پیپلز پارٹی مشرف دے ایجنڈے تے کم کررہی ہے: نواز شریف

نواز شریف نے کہیا ہے جو پیپلز پارٹی تے پرویز مشرف دے ایجنڈے تے کم کررہی ہے جیہڑا کہ لوکائی لئی بوہت ہرکھ دی گل ہے۔ آئین نوں بحال کرن دی بوہت لوڑ ہے، ججاں دی بحالی تے میثاق جمہوریت تے عمل لئی ہی اتحاد قائم کیتا گیا سی۔ غیر ملکی جریدے نوں انٹرویو وچ نواز شریف نے کہیا ججاں دی بحالی نال ہی جمہوریت دی مضبوطی ہے۔

آزاد عدلیہ دے بغیر قنون دی حکمرانی نہیں ہوسکدی۔ کسے پارٹی دی قیادت کرن والے نوں صدر بن دیاں نہیں ویکھیا۔ جے کوئی بنیا تے اوہنوں پارٹی دی صدارت توں ہٹنا پیا۔

نواز شریف نے کہیا اتحاد ساڈی وجہ توں نہیں اوہناں دی وجہ توں ٹٹیا جنہاں نے اپنے وعدیاں دی پاسداری نہیں کیتی، اتحاد ٹٹن توں مگروں مسلم لیگ نون نے کجھ چنگا محسوس نہیں کیتا پر ساڈے لئی ایہدے توں سوا کوئی چارہ نہیں سی۔ اوہناں کہیا ق لیگ دے کئی رکن رابطے وچ ہین تے نون لیگ وچ رلت چاہندے ہین۔ اسلام آباد وچ غیر ملکی میڈیا نال گل بات کردیاں ہوئیاں نواز شریف نے کہیا پاڑ دی سیاست نظام تے اثر پاسکدی ہے۔ اوہناں نے کہیا مرکز وچ اسیں پیپلزپارٹی دے مینڈیٹ دا احترام کیتا تے پنجاب وچ مسلم لیگ نون دا حکومت کرن دا جمہوری حق ہے۔