Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> لڑائی کھل گئی۔ قطر، سعودی آمنے سامنے۔پاکستان وچ کھڈاری تیز، مسئلہ نرا قطر دا نہیں؟

لڑائی کھل گئی۔ قطر، سعودی آمنے سامنے۔پاکستان وچ کھڈاری تیز، مسئلہ نرا قطر دا نہیں؟

وچار ڈیسک
June 5th, 2017

پاکستان وچ قطریاں بارے کوڑ خبراں کیوں میڈیا وچ وادھو سن؟اخیر بلی تھیلے چوں باہر نکل آئی۔ ہن ایہہ سب نوں نظر آجائے گا۔ پچھلے سال اینج ہی سفارتکاریاں نوں لانبھے رکھدے ہوئے ایران دے منہ تے کلبھوشن ماریا گیا سی کہ اوس مگر کہانی ہور سی۔ ایہہ سب اک ہی کھیڈ دا حصہ۔ کجھ لوک مڈل ایسٹ نوں فرقہ وارانہ جنگ ول لیجانا چاہندے نیں تے کجھ ایس توں بچنا چاہندے نیں۔مسئلہ نرا قطر دا نہیں سگوں ایس ویلے اومان، قطر، ترکی تے ایران نوں ایس سعودی امریکی اتحاد بارے شدید تحفظات نیں۔ایران دے خلاف تے فرقہ وارانہ ہتھیار ورتیا جا سکدا ہے پر قطر تے اومان ، ترکی دی موجودگی تے کیہہ جواز گھڑیا جائے گا؟پاکستان وچ کجھ کھڈاری ایس لڑائی نوں اپنے مفاداں پاروں ورتنا چاہندے نیں۔ایہہ اک چومکھی لڑائی ہے اتے ضیاالحق وی 1970دے اخیری سالاں وچ اجہی لڑائی نوں ملکی پدر تے اپنے ویریاں خلاف ورتیا سی جس پاروں پاکستانی سوسائٹی تباہ ہوئی سی۔نرے امریکہ دے فیدے لئی اسلامی ملکاں تے مسلم فرقیاں نوں لڑایا گیا سی۔کیہہ اساں مڑ اوہی کھیڈ رچانا چاہندے ہاں؟ اج ترکی، قطر ،ایران ،اومان ہی نہیں سگوں روس تے چین وی سعودی امریکی اتحاد دے خلاف نیں۔ نکے فیدے لئی وڈے پواڑے پانا کس دا مفاد ہے، گھٹ و گھٹ، پاکستان دا تے نہیں۔
سعودی عرب، مصر بحرین تے متحدہ عرب امارات نے قطر نال سفارتی سانگے توڑن دا علان کر چھڈیا ہے۔ فصائی رستے وی بند کیتے نیں۔پر قطر کول ایران تے ترکی دے رستے موجود نیں۔قطر جیہڑا ایران سعودی عرب وچ صلح تے امن لئی پچھلے اک سال توں سفارتی پدر تے کم کررہیا سی اوس نوں سعودی عرب نے ات گرداں دا حامی آکھ دتا ہے۔ ہن تساں سمجھ لو پئی پاکستانی میڈیا تے قطری شہزادیاں تے قطری شکاریاں بارے کون کیوں خبراں پھیلاندا رہیا ہے۔ پاکستان وچ تے عربی شہزادے کویت،متحدہ عرب امارات ، سعودی عرب توں شکار وغیرہ لئی آندے ہی رہندے سن کہ رحیم یار خان دے عربی محلاں دی داستاناں سب جاندے نیں پر خبراں دا نشانہ قطری ہی بنائے گئے۔ دبئی گوادر پاروں پاکستان دے خلاف ہے اتے بلوچ لبریشن آرمی دے یو اے ای نال سانگیاں بارے ہر مکرانی جاندا ہے۔ پر ہن اوس نوں وی موقعہ ملیا ہے کہ سعودی عرب دی آڑ وچ اپنے مفاداں پاروں پاکستان وچ انہاں قوتاں خلاف کم کرے جیہڑیاں قطر دے نال نیں۔ ہن سمجھ آندی ہے جنرل پاشا نوں دبئی وچ نوکری کیوں ملی سی اتے اوہ پاکستان وچ کس دا ایجنڈا چلا رہیا سی۔ ایس موقع تے امریکہ بڑی ہشیاری نال اپنے آپ نوں نیوٹرل ثابت کررہیا ہے پر اصل وچ سعودی عرب نوں ایس کم تے ٹرمپ ہی لایا ہے۔عربی میڈیا وچ آرٹیکل چھپ رہے نیں کہ ٹرمپ دے دورے بعدوں سعودی امریکی اتحاد وچ ڈڑاڑاں پئے چکیاں نیں۔ہن جنگ کھلی شروع ہو چکی ہے کہ ہن پاکستان نوں اپنے کردار بارے کھل کے گل کرنی ہوئے گی۔وزیراعظم نوں ایس سی او توں واپسی تے پارلیمنٹ دا سانجھا سیشن بلانا چاہیدا ہے تانجے پتہ چلے کہ کہیڑی جماعت، کیہہ گل کردی ہے۔سعودی عرب الزام لایا ہے کہ قطر خطہ وچ انتشار پھیلا رہیا ہے۔ قطر خطہ وچ کیہڑا نتشار پھیلا رہیا ہے؟ کیہ سعودی امریکی اتحاد دے ایران مخالف ایجنڈے توں وڈا انتشار وی ہے ایس ویلے ؟


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels