ڈاکٹر شاہد مسعود نوں پی ٹی وی 850000 ماہانہ تنخواہ تے دنیا دی ہر سوکھت دے رہیا ہے
وچار ڈیسک
August 28th, 2008
سینیٹ وچ حکومت نوں سرکاری ٹی وی چینل پی ٹی وی دے نویں چیئرمین دی تنخواہ تے ہور سوکھتاں بارے جواب دیون وچ بڑی اوکھت ہو رہی ہے۔
ایوان وچ بدھ دے دیہاڑے ایہہ معاملہ بلوچستان توں رکن ڈاکٹر محمد اسماعیل بلیدی دے اک سوال پاروں اُٹھیا جیہدے وچ اوہناں نے پی ٹی وی دے اجوکے چیئرمین تے مینجنگ ڈائریکٹر ڈاکٹر شاہد مسعود دی تنخواہ تے ہور سوکھتاں بارے جانکاری دیون لئی آکھیا گیا سی۔
جواب وچ وفاقی وزیر اطلاعات شیری رحمان نے دسیا کہ پیپلز پارٹی ولون لائے جاون والے ڈاکٹر شاہد مسعود ایس ویلے حکومت کولوں مہینے دی ساڈھے اٹھ لکھ روپیئے تنخواہ لے رہے ہین۔
ایس توں اڈ اوہناں دتیاں جاون والیاں دوجیاں سوکھتاں وچ سولاں سو سی سی دی اک گڈی، ڈرائیور تے انھے واہ پیٹرول، بزنس کلاس وچ ملک تے ملکوں باہر سفر، اک ویلے شفٹنگ لئی دو لکھ روپیہ، تفریح تے علاج معالجے دا سارا خرچہ، جنیاں دل چاہوے ٹیلی فون کالاں دی سوکھت توں اڈ اک موبائل فون، گھر ٹیلی فون کرن لئی دس ہزار دیاں کالاں، گھر دا چوکیدار، اک مہینے دے تنخواہ دے برابر سالانہ گریجوٹی، تنخواہ وچ ہر سال پنجاہ ہزار دا وادھا تے پی ٹی وی دے دوجے ملازماں وانگ بونس وی اوہناں نوں ملے گا۔
عام ویہار دے معاہدیاں دے اُلٹ ڈاکٹر شاہد مسعود دے پی ٹی وی چھڈن یاں حکومت ولوں اوہناں نوں کڈھن لئی چھ مہینیاں دا نوٹس اک دوجے نوں دینا پوے گا۔
وزیر اطلاعات دے مطابق ڈاکٹر شاہد مسعود دے کول چیئرمین اتے ایم ڈی دوہیں عہدے نیں پر اوہ تنخواہ صرف ایم ڈی دی لے رہے ہین۔ ایس توں پہلوں سیکریٹری اطلاعات چیئرمین دا عہدہ وی سنبھالدا سی۔
اوہناں دسیا کہ ڈاکٹر شاہد مسعود نوں جیو ٹی وی توں پی ٹی وی وچ معاہدی مکن توں پہلوں لیاؤن لئی جیو نوں کوئی رقم نہیں دتی گئی۔ اوہناں آکھیا کہ اج دے دور وچ اوہناں نوں دتی جاون والی تنخواہ تے دوجیاں سوکھتاں کجھ بوہتیاں نہیں۔
ایوان وچ اپوزیشن لیڈر کامل علی آغا نے ڈاکٹر شاہد مسعود دی قابلیت بارے سوال کیتا۔ اوہناں پچھیا کہ حکومت نے ایس عہدے لئی کوئی اخباری اشتہار دتا سی یاں نہیں۔ ایس تے وزیر اطلاعات نے دسیا کہ نہ پچھلی حکومت نے تے نہ ای اوہناں نے ایس عہدے لئی کوئی اشتہار دتا۔
سینیٹر جاوید قاضی، یاسمین شاہ اتے ہارون اختر نے وی ایس تعیناتی دی نکھیدی کیتی تے آکھیا کہ ڈاکٹر شاہد مسعود دے کول ایس عہدے لئی صلاحیت یاں تجربہ نہیں ہے۔ ایہہ معاملہ ڈونگھے گوہ لئی پہلوں ای سینیٹ دی اطلاعات بارے کمیٹی کول ہے۔ قائم مقام سینٹ چیئرمین جان محمد جمالی نے ایس موقعے تے کمیٹی دے موہری سینٹر لیاقت علی بنگلزئی نوں آکھیا کہ اوہ کمیٹی دے اگلے اکٹھ وچ ایس گل دا پک کرن کہ ڈاکٹر شاہد مسعود کمیٹی ساہمنے پیش ہوون۔ کمیٹی دے پچھلے اکٹھ وچ اوہ پیش نہیں ہوئے سن۔
