عوامی نیشنل پارٹی دے صوبائی صدر سینیٹر افراسیاب خٹک نے کہیا ہے دکھنی وزیرستان وچ ایس ویلے تن ہزار توں پنج ہزار دے وچکار انج دے طالبان موجود نیں جیہڑے پنجابی نیں تے ایس معاملے نوں پنجاب حکومت دے ساہمنے وی رکھیا گیا ہے۔
سینیٹر افراسیاب خٹک نے کہیا سی پئی قبائلی علاقیاں وچ موجود پنجابی طالبان وچوں وڈی گنتری صوبہ پنجاب دے دکھنی ضلعیاں توں ہے تے ایس سلسلے وچ سرحد حکومت نے سرکاری طور تے پنجاب حکومت نال چنتا دا وکھالا کیتا ہے۔ اوہناں ایہہ وی کہیا سی پئی پچھوکڑ وچ ایہہ کہیا جاندا رہیا ہے پئی پاکستان وچ فوج ریاست دے وچ اک ریاست ہے پر ہن ایہ گل اک حقیقت ہے پئی ہن فوج ہی پاکستان وچ ریاست ہے'۔
افراسیاب خٹک نے کہیا طالبانائزیشن ایسے سکے دا دوجا رخ ہے تے جنہوں وکھرا کر کے نہیں ویکھیا جاسکدا۔ اوہناں نے طالبان نوں پاکستانی فوج دی ' سڑیٹیجک ڈیتھ ' پالیسی دا نتیجہ کہندیاں ہوئیاں کہیا پئی پاکستان دے قبائلی علاقیاں نوں اک سٹریٹجک تھاں دے طور تے ورتیا گیا ہے۔
سیمینار نال خطاب کردیاں ہوئیاں پیپلز پارٹی دے آگو سینیٹر رضا ربانی دا کہنا سی پئی طالبانائزیشن دے مسئلے دا کوئی چھیتی حل نہیں تے نہ ہی حکومت دے کول کوئی جادو دی سوٹی ہے جنہوں گھماون نال ایہہ مسئلہ غائب ہو جاوے۔
اوہناں نے کہیا ایہہ اک انج دا معاملہ ہے جیہدے کئی رخ نیں تے سانوں ایس گل نوں نظر وچ رکھنا چاہی دا پئی دنیا دیاں کئیاں طاقتاں انج دیاں نیں جنہاں دے مستقبل دے فیدے ایس خطے نال جڑے نیں ایس لئی ضروری ہے پئی اہنوں صرف پاکستان دا داخلی مسئلہ سمجھن دی بجائے اوہدے نال جڑے خارجی کارناں نوں وی نظر وچ رکھیا جاوے۔
رضا ربانی نے کہیا پاکستان جیہڑا اک ویلفیئر سٹیٹ سی ہن اک گیریژن سٹیٹ وچ بدلیا گیا ہے تے ساڈا وسیب ہن انارکی ول ودھ رہیا ہے۔
رضا ربانی تے ڈاکٹر پرویز ہود بھائی سنے کئی بلاریاں نے طالبان دیاں کاروائیاں نوں اک نظریاتی جنگ کہیا تے دسیا پئی ایہدے نال نبڑن لئی اک وٹاندرے دا نظریہ ساہمنے لیاوناضروری ہے جیہدے نال لوکائی دے دل جتے جاسکن۔
ڈاکٹر ہود بھائی نے اپنی تقریر وچ کہیا ایہہ خیال غلط ہے پئی صرف غربت، انصاف دے نہ ملن یاں تعلیم دی کمی ورگے کارن ہی پاکستان وچ ات واد وچ وادھے دے مڈھلے کارن نیں۔ اوہناں کہیا اہناں کارناں توں فیدا چک کے اوہناں لوکاں دے ذہناں نوں ات واد ول اک حد تیکر کھڑیا تے جاسکدا ہے پر اصل وچ پاکستان وچ ات واد ی جنگ مذہبی نظریے دی جنگ بن گئی ہے تے ایہدے نال نبڑن لئی پاکستان ریاست نوں لوکائی تے اینا اعتماد بحال کرنا پوے گا کیوں جو پاکستان صرف ایسے طرحاں مضبوط ہوسکدا ہے جدوں اوہدی لوکائی ریاست دے نال کھلوتی ہووے۔
