حاکم اتحاد نے مشرف دا مواخذہ تے عدلیہ دی بحالی دا پک کروا دتا
وچار ڈیسک
August 7th, 2008
پاکستان مسلم لیگ نواز دے پردھان میاں نواز شریف اتے پیپلز پارٹی دے شریک چیئرمین آصف زرداری نے اسلام آباد وچ رلویں پریس کانفرنس کیتی جیہدے وچ گل کردیاں آصف زرداری نے آکھیا کہ اٹھاراں فروری نوں پاکستان دی لوکائی نے جمہوریت نوں اک کھلا مینڈیٹ دتا سی۔ جمہوری طاقتاں رل کے کم کرن گیاں۔ پرویز مشرف نوں ایس مینڈیٹ توں مگروں استعفیٰ دے دینا چاہیدا سی۔ مشرف نے پارلیمنٹ نوں آئین دے مطابق خطاب نہیں کیتا۔ اوہدیاں پالیسیاں نے ملک نوں ماڑا کیتا۔ مشرف نے کنگز پارٹی نال رل کے جمہوریت دے خلاف سازشاں کیتیاں۔
اوہناں آکھیا کہ آئین دے آرٹیکل 47 ہیٹھ مشرف دا مواخذہ کیتا جاوے گا جیہدے وچ مشرف دے خلاف چارج شیٹ پیش کیتی جاوے گی۔ اوہناں آکھیا کہ میثاق جمہوریت نوں لاگو کیتا جاوے گا تے حقیقی جمہوریت نافذ کیتی جاوے گی۔ فاٹا تے قبائلی علاقیاں وچ صورتحال نوں چنگا کیتا جاوے گا۔ اوہناں آکھیا کہ مشرف دے مواخذے مگروں عدلیہ نوں تن نومبر دی پوزیشن تے بحال کیتا جاوے گا۔ اوہناں آکھیا کہ ایسے مہینے صدر دے مواخذے لئی قومی اسمبلی دا اجلاس سدیا جاوے گا۔
پریس کانفرنس وچ اے این پی دے نمائندے حاجی عدیل نے وی رلت کیتی تے آکھیا کہ اوہناں دے جماعت اتحادی جماعتاں ولوں کیتے جاون والے فیصلیاں نوں دلوں منندی ہے۔
میاں نواز شریف نے آکھیا کہ ایس اعلان نال اوہناں دی پارٹی تے پاکستان دی لوکائی بوہت خوش ہے۔ صحافیاں ولوں ایس سوال دے جواب وچ کہ صدر اٹھونجا ٹو بی ورت سکدا اے، میاں نواز شریف نے آکھیا کہ صدر نے پہلوں وردی دے سر تے عدلیہ چھٹی کروا دتی سی تے ہن اوہ اٹھونجا ٹو بی دے سر تے پارلیمنٹ نوں نہیں توڑ سکدا۔ ایہہ 80 یاں 90 والا پاکستان نہیں ہے۔ اوہناں آکھیا کہ پاکستان نے پہلوں ای اٹھونجا ٹو بی نوں بڑا جھلیا اے تے ہن ایہنوں نہیں جھل سکدا۔
