امریکہ نے آکھیا ہے کہ حاکم اتحادی جماعتاں ولوں پرویز مشرف دے مواخذے دی گل پاکستان دا گھروکی معاملہ ہے تے پاکستان آپے ایس بارے فیصلہ کرے گا۔ امریکی سٹیٹ ڈیپارٹمنٹ دے بلارے دا آکھنا سی کہ ''اسیں لگاتار ایہو آکھدے آئے ہاں کہ پاکستانی سیاست پاکستان دی لوکائی دے کرن والا فیصلہ ہے۔''
گلیگوز نے آکھیا کہ ''سانوں آس ہے کہ کیتا جاون والا ہر فیصلہ پاکستان دے آئین تے قانون دے مطابق ہووے گا۔ ایہہ پاکستانی آگواں دا فرض ہے کہ اوہ کوئی ایہو جہیا راہ کڈھن جیہدے توں پاکستان اک نویں وچاراں دا جمہوری ملک ثابت ہووے۔''
پاکستان دے اک اچ پدھری آگو دا آکھنا ہے کہ قومی اسمبلی مواخذے دا عمل 11 اگست توں شروع کر سکدی ہے۔ مشرف نے پاکستان تے اٹھ ورہے بنا کسے اوکڑ دے امریکہ دے تھاپڑے نال راج کیتا ہے جیہڑا نو گیاراں مگروں اوہناں اپنا سبھ توں گوڑھا بیلی دسدا ہے۔
