چنگی اپوزیشن بناں گے: نواز نے زرداری نوں پک کروا دتا
وچار ڈیسک
September 8th, 2008
مسلم لیگ نواز دے پردھان میاں نواز شریف نے نویں چُنے گئے صدر آصف زرداری نال وزیر اعظم ہاؤس وچ اک ملنی کیتی ہے جیہدے وچ اوہناں نے زرداری نوں پک کروایا ہے کہ مسلم لیگ نواز اسمبلی وچ چنگی اپوزیشن دا کردار نبھاوے گی۔
وزیر اعظم ہاؤس وچ ہوون والی ایس ملنی وچ وزیر اعظم یوسف رضا گیلانی، وزیر اعلیٰ پنجاب توں اڈ مسلم لیگ نواز دے جاوید ہاشمی، احسن اقبال، خواجہ آصف، چوہدری نثار، ظفر اقبال جھگڑا، راجہ ظفرالحق اتے پیپلز پارٹی ولوں وفاقی وزیر شیری رحمان تے مشیر داخلہ رحمان ملک وی رلتی سن۔
میاں نواز شریف نے آصف زرداری نوں وڈی گنتی نال صدر چُنے جاون تے مبارک دی تے پک کروایا کہ مسلم لیگ نواز اپوزیشن وچ رہندیاں ہوئیاں جمہوری رِیتاں نوں ودھاؤن دا جتن کرے گی تے حکومت نوں ہر طرحاں دی مدد دے کے چنگی اپوزیشن دا کردار نبھاوے گی۔
وسیلیاں موجب ایس موقعے تے صدر آصف زرداری نے میاں نواز شریف نوں اک واری فیر حاکم جُٹ وچ رلن دا سدّا دتا یاں جو ملک جیہڑیاں اوکڑاں وچ پھسیا ہوئیا ہے اوہناں توں نکلیا جا سکے۔ ایس ملنی وچ ایہہ وی متھیا گیا ہے کہ دوہاں پارٹیاں دے آگو اک دوجے دی خلاف بیان بازی نہیں کرن گے۔
