انگور اڈہ وچ اتحادی فوج دے دھاڑے وچ 20 شہری مارے گئے: حکومت
وچار ڈیسک
September 3rd, 2008
جنوبی وزیرستان دے علاقے انگوراڈہ وچ اتحادی فوجاں دی کاروائی وچ 20 شہریاں دے مارے جاون دی حکومت نے تصدیق کیتی ہے۔ واقعے تے گورنر سرحد اویس احمد غنی نے روس وکھالا کردیاں ہوئیاں کہیا کہ دھاڑا ملکی سالمیت تے دھاڑا ہے جیہڑا مذمت دے قابل ہے۔
چیتے رہوے جو جیو نیوز دے نمائندے مشتاق یوسف زئی موجب واقعہ بدھ نوں تڑکے تن وجے ہویا جدوں اتحادی فوجاں دے چار ہیلی کاپٹر جنوبی وزیرستان دے علاقہ انگوراڈہ وچ اترے ایس ویلے علاقے دے سارے لوک ستے ہوئے سن، اتحادی فوجاں نے کئی گھراں دی تلاشی لئی جیہدے وچکار مقامی قبائلی تاج محمد دے گھر وچ اتحادی فوجیاں نے 9 بندیاں نوں مار دتا۔ نو بندیاں دے مارن دے مگروں اتحادی فوج نے ہور دو گھراں دی وی تلاشی لئی جیس وچکار اک گھر وچ چار تے دوجے گھر وچ اک قبائلی نوں مار دتا۔
ایس کاروائی وچ پنج زنانیاں تے چار نیانے وی رلتی ہین۔ واقعے دے مگروں مقامی قبائلیاں نے روس وکھالا کیتا تے امریکہ دے خلاف نعرے مارے۔ قنائلیاں نے امدادی کاروائیاں کردیاں ہوئیاں پھٹڑ تے مارے جاون والے بندیاں نوں ہسپتال اپڑایا۔
