جتھے پاکستانی فوج ملک دے شمال مغرب وچ کھاڑکواں دے خلاف کئی محاذاں تے رجھی ہے اوتھے صوبہ پنجاب دی پلس نے وی ات واد دے خلاف کریک ڈاؤن وچ کئی کامیابیاں پائیاں نیں۔
اہناں دناں وچ پنجاب وچ موجود کھاڑکواں دے کئی جتھیاں دا خاتمہ کیتا گیا ۔ ایس وچکار کئی گرفتاریاں ہوئیاں نیں ۔پھڑے جاون والیاں وچوں اک نے بمب تیار کرن جدوں کہ اک ہور بندے نے خود کش بمبار ہوون دا اعترف کیتا۔
پاکستان وچ بی بی سی دی نامہ نگار اورلا گیرن دی اہناں کھاڑکواں تے اوہناں دے خلاف کاروائی وچ رلتی پلس افسراں نال ہوون والی گل بات دی تفصیل کجھ انج ہے۔
پلس نوں اک وڈی کامیابی اودوں ملی جدوں اوہنے اک برقعے والے بندے نوں پھڑیا۔ملزم دا خیال سی پئی ایہہ کھلا جیا چولا اوہدے کول موجود آپ مارو بیلٹ تے دھماکہ کرن والے مواد نوں لکاون وچ مدد گار ثابت ہووے گا پر پلس نے اک مسافر بس دی تلاشی وچکار اوہنوں دھر لیا۔
ہویا انج پئی اک پلس والا اچن چیتی اوہدے جثے نال وجیا تے پلس والے دے ہتھ نوں کوئی سخت شے لگی تے ایہہ ہی ایس بمبار دے مشن دا چھیکڑلا لمحہ ثابت ہویا۔ ایہہ پلس افسر دی اخیرلی ساہ وی ہوسکدی سی پر مگروں پتہ لگیا پئی دھماکا کرن والے مواد دیاں تاراں ڈیٹونیٹر نال جڑیاں ہوئیاں نہیں سی۔
ایہدے توں مگروں علاقائی پلس پردھان اکبر ناصرخان نے موقعے تے اپڑ کے بمبار نوں غیر مسلح کیتا۔ اکبر ناصر کہندے: ' ساڈے افسراں دے کول ایہدی ٹریننگ نہیں ہے۔ نہ ہی آپ مارو بمبار نوں غیر مسلح کرن دا کوئی معیاری طریقہ کار۔ ایس لئی ایہہ کم مینوں کرنا پیا۔'
اکبر خان نے اپنے لاگے کھلوتے ہوئے بمبار نوں مخول نال پچھیا ' کیہ توں پہلوں وی انج دا کم کیتا ہے؟ بمبار نے مسکاوندیاں ہوئیاں جواب دتا پئی بندہ اک واری ہی انج کرسکدا ہے۔
ملزم نے بمب بناون دا منیا اوہدے موجب اوہ ایہ خود کش جیکٹ سرگودھا وچ اُڈیکدے اک آپ مارو بمبار نوں دیون لئی جارہیا سی۔
ایس گرفتاری توں مگروں پلس نے علاقے وچ طالبان دے اک جتھے دا پتہ لایا تے کئی گرفتاریاں ہوئیاں جنہاں وچ آپ مارو بمبار اوہناں لئی چندہ اکٹھا کرن والا، آپ مارو دھاڑویاں لئی لوکاں نوں مناون تے اوہناں نوں اوہناں دی منزل تیکر اپڑاون والیاں وچ رلتی نیں۔ پر اوہناں دا مقامی پردھان حالی تیکر نسیا ہویا ہے۔
اک دور دی تھاں تے ساڈی ملنی برقعے والے بمب بناون والے نال کروائی گئی۔ اوہدی عمر پنجی سال سی تے کنوارہ سی۔ اوہنے وزیرستان وچ ٹریننگ لئی ہے۔ اوہناں کہیا سی میری جماعت وچ پندراں سولاں بندے سی جنہاں نوں دھماکے والے مواد دی ٹریننگ دتی گئی سی۔ پہلوں ایہہ لوک افغانستان وچ سی پر ہن پاکستان وچ نیں۔ اوہ کہندے نیں اسیں اوتھے کیوں جائیے جدوں ایتھے اینا کجھ کرن نوں ہے۔ ہن اوہ کسے دے وی کہن تے وی افغانستان نہیں جاون گے اوہدے موجب ایہہ ٹریننگ کیمپ تحریک طالبان پاکستان دے پردھان بیت اللہ محسود دا سی پر اوہنے آپوں کدی بیت اللہ محسود نوں نہیں ویکھیا۔
اوہنے ساڈے سوالاں دے جواب بڑے سوہنے طریقے نال فری ہو کے دتے سی۔ اوہناں کہیا سی اوہ آپ مارو دھاڑوی بننا چاہندا ہے تے جدوں رہائی ملے گی تے کوئی وڈا کم کرے گا۔
سرگودھا وچ گرفتار ہوون والے آپ مارو دھاڑوی نوں وی کسے قسم دا پچھتاوا نہیں سی۔ اوہدی عمر تریہہ سال تے کوارے نیں۔
اوہناں کہیا سی اوہنوں اپنے ہدف دا پتہ نہیں سی کیوں جو اوہ مگروں دسیا جانا سی۔
جدوں اسیں اوہدا انٹرویو کیتا تے اوہدے پیراں وچ بیڑیاں سی تے مونہہ ڈھکیا ہویا سی ۔میں اوہنوں پچھیا معصوم لوکاں نوں مارن دا اوہدے کول کیہ جواز ہے۔ اوہدا جواب سی ' جدوں اوہ سانوں ٹریننگ لئی کھڑدے نیں تے کہندے نیں ایہہ جہاد ہے۔ اوہ ساڈا برین واش کر دیندے نیں تے اسیں سمجھنے آں پئی ایہہ جنت دی راہ ہے'۔
میں پچھیا جے اوہنوں زنانیاں تے نیانیاں نوں مارن دا کہیا جاوے تے کیہ اوہ انج کرے گا اوہنے کہیا ' اوہ سانوں جو وی کہن گے اسیں کراں گے جے ساڈا کمانڈر سانوں ساڈے ماپیاں نوں مارن دا وی کہوے گا تے اسیں ایہہ وی کر دیواں گے۔'
میں پچھیا جے تینوں حکم ملے پئی مینوں مار دے تے کیہ توں انج کریں گا؟ اوہنے چھیتی نال کہیا کیوں نہیں؟
پنجاب وچ پلس نے پنج رکناں دے طالبان دے جتھے نوں وی پھڑن دا دعویٰ کیتا۔ سرگودھا وچ پلس سپرنٹنڈنٹ عثمان انور دا کہنا ہے حکومت تے پلس دی کاروائی نوں ویکھدیاں ہوئیاں ایہہ لوک اپنا ورتارا بدل رہے نیں پر نال ہی نس بھج وی رہے نیں۔
پاکستان وچ کئی لوکاں دا کہنا ہے پئی پاکستان دا مستقبل پنجاب دے حالات تے ہے۔ اوہناں نوں ڈر ہے جے طالبان پاکستان دے سب توں بوہتے آبادی والے صوبے نوں غیر مستحکم کر سکدے نیں تے اوہ ملک نوں وی نقصان اپڑا سکدے نیں۔
پلس افسر اکبر خان موجب ایہہ اک اہم ویلا ہےـ ' اسیں دوہویں دھراں جاننے آں پئی ایہہ فیصلے دی گھڑی ہے۔ ایہہ جنگ آون والے ویلے لئی بڑی اہم ہے تے اگلے کجھ مہینیاں وچ فیصلہ ہو جاوے گا پاکستان کس راہ تے جاندا ہے۔'
