Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> پیرس معاہدے تے کھلوتے رہنا لوڑی دا جے۔سیکٹری جنرل اقوام متحدہ

پیرس معاہدے تے کھلوتے رہنا لوڑی دا جے۔سیکٹری جنرل اقوام متحدہ

وچار ڈیسک
May 31st, 2017

اقوام متحدہ دے سیکریٹری جنرل انتونیو گوتیرس آکھیا ہے کہ دنیا نوں موسمیاتی وٹاندرے توں پیدا ہون والے خطرے دا سامنا کرن لئی آپسی سانجھ بنانی ہو سی۔ نیو یارک وچ گل کردے ہوئے انتونیو گوتیرس نے آکھیا کہ جے کسی ملک نوں 2015 وچ متھے گئے پیرس معاہدہ تے شکوک نیں تے دوجے ملکاں تے لازم ہے کہ اوہ ایس تے ڈٹے رہن۔پنچ ماہ پہلے سیکریٹری جنرل دا عہدہ سنبھالن والے انتونیو گوتیرس دا موسمیاتی وٹاندرے دے حوالے نال ایہہ پہلا اہم سنیہہ سی۔ نیو یارک یونیورسٹی وچ گل بات کریندے ہوئے انہاں نے آکھیا ’’جے کسی ملک دی حکومت نوں لگدا ہے کہ دنیا نوں ایس معاہدے دی ضرورت نہیں ہے، تے دوجے ملکاں تے لازم ہے کہ اوہ اک مٹھ رہن تے متھے ٹیچے تے ڈٹے وی رہن‘‘۔ انتونیو گوتیرس دے مطابق انہاں دا پیغام بہت سادہ ہے۔ ’’ایہہ دنیا تباہی دے کنڈے تے ہے ا تے ایہہ گل لوڑی دی ہے کہ تمام ملک پیرس معاہدے تے عمل کرن۔‘‘ چیتے رہے کہ امریکی صدر ڈونلڈ ٹرمپ نے ست امیر ترین ملکاں دی جتھے بندی جی سیون وچ رلتی ملکاں دے الٹ پیرس معاہدے دی حمایت کرن توں انکار کر دتا سی ا تے آکھیا سی کہ اوہ بہوں چھیتی ایس ماملے تے امریکی ٹیچیاں بارے دسن گے۔ ایس توں پہلے وی صدر ٹرمپ کہہ چکے نیں کہ گلوبل وارمنگ اک دھوکہ ہے جس نوں چین نے بنایا ہے تے انہاں نے پیرس معاہدے توں منحرف ہون دی دھمکی وی دتی سی۔ امریکہ سنے140 توں زیادہ ملکاں پیرس معاہدے نوں منیا سی پر صدر ٹرمپ نے اپنی صدارتی مہم دے دوران ایس نوں رگیدے ہوئے آکھیا سی کہ ایہہ امریکہ دی معیشت لئی اک کوڑ کم ہے۔سوال ایہہ ہے کہ اخیر موسمیاتی وٹاندرے بارے گل کرن اتے پیرس معاہدے تے عمل کرن نال کس کس امریکی انڈسٹری نوں گھاٹے پین گے؟بس جے تہانوں ایس دا پتہ چل جائے تاں تسی جان سکدے ہو کہ ٹرمپ دے سہولتکار کون، کون نیں۔ایہہ وی آکھیا جاندا ہے کہ پیرس معاہدے توں انکار اک بہانہ ہے کہ ایس پریشر نال ٹرمپ ہوری یورپ والیاں کولوں مال بٹورنا چاہندے نیں۔انہاں تازہ تازہ سعودی عرب نوں ’’چویا‘‘ ہے اتے اوس نوں وی پہلاں تراہیا گیا سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels