نون لیگ دا اجلاس: بوہتے رکناں دی پی پی پی نال اتحاد مکاون دی منگ

پاکستان مسلم لیگ نون دی مرکزی مجلس عاملہ تے پارلیمانی پارٹی دے سانجھے اجلاس وچ رکناں دی وڈی گنتری نے کہیا جو پیپلز پارٹی دے نال اتحاد نال مسلم لیگ دی ساکھ تے اثر پے رہیا ہے منگل نوں آصف زرداری دے نال ہوون والی ملنی وچ اوہناں نوں ایہہ سنیہا دتا جاوے کہ جے لوکائی نال کیتے گئے وعدیاں نوں چھیتی پورا نہ کیتا گیا تے مسلم لیگ نون دے کول وکھیویں توں اڈ کوئی چارہ نہ رہوے گا جدوں کہ کجھ ہور رکناں نے حکومتی اتحاد وچوں نکلن دی صلاح دی مخالفت کردیاں ہوئیاں کہیا وکھیویں دے نتیجے وچ صدر پرویز مشرف ہور مضبوط ہوون گے، ایس اجلاس دی صدارت نواز شریف نے کیتی۔ شیخ آفتاب نے ہن ہور اتحاد وچ رہن دی مخالفت کیتی تے کہیا مہنگائی بے روزگاری نے لوکاں دا جینا حرام کر دتا ہے۔

برجیس طاہر نے کہیا پیپلز پارٹی تے سانوں پہلوں وی اعتماد نہیں سی اسیں ایہہ تجربہ ہی غلط کیتا ایہہ فطری اتحاد نہیں سی ہن تیکر بردباری دا وکھالا کردیاں ہوئیاں اتحاد نوں چلایا گیا پر ہن ایہہ اتحاد مک جانا چاہی دا صوبہ سرحد توں انور کمال نے کہیا جدوں اسیں برباد ہو جاواں گے اودوں اتحاد ولوں کوئی فیصلہ کیتا جاوے گا۔

پروفیسر ساجد میر نے کہیا پیپلز پارٹی تے ساڈے وی تحفظات ہین پر ملکی حالات نوں ویکھدیاں ہوئیاں فیصلے کیتے جاون اوہناں نوں پہلوں اخیرلی واننگ دتی جاوے جے اوہ لوکائی دے مینڈیٹ نوں پھیر وی پورا نہ کرن تے پھیر وکھیویں دی گل کیتی جاوے۔کجھ رکناں نے کہیا سی جو اتحاد دے مکن تے صدر پرویز مشرف مضبوط ہوون گے تے اوہناں دے اتحاد دے مکن دی خواہش پوری ہووے گی پر بوہتیاں دی رائے سی ہن صدر پرویز مشرف کسے صورت مضبوط نہیں ہوسکدے۔