برطانوی پارلیمنٹ دے ممبراں دے اک لکویں سروے وچ ایہہ گل کھلی ہے کہ پارلیمنٹ دے ہر پنجاں وچ اک ممبر اپنی عام زندگی دے دباء پاروں ذہنی مریض ہے۔
ایس بارے جیہناں کولوں سوال پچھے گئے اوہناں نے اپنے جتناں نوں دسن توں جھجھک وکھائی کیوں جو اوہناں نوں بدنامی تے تعصب دا ڈر ہے۔
ساریاں جماعتاں دے پارلیمانی گروپ ولوں ذہنی حالت بارے 94 اسمبلی ممبراں، 100 لارڈاں اتے 151 پارلیمانی سٹاف دے بندیاں کولوں سوال پچھے گئے سن۔ سروے دا تت ایہہ نکلیا کہ 25 فیصد توں ودھ نوں ذہنی مسئلے ہین جدوں کہ اسمبلی ممبراں وچوں 86 ممبراں آکھیا کہ اوہناں دی نوکری بڑی ذہنی دباء والی ہے۔
پارلیمانی گروپ دے ایہہ رپورٹ بڑی خطرناک ہے کیوں جو جے ذہنی حالت بارے قانون ہیٹھ اوہناں تے پابندیاں لگیاں تے اوہناں نوں چھ مہینیاں لئی اپنیاں نوکریاں چھڈنیاں پئے جاون گیاں۔
لبرل ڈیموکریٹک پارٹی دے ممبر مارک اوٹن دا آکھنا ہے کہ اوہناں دی نجی زندگی پریس وچ آؤن مگروں اوہناں نوں دماغی دباء دے روگ دا علاج کرواؤنا پیا سی۔ اوہناں نے اک اخبار نوں دسیا ہے کہ '' سچی گل تے ایہہ ہے کہ میرے سنے بوہت سارے اسمبلی ممبر ہین جیہناں نوں ایہہ نوکری بوہت ذہنی دباء والی لگدی ہے۔''
لیبر پارٹی دے اک ممبر ہاورڈ سٹوٹ دا آکھنا ہے کہ اوہناں نے دوجے ممبراں نوں صلاح دتی ہے کہ اوہ ایس بارے کوئی مدد لین۔ '' بوہت سارے لوکاں نوں ایس گل دا نہیں پتہ کہ اوہناں دے اسمبلی ممبر کنے ذہنی دباء ہیٹھ ہین۔ پر ایہہ کجھ ہور دوجیاں نوکریاں جنی دباء والی وی نہیں ہے۔''
