Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> ٹرمپ نوں کون روکے گا؟ سٹیبلشمنٹ ناکام، بیانیہ بدلو؟

ٹرمپ نوں کون روکے گا؟ سٹیبلشمنٹ ناکام، بیانیہ بدلو؟

August 23rd, 2017

سٹیبلشمنٹ دی ہٹ دھرمیاں پاروں ہک وار فیر پاکستان دی اوکڑاں وادھو۔افغانستان تے بھارت بارے پارلیمنٹ وچ بحثاں لوڑی دیاں نیں۔ایہہ پاکستان دی افغانستان تے بھارت بارے پالیسی دی ناکامی دا دیہاڑ ہے اتے ہن فارن آفس تے سیکورٹی اداریاں نوں ایس بارے پارلیمنٹ نوں بریفنگ دینی چاہیدی ہے۔سٹیبلشمنٹ نوں وزیراعظماں نوں کڈہن تے ڈھاون توں ویل ملے گی تاں اوہ پاکستان دے متعلق سوچ سکن گے۔اساں سعودی امریکی اتحاد وچ اپنا بندہ گھلیا پر لبھیا کیہہ؟ کیوں دنیا ساڈے تے اعتبار نہیں کردی؟
28جولائی جیسے فیصلیاں نے پاکستان وچ انتشاری سیاست نوں ودھایا اتے دنیا وچ ایس نوں کسے نے نہیں سراہیا۔چین تک دے اخباراں نے ایس فیصلے نوں چینی سرمایہ کاری لئی بھیڑا شگون آکھیا۔پر سٹیبلشمنٹ دا اک دھڑا ہٹ دھرمی تے کھلوتا ہے۔افغانستان، بھارت حتاکہ ایران نال وی ساڈے سانگے خراب۔سعودی عرب تے یو اے ای آپ پھسے نیں، اوہ سانو کیہہ دے سکدے نیں؟ترکی، قطر، روس نال اساں کھل کے کیوں نہیں کھلوندے؟ واشنگٹن تے لندن ساڈے نال ہورے کڈہے چر توں سوٹی تے گاجر دا کھیڈ رچا رہے نیں پر اساں پھانسیاں دے کے یورپی یونین نوں وی پراں کر لتا ہے۔ سوال ہی سوال نیں پر اساں پارلیمنٹ جان توں گھابردے ہاں۔سب توں پاپولر لیڈر نوں کڈھ کے اساں پاکستانی میڈیا نوں تے چپ کروا سکدے ہاں پر دنیا وچ ساڈے بارے کیہہ پیغام گیا؟مشرف نوں دڑایا تے چونویں وزیراعظم نوں اقامے وچ پھسایا کہ دنیا ساڈے تے ہسدی ہے۔جو ترے دن عدالتاں وچ ہویا اوس بار تے بینچ نوں ہور ایکسپوز کر دتا۔ٹرمپ نوں رگیدن نال کجھ نہیں ہوئے گا سگوں اپنی منجھی تھلے ڈانگ پھیرنی ہوئے گی۔اپنے پرانے بیانیاں نوں بدلنا ہوئے گا۔پاکستان دی مضبوطی، پارلیمنٹ دے تگڑے ہون نال مشروط ہے۔امریکہ مخالف بیاناں نال ٹرمپ نوں روکیا نہیں جاسکدا سگوں ایس لئی سب توں پہلاں اپنے بیانیاں تے پارلیمنٹ وچ بحثاں کروانیاں پین گیاں جس وچ سٹیبلشمنٹ، سیکورٹی ادارے تے ججاں نوں رل مل بیٹھنا ہو سی۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels