Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> امرت ویلے فرنا: ڈٹرایٹ شہر دا بھیڑا حال

امرت ویلے فرنا: ڈٹرایٹ شہر دا بھیڑا حال

جسپال سنگھ
July 30th, 2015
5 / 5 (1 Votes)

حال وچ ہی خبراں ملیاں ہین کہ امریکہ دے ڈٹرایٹ شہر دی گلیاں وچ آوارہ کتے پھر رہے ہین اتے اوہ کدی کدی چھوٹے بچیاں تے حملے وی کر دیندے ہین۔ دسیا جاندا ہے کہ لکھاں ہی لوک جیہڑے کہ ڈٹرایٹ چھڈ کے چلے گئے ہین، اوہ جان لگے اپنے پالتُو کتے کھلے چھڈ گئے سی۔ ایہناں کتیاں دی نفری ودھ گئی ہے اتے اوہ شہر دی گلیاں وچ آوارہ پھردے ہین۔ ڈٹرایٹ شہر نے بجٹ وچ کٹوتی کرکے کتے پھڑن والے وارڈناں نوں ہٹا دتا ہے۔ اس لئی ایہہ کتے ہزاراں ہی ویران عمارتاں وچ رہندے ہین اتے گلیاں وچ کھورُو پاؤندے ہین۔

اک ہور خبر مطابق ڈٹرایٹ شہر دی سرکار نے ہزاراں ہی لوکاں دے پانی دے کنکشن کٹ دتے ہین کیونکہ اوہناں کول پانی دے بل بھرن لئی پیسے نہیں ہین۔سٹی کونسل دا کہنا ہے کہ پین دا پانی لوکاں دا حق نہیں ہے اتے جے اوہناں کول بل بھرن لئی پیسے نہیں ہین تاں ایہہ اوہناں دا اپنا مسئلہ ہے۔

مینوں ڈٹرایٹ گئے کوئی 40 کو سال ہو گئے ہین۔ میریاں ڈٹرایٹ دیاں یاداں اک ٹھاٹھاں ماردے شہر دیاں ہین۔ تقریباً 40 سال ہوئے میں اس شہر وچ کجھ سماں رہیا سی۔ میرے اک دوست نے مینوں شہر چنگی طرحاں دکھایا سی۔ اوسدا والد اوس ویلے سٹی کونسل دا ممبر سی۔فورڈ، کرائیسلر اتے جنرل موٹرز وچ لکھاں ہی لوک کم کردے سن۔ ایہناں فیکٹریاں وچ تن شفٹاں چلدیاں سن اتے اوور ٹائم وی بڑا لگ جاندا سی۔ نال ہی موٹر کاراں نال جڑیاں کئی ہور صنعتاں وی لکھاں ہی لوکاں نوں روزگار دیندیاں سن۔ اوس ویلے ڈٹرایٹ دی آبادی تقریباً 20 لکھ سی۔

مینوں یاد ہے کہ میرے اک دوست نے اپنی کشتی وچ مینوں دریا دی سیر کرائی سی اتے دریا دے دوویں پاسے بہت ہی خوبصورت گھر دکھائے سن۔ آٹو ورکرز یونین دا پردھان وی اوہناں دناں وچ ایسے ہی محلے وچ رہندا سی جس وچ فورڈ موٹر کمپنی دا مالک رہندا سی۔مو ٹاؤن دے سنگیت نال پورا امریکہ گونجدا سی۔ ڈٹرایٹ اک خوش حال شہر سی۔ کیہا جاندا سی جو چیز جنرل موٹرز لئی چنگی ہے اوہ امریکہ لئی وی چنگی ہے۔اس لئی سرکاراں وی ایہناں نوں ارباں کھرباں ڈالراں دی امداد دیندیاں سن۔

پھیر ڈٹرایٹ نوں کیہ ہویا؟ کی گل ہے کہ اج ایتھے گلیاں وچ کتے پھر رہے ہین اتے لوکاں کول پانی دے بل بھرن لئی پیسے نہیں ہین؟ اس دی وجہ ایہہ ہے کہ اپنے منافعے زیادہ توں زیادہ ودھاؤن لئی تنے ہی وڈیاں کمپنیاں نے ڈٹرایٹ نوں چھڈ دتا اتے اپنیاں فیکٹریاں میکسکو، چین، برازیل اتے ہورناں ملکاں وچ لا لئیاں جتھے اوہ ڈٹرایٹ دے مقابلے مزدوراں نوں بہت ہی گھٹ مزدوری دیندے ہین۔ اس نال اوہناں دے منافعے بہت ہی ودھ گئے پر ڈٹرایٹ دا ناس ہو گیا۔ ڈٹرایٹ دی آبادی 20 لکھ توں گھٹ کے 7 لکھ دے قریب رہ گئی اتے روزگار دے وسیلے بالکل ہی گھٹ گئے۔ لوک ڈٹرایٹ چھڈن تے مجبور ہو گئے۔ کسے وی سیاسی لیڈر جاں ٹریڈ یونین نے ایہناں تناں کمپنیاں دے اس نکالے دا ورودھ نہیں کیتا اتے ناں ہی ایہہ زور پایا کہ جے تسیں ڈٹرایٹ چھڈنا ہے تاں اوہ ارباں کھرباں ڈالر واپس کرو جیہڑے کہ سرکاراں نے سبسڈی دے طور وچ تہانوں دتے ہین۔

ڈٹرایٹ دے لوکاں اتے مزدراں نوں ایہناں فیکٹریاں دا کنٹرول اپنے ہتھ وچ لے لینا چاہیدا سی اتے اوہ ایہہ فیکٹریاں چلا سکدے سن۔ پر ٹریڈ یونین دے لیڈر اتے سیاسی لیڈر سبھ موٹر کمپنیاں دے ہتھ چڑے ہوئے سن۔ اوہناں نے اس بارے چوں وی نہیں کیتی۔امریکہ دے کئی ہورناں شہراں دا وی ایہو حال ہے۔ بالٹیمور، کیمڈن، نیوئرک، ینگسٹاؤن، راچیسٹر وغیرہ بہت ایہو جہے شہر ہین جناں دی تباہی ہو چکی ہے۔

ڈٹرایٹ اتے ہورناں شہراں دی تباہی اس انسان ورودھی بندوبست اتے رشتیاں دی سچائی ظاہر کردی ہے اتے نویں اساری دی لوڑ ول اشارہ کردی ہے۔ اس سسٹم وچ کجھ وڈیرے صرف اپنے منافعیاں لئی قدرتی اتے منکھی سادھناں نوں ورت دے ہین اتے جے اوہناں دے منافعے کسے ہور جگہ تے زیادہ ودھدے ہین تاں اوہ اوتھے چلے جاندے ہین۔ ایہناں نوں لوکاں دی جاں کسے جگہ دی خوش حالی دی کوئی پرواہ نہیں ہے۔ سرکاراں وی ایہناں دے گھڑے دیاں ہی مچھیاں ہین۔

لوک اس تباہی توں سٹے کڈھ رہے ہین اتے نویں رشتیاں، نویں اساری اتے نویں طریقیاں بارے وچار وٹاندرے کر رہے ہین۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels