن، ننکانہ ، ساہی وال، قصور، منڈی ڈھاباں سنگھ اور شیخوپورہ تو ں ہزاراں لوکاں نے شرکت کیتی۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels