پشاور ہائیکورٹ دے معزول چیف جسٹس طارق پرویز نے آکھیا ہے کہ اوہ کل پشاور ہائیکورٹ دے چیف جسٹس دے طور تے حلف چکن گے۔ میڈیا نال گل کردیاں اوہناں دسیا کہ اوہ جمعے دے دیہاڑے پشاور ہائیکورٹ دے چیف جسٹس دی حیثیت نال حلف چک رہے ہین۔ اوہناں نے پشاور ہائیکورٹ دے دوجے معزول ججاں دے حلف چکن بارے کسے خبر توں لاعلمی دا وکھالا کیتا ہے۔
پرویز مشرف دے تن نومبر دے حکم مگروں پشاور ہائیکورٹ دے چار ججاں نے پی سی او ہیٹھ حلف چکن توں انکار کیتا سی جیہناں وچ معزول چیف جسٹس طارق پرویز توں اڈ جسٹس دوست محمد خان، جسٹس شاہ جہان خان اتے جسٹس اعجاز افضل رلتی نیں۔ وسیلیاں موجب سرحد دے گورنر معزول چیف جسٹس کولوں پشاور ہائیکورٹ دے چیف جسٹس دا حلف لین گے۔
حلف چکن دا اکٹھ جمعے دے دیہاڑے سویرے گیاراں توں باراں وجے دے وچکار گورنر ہاؤس پشاور وچ ہووے گا۔ وسیلیاں موجب دوست محمد اتے شاہ جہان یوسف زئی وی پشاور ہائیکورٹ دے ججاں دے طور تے حلف چکن گے۔ اوہناں کولوں نویں چیف جسٹس طارق پرویز حلف لین گے۔ دوجے پاسے پشاور ہائیکورٹ دے تن معزول ججاں نے اپنی بحالی بارے لا علمی دا وکھالا کیتا ہے۔
