ہندوستانی ملانیاں ولوں لازمی تعلیم دے قانون دی مخالفت کیوں؟

ہندوستان دی پارلیمنٹ نے حالیں اک قانون دی منظوری دتی ہے جیہدے ہیٹھ سارے ملک وچ 6 توں 14 سالاں دے بالاں دی پڑھائی لازمی متھ دتی گئی ہے۔ ایہدے ہیٹھ جیہڑے بال سکول نہیں جان گے اوہناں دے ماپیاں نوں ڈنڈ بھرنا پوے گا۔

ایس تگڑی اسکیم تے ہر سال نو ارب ڈالر خرچے جان گے۔ ساریاں تیکر مفت تعلیم اپڑاؤن دی ایس مہم تے اگلے پنجاں سالاں لئی کوئی پنتالی ارب ڈالر دی رقم رکھی گئی ہے۔

ملک دی ہر ڈھانی ولوں ایس منصوبے نوں سلاہیا گیا ہے۔ ملک دی سب توں پچھونہی مذہبی اقلیت مسلماناں وچ وی ایس منصوبے تے خوشی ظاہر کیتی گئی پر مسلماناں دیاں مذہبی ستھاں، ملوانے تے مدرسے چلاؤن والے ادارے نویں تعلیم نوں عام لوکاں تیکر اپڑاؤن دے ایس قانون دی مخالفت کر رہے نیں۔ اوہناں دا کہنا ہے جو تعلیم نوں مڈھلا حق بناؤن دے قانون نال مدرسیاں دا نقصان ہووے گا۔

جماعت اسلامی ہند دے امیر مولانا سید جلال الدین عمری کہندے نیں پئی '' جے وسیب دا اک حصہ ایہہ سمجھدا ہے جو اوہناں دے بالاں نوں دین دی تعلیم دتی جانی چاہیدی ہے تے ایہہ زور نہ دیو پئی جے تہاڈا نصاب اسیں نہ اپنایا تے تہاڈی تعلیم نوں تعلیم نہیں سمجھیا جاوے گا''۔

اوہناں موجب ' حکومت دا انج زور دینا اک طرحاں دا جبر ہے تے اقلیتاں دے اپنے ادارے چلاؤن دے مڈھلے حق دے خلاف ہے''۔

مسلمان تعلیمی اتبار نال ملک دیاں سب توں پچھونہیاں برادریاں وچوں اک نیں تے حکومت دی ایس نویں اسکیم نال مسلمان بالاں نوں بہت فائدہ ہون دی آس ہے تے اخیر مسلم مذہبی ستھاں ایہدی مخالفت کیوں کر رہیاں نیں۔ مولانا عمری ایہنوں کھولدیاں ہوئیاں کہندے نیں ''ایہدے وچ جیہڑے قاعدے تے قانون بنائے گئے نیں اوہ بس ایس تعلیم نوں تعلیم من دے نیں جیہڑی حکومت دے نصاب موجب ہووے۔ ایہدا مطلب ایہہ ہے پئی مسلماناں دے ہزاراں مدرسے تے مکتباں دی تعلیم نوں تعلیم نہیں سمجھیا جاوے گا''۔

ملک دی وڈی مذہبی ستھ جمعیت العلماء ہند دے وڈے آگو مولانا ارشد مدنی کہندے نیں پئی اوہ تعلیم دے خلاف نہیں پر کسے وی قدم تے دینی تعلیم تے اثر نہیں پینا چاہیدا۔ ملک دے دستور نے سانوں دینی تعلیم دا حق دتا ہے تے جے ایہنوں کوئی نقصان ہوندا ہے تے فیر اسیں کوئی راہ کڈھاں گے''۔

بھارت دے ماہراں موجب غریبی تے پچھڑا پن دور کرن لئی تعلیم اُچیچا مڈھلی تعلیم دے نظام نوں عام کرن تے زور دیندے رہے نیں۔ اوتھے دوجے پاسے مسلمان اُچیچا مذہبی اداریاں نے کدی منڈیاں کڑیاں دے اکٹھے پڑھن، تے کدی بینکاں توں لین کرن تے کدی کسے ہور پج نویں تعلیم دے خلاف سدھا ساہواں تے بالواسطہ فتوے دینے شروع کر دتے نیں۔

جمعیت العلماء ہند دے مولانا ارشد مدنی کڑیاں نوں نویں تعلیم دین دی مخالفت کردیاں ہوئیاں کہندے نیں ''منڈیاں تے کڑیاں دا اکٹھے رہنا پکی گل ہے غلط ہے۔ حکومت نوں چاہیدا جو اوہ کڑیاں لئی وکھرے سکول تے کالج کھولے جتھے اوہ اپنی عزت تے پاکدامنی دی راکھی کر سکن۔''

جنتا دل یونائیٹڈ دے آگو تے بہار دی نمائندگی کرن والے رکن پارلیمان علی انور دا کہنا ہے ''جو مذہبی ستھاں تے اوہناں دے آگو تعلیم بارے جیہڑے سوال چک رہے نیں اوہ فضول نیں''۔ اوہ اپنے بالاں نوں تے سب توں چنگی تعلیم دے رہے نیں تے چاہوندے نیں جو غریب بالاں نوں بس نماز روزہ تے کلام پاک حفظ کرن تیکر ہی پڑھن دتا جاوے۔ اوہ ایس لئی گھابر گئے نیں پئی جے ساریاں پڑھنا شروع کر دتا تے اوہناں دی سنن والا کون ہووے گا''۔

اوہ کہندے نیں مذہبی ادارے مسلماناں اُچیچا کڑیاں وچ ودھدے ہوئے تعلیمی رجحان توں گھابر گئے نیں تے ون سونے فتوے جاری کری جارہے نیں پر اوہناں دے فتویاں نوں ہن کوئی نہیں سندا۔

اقلیتی پربندھاں دے ماہر تے سوجھوان پروفیسر امتیاز احمد وی ایہناں خیالاں نوں من دے نیں ۔'' مولوی چاہندے نیں پئی بال مدرسیاں وچ ہی جان۔ اوہناں نوں لگدا پئی جے مسلمان نویں تعلیم پا لین گے تے اوہناں دا رعب گھٹ جاوے گا''۔

سرکاری حساب موجب مسلمان بالاں دی ادھی آبادی تعلیم توں دور ہے پر اجوکے سالاں وچ تعلیم دا رجحان جھبدے ودھیا ہے۔ نویں تعلیم دے حمیتیاں تے تجزیہ کاراں دا کہنا ہے پئی مولوی حضرات دی مسلماناں بارے وچار ایہو ہے پئی اوہناں تے اوہناں دا اثر پیا رہوے ایسے لئی اوہ لازمی تعلیم دے قانون دی مخالفت کر رہے نیں۔

پر جیہڑا مسلم وسیب ہے تے جیہڑے ہندوستانی وسیب وچ اوہ رہ رہے نیں ایہدے وچ بدلی اینی جھبدے ہے پئی پرانے خیالاں تے پرانے فتوے لے کے حیاتی نہیں لنگھائی جاسکدی۔