روس وچ اجکل ویاہواں دی دوڑ لگی ہوئی ہے کیوں جو لوک اٹھ اگست سن دو ہزار اٹھ نوں ویاہ دا موقع گوانا نہیں چاہندے۔ لوکاں داخیال ہے اٹھ اگست دو ہزار اٹھ اوہناں لئی مبارک ثابت ہووے گی۔
ماسکو وچ مقامی اخباراں موجب اٹھ اگست نوں ویاہواں دے اندراج دے دفتر ساری رات کھلے رہن گے کیوں جو عام دناں دے مقابلے وچ ایس دن ہوون والے ویاہواں دی گنتی دو تہائی ودھ ہووے گی۔
شہر دے رجسٹری آفس دی ترجمان سمر نوفا موجب عام طور تے سیالاں وچ جمعے دے دیہاڑ سو توں اک ہزار وچکار ویاہ ہوندے ہین۔ شہر دے پربندھیاں نے ایس دیہاڑ کم دے ویلے ودھا دتے ہین تے نال ہی کھان دا وقفہ وی مکا دتا ہے۔ 'اسیں لوکاں نوں راضی کرن دی بھرویں کوشش کراں گے تے نال ہی بھکانے وغیرہ لا کے دفتراں نوں سجاواں گے وی۔'
پچھلے ورہے ست جولائی نوں وی ہندسیاں دا انج دا ملاپ ہویا سی تے ایس دیہاڑ وی بوہت ویاہ ہوئے سن۔ کجھ شہراں وچ تے ویاہواں دیاں عرضیاں تن گنا ودھیاں ہین تے سارے ہوٹل تے ویاہ وچ ورتیاں جاون والیاں وڈیاں گڈیاں پہلوں ہی بک ہو گئیاں ہوئیاں ہین۔ ٹامسک وچ تے مقامی پربندھیاں نے شہر دے چوک وچ سانجھا جشن مناون دا اعلان کیتا ہے۔
پر اخبار کومرسانت موجب حساب کتاب نال ایہہ ثابت نہیں ہوندا جو ست جولائی نوں ویاہ کرن والیاں لئی ایہہ دیہاڑا بوہتا 'لکی ' ثابت ہویا۔
پچھلے ورہے ست جولائی نوں جنہاں لوکاں ویاہ کیتے سن اوہناں وچوں پنجھی فیصد نوں طلاق ہو گئی ہے'۔ پر اٹھ اگست نوں ویاہ ہی نہیں ہوون گے چین وچ اولمپکس دا افتتاح اٹھ اگست نوں اٹھ وج کے اٹھ منٹ تے ہووے گا۔
