لوڑ پئی تے پاکستان وچ ہور وی کاروائیاں کراں گے: امریکہ
وچار ڈیسک
September 5th, 2008
امریکہ نے آکھیا ہے کہ امریکی فوجیاں نے القاعدہ دے اک آگو نوں پاکستان وچ وڑ کے ماریا تے ایہو جہیاں ہور کاروائیاں وی کیتیاں جا سکدیاں نیں۔ پینٹاگون نے آکھیا ہے کہ ات وادیاں نوں سکھالیاں تھاہراں تے لُکن نہیں دتا جاوے گا تے اوہ جتھے جاون گے اوہناں دے مگر جاواں گے۔
واشنگٹن وچ گل بات کردیاں پینٹاگون دے بلارے برائن وہائٹ نے آکھیا کہ امریکا اپنے اتحادیاں دی ہتھ ونڈائی نال اپنے ویریاں نال نبڑن نوں تیار ہے۔ بلارے دا آکھنا سی کہ ات وادیاں نوں سکھالیاں تھاواں تے لُکن نہیں دیواں گے۔ اوہ جتھے وی کاروائیاں کرن گے یاں پناہ لین گے اوہناں نال نبڑیا جاوے گا۔
امریکی سوجھواناں دا آکھنا ہے کہ انگور اڈہ وچ امریکی فوجیاں دی کاروائی کھاڑکواں دے خلاف امریکہ دے ٹیچیاں وچ بھرویں بدلی دا وکھالا ہے۔ تجزیہ کاراں تے ماہراں موجب پاکستان وچ سدھی ساہویں کاروائی نال امریکہ نوں آس ہے کہ کھاڑکواں دیاں کاروائیاں ڈکن وچ سوکھت ہووے گی تے اوہناں دا لک بھنیا جا سکے گا۔
ماہرین موجب پاکستان وچ کھاڑکواں دیاں ودھدیاں کاروائیاں امریکہ لئی چنتا دا کارن نیں تے ہُن جاپدا ہے کہ پینٹا گون نے اپنے ٹیچیاں وچ بھرویاں بدلیاں دا فیصلہ کر لیا ہے۔
