حاکم جُٹ ولوں سانجھے اعلامیئے دی لکھت لکھی گئی ہے۔ وسیلیاں موجب لکھت وچ پرویز مشرف کولوں منگ کیتی جاوے گی کہ اوہ قومی اسمبلی اتے چوہاں صوبائی اسمبلیاں کولوں اعتماد دا ووٹ لوے تے نال ای صوبائی اسمبلیاں وی آئین دی آرٹیکل 47 ہیٹھ قرارداداں پیش کر کے منگ کرن گیاں کہ صدر اوہناں کولوں وی اعتماد دا ووٹ لوے۔
وسیلیاں موجب جے صدر اعتماد دا ووٹ نہیں لیندا تے اوہدے خلاف مواخذے دی تحریک ایوان وچ پیش کر دتی جاوے گی۔ لکھت وچ ایہہ وی آکھیا گیا ہے کہ صدر دے مواخذے مگروں معزول ججاں نوں اعلان مری ہیٹھ بحال کیتا جاوے گا تے ایہدے نال ای مسلم لیگ (ن) دے وزیر وی کابینہ وچ پرت آؤن گے۔
مسلم لیگ دے آگو میاں نواز شریف اتے پیپلز پارٹی دے شریک چیئرمین آصف زرداری دی منظوری مگروں ایس لکھت دا اعلان اج پریس کانفرنس وچ کیتا جاوے گا۔
ایس توں پہلوں پارلیمنٹ ہاؤس وچ قائد ایوان سینٹ رضا ربانی دے چیمبر وچ ڈرافٹ کمیٹی دا اکٹھ ہویا جیہدے وچ پیپلز پارٹی ولوں سینیٹر رضا ربانی، شیری رحمان اتے فاروق نائیک جدوں کہ مسلم لیگ نواز ولوں اسحاق ڈار اتے احسن اقبال رلتی ہوئے۔ اکٹھ وچ لکھت دی تیاری مگروں اسحاق ڈار ایہہ لکھت لے کے پنجاب ہاؤس گئے جتھے میاں نواز شریف دی پردھانی وچ ایس لکھت تے گوہ ہو رہیا ہے۔
وسیلیاں موجب میاں نواز شریف لکھت دی منظوری مگروں اپنے سنگی آگواں دے نال زرداری ہاؤس چلے جاون گے جتھے اوہ آصف زرداری اتے جُٹ دیاں دوجیاں جماعتاں دے آگواں نال ملن گے۔
