آصف علی زرداری وڈی گنتی وچ ووٹ لے کے ملک دے صدربن گئے

پیپلز پارٹی دے شریک چیئر مین آصف علی زرداری 479 ووٹ لے کے ملک دے نویں صدر چنے گئے ہین۔ غیر سرکاری نتیجیاں موجب قومی اسمبلی وچ آصف علی زرداری نوں 281، سعید الزماں صدیقی نوں 111 تے مشاہد حسین سید نوں 34 ووٹ ملے۔

پنجاب اسمبلی وچ آصف علی زرداری نوں 123 سعید الزماں صدیقی نوں 201 جدوں کہ مشاہد حسین سید نوں 36 ووٹ ملے۔ انج سرحد اسمبلی وچ آصف علی زرداری نوں 107 جسٹس ریٹائرڈ سعیدالزماں صدیقی نوں10 مشاہد حسین سید نوں 3 ووٹ ملے جدوں کہ 4 ووٹ رد ہوئے۔

سندھ اسمبلی وچ کل 166 ووٹ سن جنہاں وچوں 163 کاسٹ ہوئے، آصف زرداری نوں 162 ووٹ ملے۔ سندھ اسمبلی وچ سعید الزماں صدیقی تے مشاہد حسین سید وچوں کوئی امیدوار اک وی ووٹ نہ لے سکیا جدوں کہ بلوچستان اسمبلی وچوں آصف زرداری نوں 59 ووٹ ، سعید الزماں صدیقی تے مشاہد حسین سید نوں2,2 ووٹ ملے۔

انج کل آصف علی زرداری نوں 479 ، سعید الزماں صدیقی نوں 153 جدوں کہ مشاہد حسین سید نوں 43 ووٹ ملے۔ قومی اسمبلی وچ پولنگ اج سویرے دس وج کے دس منٹ تے شروع ہوئی جیہڑی شام تن وجے تیکر جاری رہی۔ سب توں پہلے سینیٹرز نے ووٹ پائے جیہدے توں مگروں قومی اسمبلی دے رکناں نے ووٹ کاسٹ کیتے۔

سرحد اسمبلی وچ 124 ووٹ پائے گئے، سندھ اسمبلی دی رکن رقیہ سومرو نے بوہت بماری دے مگروں وی اپنا ووٹ ورتیا اوہناں نوں اسمبلی وچ اسٹریچر تے لیاندا گیا اوہناں اسٹریچر تے ووٹ پاون دی اک نویں مثال قائم کیتی۔ صدر دے چون دے سلسلے وچ پیپلز پارٹی دے شریک چیئر مین آصف علی زرداری ، مسلم لیگ نون دے جسٹس ریٹائرڈ سعید الزمان صدیقی تے مسلم لیگ ق دے امیدوار سینیٹر مشاہد حسین سید رلتی سن۔