Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> مہاراجہ رنجیت سنگھ دی 178ویں برسی:بھارت یاتریاں نوں کیوں روکیا؟سکھاں تے شک کیوں؟نواں حکمنامہ

مہاراجہ رنجیت سنگھ دی 178ویں برسی:بھارت یاتریاں نوں کیوں روکیا؟سکھاں تے شک کیوں؟نواں حکمنامہ

وچار ڈیسک
June 29th, 2017

لگدا ہے مودی تے بی جے پی والے پنجاب وچ ہار نوں بھلے نہیں اتے ہن بہانیاں نال غصہ کڈ رہے نیں۔گردوارہ پربندھ کمیٹی دے سیکٹری ہرچرن سنگھ ہوراں دسیا کہ مرکزی سرکار ایس دی اجازتاں نہیں دتیاں اتے دلی سرکار سیکورٹی دا مسئلہ کھڑا کر دتا۔شرومنی گردوارہ پربندھ کمیٹی دے ٹربیون(چندی گڑھ) وچ چھپے بیان توں پتہ چلدا ہے کہ مودی سرکار نے اک نواں حکمنامہ جاری کیتا ہے اتے ایہہ حکمنامہ انہاں ایس جی پی سی والیاں نوں دتا سی۔ایہہ حکمنامہ نرے سکھاں لئی ہے یا ہر بھارتی لئی جیہڑا پاکستان جانا چاہندا ہے؟ ایس بارے پوری گل میڈیا نہیں چھاپی۔ایس وچ لکھیا ہے کہ پاکستان جاون والے سکھ یاتری اپنی سیکورٹی تے آپ ذمہ وار ہون گے۔ایہہ گل آپ ہرن چرن سنگھ آکھی۔سوال ایہہ ہے کہ کیہہ بھارتی ریاست ایڈی کمزور ہو چکی ہے کہ اوہ اپنے شہریاں نوں سیکورٹی وی نہیں دے سکدی؟پاکستان نال بھارت دے سفارتی سانگے نیں۔پاکستان وچ بھارت دا سفارت خانہ ہے۔مسئلہ پاکستان ہے یا سکھ؟ایس حکمنامے دا مطلب تے ایہہ ہے کہ مودی سرکار نوں سکھاں تے اعتبار نہیں اتے اوہ انہاں تے شک کردے نیں۔اک مہینے پہلاں وی جداں سکھ یاتری گرو ارجن دیو مہاراج دے دیہاڑ تے پاکستان جانا چاہندا سی تے اوس نوں سیکورٹی دے بہانے پاروں روکیا گیا سی۔جداں اٹاری تے سکھ یاتریاں نوں روکیا گیا تاں انہاں دلی سرکار خلاف وکھالا کیتا۔میڈیا نال گل کردے ہرچرن سنگھ گھابرے لگدے سن کہ انہاں وکھالے دی ذمہ واری فیروز پور دی اک این جی او تے پا دتی۔انہاں آکھیا کہ وکھالے لئی اک این جی او فیروز پور توں بندے لیائی سی۔بھارتی میڈیا وچ ایس خبر توں کنی کتراندا نظر آیا پر بی بی سی تے وائس آف امریکہ سنے عالمی پدر تے اوہ ایس خبر نوں کنج روک سکدے سن۔اجہی حرکتاں توں مودی سرکار بھارت دی آپ نموشی کر رہی ہے کیونجے سکھ برادری تے یورپ، امریکہ، کنیڈا ہر تھاں پھیلی ہوئی ہے۔سکھاں دی مقدس تھاواں پاکستان وچ نیں تے کیہہ اوہ سکھاں دے پاکستان جاون نوں ہمش لئی ڈکنا چاہندے نیں؟ لہور دربار دے مہاراجہ انجیت سنگھ دی وجہ توں انگریز پورے 50سال پنجاب کشمیر وغیرہ تے قبضہ نہیں کرسکیا سی۔دنیا بھر وچ پنجاب تے مہاراجہ نوں انگریز خلاف وڈا مورچہ سمجھیا جاندا سی تاں مارے نپولین دی فوجاں دے ہارن بعدوں جرنیل مصر، ایران نوں چھڈ کے پنجاب نوکریاں کرن آئے سن۔ہن جے یاتری اوس دی برسی لئی جا رہے سن اتے پاکستان انہاں لئی ٹرین گھلی سی تے دلی سرکار نوں کیوں مڑوڑ اٹھے؟ایہہ سب اک کمزور ریاست دا بوتھا ہے جیہڑی آپدا مذاق آپ اڑواندی ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels