حکومت نے عافیہ صدیقی دے بچیاں نوں پاکستانی منن نوں نانہہ کر دتی
وچار ڈیسک
September 3rd, 2008
پاکستان نے ڈاکٹر عافیہ صدیقی دے بچیاں نوں پاکستانی شہری منن اتے افغانستان سرکار کولوں لے کے پاکستان وچ اوہدے گھر والیاں دے حوالے کرن توں نانہہ کر دتی ہے۔ ڈاکٹر عافیہ صدیقی دی بھین فوزیہ صدیقی نے دسیا ہے کہ اوہناں دے ٹبر نے امریکی عدالت وچ بچے واپس لین لئی مقدمہ کیتا ہویا ہے تے اوہناں دی وکیل نے دسیا ہے کہ امریکی سٹیٹ ڈپارٹمنٹ نے عدالت نوں دسیا ہے کہ پاکستانی سرکار ڈاکٹر عافیہ دے بچیاں نوں پاکستانی شہری نہیں مندی تے اوہ اوہناں نوں افغان سرکار کولوں لے کے اوہناں دے ٹبر دے حوالے نہیں کرنا چاہوندی۔
ڈاکٹر فوزیہ نے دسیا ہے کہ اسٹیٹ ڈپارٹمنٹ ولوں امریکہ وچ اوہناں دے بھرا محمد علی صدیقی نوں وی اک چٹھی لکھی گئی ہے جیہدے وچ آکھیا گیا ہے کہ اوہ امریکی عدالت وچ بچیاں نوں واپس لین دے مقدمے وچ دو ہفتے توں پیش نہیں ہوئے ایس لئی ہن ڈاکٹر عافیہ دے بچیاں نوں اوہناں دے حوالے نہیں کیتا جاوے گا تے اوہ امریکہ وچ ای رہن گے۔ اوہناں دسیا کہ امریکی عدالت وچ پیش نہ ہوون دا کارن پاکستانی سرکار دے اوہ وعدے سن جیہناں وچ آکھیا گیا سی کہ حکومت ڈاکٹر عافیہ دے بچیاں نوں ملک واپس لیاؤن لئی پربندھ کر رہی ہے۔
