فیس بُک ورتنا گناہ ہے: جامعہ الازہر دے مفتی دا فتویٰ

سماجی نیٹورک دیاں ویب سائٹاں جیویں کہ 'فیس بک' نوں مصر دے اک وڈے عالم نے اسلام دے خلاف آکھیا ہے تے فتویٰ دتا ہے پئی جیہڑے مسلمان ایہو جہیاں سائبر تھاواں نوں ورتدے ہین اوہناں نوں 'گناہی' سمجھیا جانا چاہیدا ہے۔

عالم دین دا آکھنا ہے پئی ایس طرحاں دیاں سائٹاں پاروں ملک وچ طلاق ودھ گئی ہے۔ مشہور سُنی عالم شیخ عبدالحمید العطرش جیہڑے مصر دی مشہور جامعہ الازہر وچ فتویٰ کمیشن دے پردھان رہے ہین، اوہناں نے ایہہ فتویٰ جاری کیتا ہے پئی ایہو جہیاں سائٹاں کارن ویاہے لوکاں وچ بے وفائی ودھ رہی ہے۔

اوہناں آکھیا ''ایہہ اک ہتھیار ہے جیہڑا ٹبر نوں برباد کر دیندا ہے کیوں جے ایہہ ویاہے جیاں نوں دوجے لوکاں نال سانگے بناؤن وی ہتھ ونڈاؤندا ہے جیہدے نال اسلامی شریعت دا قانون ٹٹ جاندا ہے۔''

عبدالحمید العطرش دا آکھنا ہے پئی جدوں کھسم یاں تیویں وچوں اک کم تے گیا ہوندا ہے تے دوجا پچھوں دوجیاں نال انٹرنیٹ تے گپاں مار رہیا ہوندا ہے جیہدے نال لوکاں دا ویلا وی کھنجھدا ہے اتے ایہہ شریعت دی خلاف ورزی وی ہے۔ ایہدے نال مسلمان ٹبراں نوں خطرہ ہے۔

مفتی نے ایہہ فتویٰ ایس ہفتے دے شروع وچ چھپن والی اک رپورٹ مگروں دتا ہے جیہدے وچ دسیا گیا سی پئی مصر وچ طلاق دے ہر پنج مقدمیاں وچوں اک مقدمے دا کارن ایہہ ہوندا ہے پئی دوہاں وچوں اک جی 'فیس بُک' ورگی سائٹ ورت رہیا ہوندا ہے۔