سارے جگ وچ کوئی دو ہزار توں بہتے بے دین نظریے دے حمینی اپنے بے دین ہوون دا جشن مناون لئی آسٹریلیا دے شہر ملبرن وچ اکٹھے ہورہے نیں۔ بے دیناں دا ایہہ سب توں وڈا اکٹھ دسیا جارہیا ہے۔کہیا جارہیا ہے پئی کانفرنس دے رلتی اک اعلامیہ وی جاری کرن گے جیہدے وچ سارے جگ دے مذہباں دے بھیڑے اثراں نوں دسیا جاوے گا۔
ایس کنوینشن وچ رلت لئی سارے دے سارے ڈھائی ہزار ٹکٹ ایس سال دے شروع وچ ہی وگ گئے سن۔ پر ایسے تھاں تے دسمبر وچ ہون والے اک مذہبی اکٹھ وچ ایہدے توں تن گنا ودھ لوک اکٹھے ہوئے سن۔ بی بی سی دے مذہبی پربندھاں دے صحافی کرسٹو فر لینڈاؤ دا کہنا ہے پئی عالمی ملحد کنوینشن وچ سائنسدان فلاسفر سوجھوان تے مخولی فنکار شریک ہوون گے۔
کنوینشن وچ بہتے پڑھے جان والے لکھاری رچرڈ ڈاؤکنز دے نال اک سیشن دا سنیہا ہے '' سراباں دا مُل '' ایہدے وچ اسلام وچ ات واد دے موضوع تے گل بات ہووے گی۔ کنوینشن وچ اک انج دے فلم دی صلاح پیش کیتی جاوے گی جیہدے وچ ایہہ دسیا جاوے گا پئی ٹیکس دیون والے مذہب دے ناں تے کنے پیسے خرچ کر رہے نیں۔
ملحد نظریے دے حمیتی رل کے ایہہ ارادہ وی کرن گے پئی اوہناں دے نظریہ دی شدت مڈھ پرستی وچ نہ بدلے۔ رلتیاں تے ایہہ وی زور دتا جاوے گا پئی او لادینیت دے اپنے سنیہا نوں کھلارن لئی بہتا جوش وکھاون توں پرہیز کرن۔
