پیپلز پارٹی دے شریک چیئر مین آصف علی زرداری نے حکمران اتحاد دیاں ساریاں جمہوری طاقتاں دے نال رل کے حقیقی جمہوریت ول ودھن دا ارادہ ظاہر کیتا ہے۔ جیو نیوز موجب ایہہ لفظ اوہناں نے مسلم لیگ نواز دے آگواں تے ہور اتحادی جماعتاں دے آگواں دے نال ہوون والے تن روزہ مذاکرات دے مکن تے سانجھے اعلامیے وچ کہے۔
آصف علی زرداری نے کہیا کہ حکمران اتحاد ایس گل تے یقین رکھدا ہے جو لوکائی نے اٹھاراں فروری نوں جمہوریت دے حق وچ صاف مینڈیٹ دتا تے جنرل مشرف دی کنگز پارٹی نوں ہار دی صورت وچ صاف سنیہا دتا۔ اپنے صاف تے دو ٹوک کمٹمنٹ دے مگروں وی مشرف حالی تیکر صدارت دے عہدے نال چمبڑے ہوئے ہین۔ انج اپنے اٹارنی جنرل راہیں اوہناں نے سپریم کورٹ دے ساہمنے ایس گل دا وی وکھالا کیتا سی جو اوہ نویں اسمبلی توں اعتماد دا ووٹ لین گے، انج اوہ آئین دے آرٹیکل چھونجاہ موجب پارلیمنٹ وچ خطاب کرن وچ ناکام رہے۔
جنرل مشرف دے پچھلے اٹھ سالاں وچکار معاشی پالیسیاں نے ملک نوں نازک معاشی حالات دتے، انج اوہناں دیاں ناقص پالیسیاں دے کارن ملکی تاریخ دا سب توں بھیڑا بجلی دا بحران آیا۔ اوہناں دیاں پالیسیاں نے وفاق نوں لسا کر دتا۔ اوہناں نے لوکائی ولوں قومی اداریاں توں اعتماد نوں مکا دتا۔ کنگز پارٹی دے نال رل کے جمہوریت نوں پٹری توں لاون دی سازش تے انج دیاں دوجیاں وڈیاں کارناں تے حکمران اتحاد نے جنرل مشرف دے خلاف آرٹیکل سنتالی دے ہیٹھ مواخذے دی تحریک دا فیصلہ کیتا ہے۔ انج ساریاں صوبائی اسمبلیاں جیہڑیاں صدر دے چون وچ جمہوری عمل دا حصہ ہین اوتھے قراداد راہیں صدر دے اپنے وعدے موجب اپنی اعتماد دا ووٹ لین نوں کہیا جاوے گا۔ صدر دے مواخذے توں وکھ حکمران اتحاد نے فیصلہ کیتا کہ مواخذے لئی جنرل مشرف دی چارج شیٹ لائی جاوے گی۔ انج حکمران قیادت نے فیصلہ کیتا ہے جو غیر آئینی طور تے ہٹائے گئے ججاں نوں تن نومبر توں پہلوں دی حالت تے بحال کیتا جاوے گا۔
پر ایہہ صدر دے مواخذے توںمگروں ہووے گا ایہہ سب مری ڈیکلریشن موجب ہووے گا۔ اتحاد نے ایہہ فیصلہ وی کیتا ہے جو میثاق جمہوریت تے عمل کردیاں ہوئیاں رل کے سارے چیلنجاں دا مقابلہ کرن گے۔ فاٹا دی صورتحال ستارہویں ترمیم تے ہور مسئلیاں دا اسیں رل کے مقابلہ کراں گے تے حل کڈھاں گے تے اخیر وچ آصف علی زرداری نے مسلم لیگ نواز نوں پھیر کابینہ وچ رلت دی دعوت دتی۔ نواز شریف نے سانجھا اعلامیہ پڑھے جاون توں مگروں آصف علی زرداری دا شکریہ ادا کیتا تے ساریاں کہیاں گیاں گلاں نال ایکے دا وکھالا کیتا۔
