اسلام آباد ہائیکورٹ نے گواچی ہوئی ڈاکٹر عافیہ صدیقی نوں دھگانے بندی بناؤن دے الزاماں تے وزارت داخلہ توں جواب منگ لیا ہے۔ بدھ نوں وزارت داخلہ دے سیکرٹری سید کمال شاہ نوں گھلے گئے اک نوٹس وچ چیف جسٹس سردار محمد اسلم دی عدالت نے اوہناں نوں کہیا ہے جو اوہ بیرسٹر اقبال جعفری ولوں لائے گئے الزاماں دا جواب دیون جنہاں وچ کہیا گیا ہے جو ڈاکٹر عافیہ صدیقی پاکستانی تے امریکی خفیہ اداریاں دی پکڑ وچ ہین۔
عدالت نے بیرسٹر اقبال جعفری ولوں دائر کیتی گئی درخواست تے مڈھلی سنوائی توں مگروں عدالت دی کاروائی نو ستمبر تیکر اگے پا دتی تے ایس وچکار سیکرٹری داخلہ نوں کہیا گیا ہے اوہ پٹیشنز ولوں چکے گئے نکتیاں دے جواب دو ستمبر تیکر عدالت وچ جمع کروان۔
ڈاکٹر عافیہ صدیقی نوں دھگانے بندی بناؤن دی درخواست وچ بیرسٹر اقبال جعفری نے سیکرٹری داخلہ کمال شاہ دے وسیلے نال پاکستان دے انٹیلی جنس اداریاں نوں امریکی سفارتخانے دے قنونی مشیر راہیں امریکی انٹیلی جنس اداریاں نوں دھر بنایا ہے۔
درخواست وچ ایشین ہیومن رائٹس کونسل دی اک رپورٹ دا حوالہ دتا گیا جیس موجب ڈاکٹر عافیہ نوں پاکستانی تے امریکی انٹیلی جنس ایجنسیاں نے گرفتار کرن ولوں منیا سی پر مگروں ایس توں انکار کر دتا سی۔
ڈاکٹر عافیہ اپنے تن نکے نیانیاں دے نال کراچی توں پنج سال پہلوں گواچیاں سن۔اوہناں تے القاعدہ دی مدد کرن دا الزام ہے۔ انسانی حقاں دی ایشیائی ستھ نے خیال ظاہر کیتا ہے جو ڈاکٹر عافیہ نوں افغانستان وچ بگرام وچ بنی امریکی جیل وچ قید رکھیا گیا ہے جتھے چھ سوپنجاہ نمبر دے ناں توں مشہور ایس قیدی دے نال غیر انسانی ورتارا رکھیا جا رہیا ہے۔
