Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> ہندو برادری:سب توں وڈی اقلیت پر سب توں غریب۔وائس آف امریکہ

ہندو برادری:سب توں وڈی اقلیت پر سب توں غریب۔وائس آف امریکہ

وچار ڈیسک
August 16th, 2017

اک زمانہ سی جداں شودراں تے مصلیاں نوں کوئی نہیں پچھداسی پر اج پاکستان دے ہندو تے مسیحی انہاں نوں اپنا اپنا حصہ بنا رہے نیں۔کجھ لوک انہاں نوں مسلمان کرن وچ وی رجھے نیں۔پر اوہ رہندے شودر تے مصلی ہی نیں کیونجے اوہ غریب نیں۔پرانی مردم شماری پاروں ہندو1.60تے مسیحی1.59سن کہ دوناں دا تناسب اک جیہا ہی ہے۔پر خبر وچ غلطی پاروں چھ فیصدی ہندواں دی گل پرانی مردم شماریاں پاروں دسیا گیا۔پاکستانی ہندو کس حالتاں وچ رہ رہے نیں اوہ تساں آپ پڑھو تے ایس بارے اک وار مڑ جھات پاؤ۔ہن تساں وائس آف امریکہ دی خبر پڑھو۔
پاکستان دی سب توں وڈی اقلیت ہندو برادری ہے ا تے ایہو اوہ برادری ہے جو سب توں زیادہ غربت دا شکار ہے۔ حد تے ایہہ ہے کہ ہندو باقی سارے اقلیتیاں دے مقابلے وچ وی سب توں غریب تے بدحال ہے۔ 1998 دی مردم شماری دے مطابق پاکستان دی کل آبادی دا چھ فیصد توں کجھ زیادہ ہندواں تے مشتمل ہے۔ ہندو چاراں صوبیاں وچ آباد نیں جداں کہ انہاں دی اکثریت صوبہ سندھ وچ رہندی ہے۔ پاکستان ہندو کونسل جو ہندواں دی سب توں وڈی غیر سرکاری تنظیم ہے تے انہاں دے فلاح و بہبود لئی پیش پیش رہندی ہے ایس دے صدر انجینئر ہوت چند کرمانی نے وائس آف امریکہ نال گل بات کیتی ہے۔۔انہاں دا آکھنا ہے پئی تھر پارکر، بدین، سکھر، حیدر آباد، جامشورہ، میرپور خاص تے جیکب آباد وغیرہ وچ ہندواں دی وادھو گنتری رہندی ہے تے ایہہ سب دی غربت دی لکیر توں وی کتھے تھلے رہ کے زندگی گزارن تے مجبور نیں۔ انہاں دی فلاح و بہبود انسانیت دا پہلا تقاضہ ہے۔ تھر پار کر، اسلام کوٹ، مٹھی تے دوجے علاقیاں وچ چلے جان ،ایتھے زندگی قطار در قطار روندی ملے گی۔ سرکاری اعداد و شمار دے مطابق وی تھر وچ بچیاں دی موتاں غربت تے گھٹ خوراک دی وجہ توں ہوندیاں نیں۔ سابق وزیراعلیٰ سندھ سید قائم علی شاہ دا وی ایہو کہنا ہے کہ تھر وچ وڈے پیمانے تے بچیاں دی ہلاکت دی اصل وجہ غذائی قلت ہے۔اج وی اک وڈا مسئلہ ایہو ہے۔ سال 2016 وچ اک ہزار توں وادھو بچے ہلاک ہوئے۔ انہاں دی اکثریت ہندو بچیاں دی سی۔ قحط، غربت، گھٹ خوراکی تے غذائی قلت بچیاں نوں پنج سال دا وی نہیں ہون دیندی تے اس عمر توں پہلے ہی بمار ہو کر پورے ہو جاندے نیں۔ بماریاںیا تے انہاں نوں انتہائی لاغر کردیندیاں نیں یا اوہ ایس دنیا توں روندے سسکدے ٹر جاندے نیں۔ مسلم لیگ ن دے رہنما، قومی اسمبلی دے اقلیتی رکن تے پاکستان ہندو کونسل دے پیٹرن چیف ڈاکٹر رمیشن کمار وانکوانی دا کہنا ہے کہ ساڈے بچیاں دے مسائل بچپن دے نال ہی ختم نہیں ہوجاندے سگوں بلوغت وچ پہنچ کے مسائل وی نویں روپ وچ آ کھڑے ہوندے نیں۔ ہندو مت وچ شادی اک فریضے دی حیثیت رکھدی ہے پر ایہہ فریضہ ادا کن لئی وی پیسہ چاہیدا ہوندا ہے۔ جداں کہ برادری دی غربت دا ایہہ عالم ہے کہ کُڑیاں دے کول ہی نہیں سگوں مُنڈیاں کول وی ویاہ کرن لئی پیسے نہیں ہوندے تے ایہو وجہ ہے کہ پاکستان ہندو کونسل ہر سال ہزاراں شادیاں دا خرچہ آپ چکدی ہے۔
وائس آف امریکہ نال گل دے دوران ضلع بدین توں تعلق رکھن والے اک نوجوان مہیش نے دسیا سندھ چ ہندواں دی غربت دی اصل وجہ روزگار دی کمی ہے۔ شہراں وچ کراچی، حیدر آباد تے میرپور خاص نوں چھڈ کے زیادہ تر علاقیاں وچ کم ہے ہی نہیں۔ نِکے نِکے کماں لئی پڑھیا لکھیا ہونا ضروری ہے تے ساڈی برادری وچ پڑھائی دی عمر وچ کم تے جانا پئے جاندا ہے۔ ماں پئیو دے کول اینا پیسہ نہیں ہوندا کہ اوہ پڑھا سکن۔ ایس لئی زیادہ تر افراد خاکروب نیں۔ کیوں کہ ایس کم نوں سکھن لئی نہ پہلے پیسہ خرچ کرنا پیندا ہے تے نہ ہی تجربہ چاہیدا ہے۔ ایس لئی ساڈی نوجوان نسل پشت در پشت ایہہ کم کردی چلی آرہی ہے۔ مہیش دی گل ایس حوالے توں وی سچ دا آئینہ ہے کہ کراچی وچ وڈی وڈی جینیوریل سروسز فراہم کرن والی درجناں کمپنیاں کھل گئیاں نیں تے انہاں سب وچ زیادہ تر افراد ہندو برادری توں رکھدے نیں۔ پاکستان ہندو کونسل دے صدر ہوت چند کرمانی نے وائس آف امریکہ نال گل بات وچ دسیا پئی ہندو برادری دے کول روزگار دے زیادہ موقع دین دی سکت نہیں۔ اندرون سندھ یا تے اوہ مزدوری کردے نیں یا تے فیر رکشے وغیرہ چلاندے نیں۔ ایہہ نِکے موٹے کماں توں جو آمدنی ہوندی ہے ایس توں دو وقت دی روٹی تے مل سکدی ہے پر زندگی دی باقی خاہشات کدی پوری نہیں ہوسکدیاں۔
اندرون سندھ وچ غربت دے سبب ہندو برادری دے کول رہن نوں کچے یا نیم پکے مکان وی گھٹ نیں۔ زیادہ تر لوک جھونپڑیاں یا فیر کچی مٹی دے بنے ہوئے خاص انداز دے نِکے نِکے گھراں وچ رہندے نیں۔ ایہہ مکان بعض اوقات اینے نِکے ہوندے نیں کہ پِیراں نوں پھیلاؤ تے دیوار نال سر لگدا ہے۔ غربت دے سبب نال لوکاں نوں زندگی دی بنیادی سہولیات تک موجود نہیں۔ لکھاں لوک صبح سویرے اٹھ کے رفع حاجت لئی گھر توں میلاں دور پیدل سفر کردے نیں۔ حکومت سندھ دی سینی ٹیشن پالیسی ،جس نوں’’ صاف ستھرا سندھ‘‘ دا ناں دتا گیا ہے ایس دے مطابق 2020 تک وی 70 فیصد دیہات دے صرف 13 ترجیحی اضلاع وچ بیت الخلا دی سہولت حاصل ہوئے گی۔ جداں کہ 100 فیصد علاقیاں تے 100 فیصد اضلاع نوں ایہہ سہولت کدوں نصیب ہوئے گی ایس دا اندازہ لا کے ہی حیرتاں وچ اضافہ ہوجاندا ہے۔ سندھ دی رہائشی ایڈووکیٹ روپ مالا سنگھ نے وائس آف امریکہ نال خصوصی گل بات وچ آکھیا کہ پاکستان دے قیام نوں 70 سال بیت گئے نیں پر ہندو برادری پاکستان بنن توں وی پہلے توں ایتھے مقیم ہے تے ایتھے پیدا ہوئی اتے ایتھے پلی ودھی۔ ہجرت دا موقع ملن دے باوجود کتھے نہیں گئی۔ ایس وطن توں ایس برادری دی محبت دا منہ بولدا ثبوت ایہو ہے۔ سانوں پاکستان نال پیار ہے ،سی تے رہے گا۔ ایہو ساڈی دھرتی ماں ہے۔ اسی ایتھے ہی جنم لتا تے اسی تے آخری ساواں نوں وی ایتھے ہی لواں گے۔ پچھلے کجھ سالاں وچ غربت توں تنگ آئے کجھ ہندو خانداناں نے بھارت ہجرت وی کیتی سی۔ ایہہ خاندان ہن وی اوتھے مقیم نیں۔ ایہہ گل دوجی ہے کہ اوتھے جاکے وی خشحالی اک حسین خواب ہی رہی سگوں انہاں دی حالت پہلے توں وی بھیڑی ہوگئی۔ انہاں نوں شک دی نگاواں نال بطور ایجنٹ ویکھیا جاندا ہے۔ انہاں نو نہ تے نوکریاں ملدیاں اتے کم کاج دے موقع نہ ہون دے بربر نیں۔ اینج اوہ نہ ادھر دے رہے نہ اودھر دے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels