Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> شہر شہر ملک ملک >> سٹریٹجک اثاثے اتے سیاستاں:پاسدارانِ انقلاب تے پابندی دا منہ توڑ جواب دواں گے: ایران۔بی بی سی

سٹریٹجک اثاثے اتے سیاستاں:پاسدارانِ انقلاب تے پابندی دا منہ توڑ جواب دواں گے: ایران۔بی بی سی

وچار ڈیسک
October 10th, 2017

ایرانی لیڈر علی اکبر والائیتی دا آکھنا ہے پئی پاسداران ساڈا اثاثہ نیں اتے پاسداران تے حملے دا مطلب ایران تے حملہ ہے۔ایرانی نیوزایجنسی انہاں دا بیان چھاپیا ہے۔چیتے رہے پئی سپاہ پاسداران اسلامی انقلاب یعنی آئی آر جی سی شدت پسند ایرانی جتھے بندی ہے جس دے امیدوار نوں پچھلے دناں ایرانی چوناں وچ روحانی ہوراں شکستاں دتیاں سن۔علی اکبر ہوراں آکھیا پئی پاسداران خطہ وچ ایران تے ہمسائیاں وچ امن دے توازن لئی ضروری نیں۔ پر سوال تے ایہہ ہے پئی امن دے ضمانتی کون نیں؟حیران نہ ہونا ٹرمپ وانگ پاسداران وی ایٹمی معاہدے دے خلاف ہی نیں۔ایس لڑائی دے ودھن نال اک پاسے روحانی دی اوکڑاں ودھن گیاں،عالمی ایٹمی معاہدہ گھجل ہوئے گا سگوں ات گردیاں ودھن گیاں۔پر بی بی سی دی ہشیار رپورٹنگ اگ تے تیل سٹ رہی ہے۔ ہن تساں ہشیار خبر پڑھو۔

ایران ولوں ایہہ بیان اک ایسے موقعے تے سامنے آیا ہے جداں ایس گل دا امکان ہے کہ صدر ڈونلڈ ٹرمپ رواں مہینے ایران دے جوہری معاہدے دی توثیق نہیں کرن گے۔ تاہم امریکہ ایس معاہدے توں وکھرا نہیں ہوئے گا۔ جوہری معاہدے دی توثیق نہ کیتے جان تے امریکی کانگریس ایران تے پابندیاں عائد کرسکدی ہے۔ ایس گل دا وی امکان ہے کہ صدر ٹرمپ ایران دے خلاف سخت پالیسی اپناندے ہوئے ایران دی طاقتور ترین سکیورٹی فورس پاسدارانِ انقلاب نوں دہشت گرد تنظیم قرار دے دین۔ چیتے رہے کہ امریکی صدر ٹرمپ نے قوام متحدہ دی جنرل اسمبلی توں اپنے پہلے خطاب وچ ایران تے کڑی تنقید کیتی سی تے جوہری معاہدے نوں امریکہ دا بدترین تے یکطرفہ معاہدہ قرار دتا دتا سی۔ ایران دی وزارتِ خارجہ دے بلارے بارہم قاسمی نے آکھیا کہ سانوں امید ہے کہ امریکہ ایہہ سٹریٹیجک غلطی نہیں کرے گا۔ ایران دی سرکاری خبر رساں ایجنسی دے مطابق بلارے آکھیا کہ امریکہ نے جے اینج کیتا تے ایران دا ردعمل وی فیصلہ کن، تگڑا تے منہ توڑ ہوسی تے امریکہ نوں سارے نتائج دا سامنا کرنا پئے گا۔ چیتے رہے کہ پاسداران انقلاب توں وابستہ مختلف افراد تے کمپنیاں پہلے ہی امریکہ دی غیر ملکی دہشت گرداں دی فہرست وچ شامل نیں۔ پاسدارانِ انقلاب دے کمانڈر محمد علی جعفری نے آکھیا کہ جے امریکہ دی پاسدارانِ انقلاب نوں دہشت گرد قرار دین دی احمقانہ اقدام دی خبر درست ہے تے فیر ایران دے نزدیک امریکی فوجاں اتے شدت پسند تنظیم دولتِ اسلامیہ اک نیں۔ انہاں نے آکھیا کہ ایران تے مزید پابندیاں عائد کرن توں مستقبل وچ امریکہ نال مذاکرات دا رستہ بند ہوجائے گا تے خطے وچ امریکہ نوں عسکری اڈے ایران دی میزائلاں دی پہنچ توں باہر بنانے ہون گے۔ دوجے پاسے مغربی ملکاں دا کہنا ہے کہ امریکہ دی پاسدارانِ انقلاب تے پابندی توں عراق تے شام وچ شدت پسند تنظیم دولتِ اسلامیہ دے خلاف تہران تے واشگٹن دی مشترکہ کاروائی وچ کمی آئے گی۔ فرانس دا کہنا ہے کہ پاسدارانِ انقلاب تے پابندی توں خطے وچ دہشت گردی وچ اضافہ ہوئے گا۔ جداں کہ جرمنی دا کہنا ہے کہ امریکہ دے ایس اقدام توں مشرقِ وسطیٰ دی سکیورٹی صورتحال مزید خراب ہوسکدی ہے۔ یاد رہے کہ ایران تے مغربی ملکاں دے وچکار متھے گئے ایٹمی معاہدے پاروں ایران اپنے ایٹمی پروگرام نوں 2025 تک ڈکن تے راضی ہویا سی۔ ایٹمی توانائی توں متعلق عالمی نگران ادارے نے آکھیا ہے کہ ایران معاہدے دی شرطاں دی پاسداری کررہیا ہے۔


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels