مسلم لیگ نون دے صدر تے وزیر اعلیٰ پنجاب شہباز شریف نے آصف علی زرداری دی کردار کشی تے بنی کسے وی مہم نال کوئی تعلق نہ ہوون دا وکھالا کیتا ہے۔ مقامی میڈیا وچ قنونی ماہر بیرسٹر فاروق حسن دے حوالے نال اطلاعواں ہین جو مسلم لیگ نون آصف علی زرداری دی ذہنی صحت بارے اوہ رپورٹاں اکٹھیاں کرن دی کوشش کررہی ہے جیہڑیاں سوئس عدالت وچ جمع کروائیاں گئیاں ہین۔
قنونی ماہر بیرسٹر فاروق حسن نے میڈیا نوں دسیا سی جو اوہناں دی مسلم لیگ نون دے صدر میاں شہباز شریف نال ملنی ہوئی ہے جیس وچ اوہناں نے آصف علی زرداری دی صدارتی امیدوار دے طور تے نااہلیت دا ریفرنس دائر کرن ولوں غور کیتا ہے۔
وزیر اعلیٰ پنجاب شہباز شریف نے اپنے بیان وچ ایس ملنی دی تصدیق کیتی تے ایہہ وی کہیا جو اوہناں آصف علی زرداری ولوں اوہناں نال رابطہ کیتا سی۔ پر اوہناں کہیا ' بیرسٹر فاروق حسن جو کجھ کہہ رہے ہین ایہہ خورے اوہناں دا اپنا ایجنڈا ہووے پر ساڈا ایہدے نال کوئی تعلق نہیں ہے۔'
مسلم لیگ نون دی حکمران اتحاد نال علیحدگی تے آصف علی زرداری دی صدر دے طور تے نامزدگی دی مخالفت دے مگروں وی دوہواں جماعتاں وچ پاڑ ہے پر دوہواں پارٹیاں نے اپنیاں اپنیاں پارٹی آگواں نوں کردار کشی دے بیاناں توں روکیا سی۔
مسلم لیگ نون نے آصف زرداری دے مقابلے وچ جسٹس ریٹائرڈ سعید الزمان صدیقی نوں اپنا امیدوار بنایا ہے۔ مبصراں دا کہنا ہے جو شہباز شریف دے ایس بیان نال ایہہ ظاہر ہوندا ہے جو مسلم لیگ نون صرف جمہوری طریقے نال پارلیمان دے رکناں دے ووٹاں راہیں آصف زرداری نوں ایوان صدر اپڑن تیکر روکن دیاں کوششاں کرن گے۔
