روس نوں کیوبا نال مُڑ سانگے اسارنے چاہیدے نیں: پیوٹن
وچار ڈیسک
August 5th, 2008
روسی پردھان ولادیمیر پیوٹن نے آکھیا ہے کہ روس لئی ویلا آ گیا ہے کہ اوہ سرد جنگ دے پرانے بانہہ بیلی کیوبا نال فیر سانگے جوڑے۔ روسی سرکار امریکہ دے چڑھدے یورپ وچ میزائل دفاعی نظام توں ہرکھی ہوئی ہے تے پچھلے مہینے اک رپورٹ وچ دسیا گیا سی کہ روس ادھی صدی توں امریکہ نوں چبھن والے کنڈے کیوبا نوں اپنے ایٹمی بمباراں وچ تیل بھرن دے اڈے دے طور تے ورت سکدا اے۔
روسی دفاع دے وزیر نے ایس رپورٹ نوں رد کیتا سی تے آکھیا سی کہ روس دا ملکوں باہر کوئی وی فوجی اڈا بناؤن دا کوئی ارادہ نہیں ہے۔ پر امریکہ دے اُچ پدھری جرنیل نے آکھیا سی کہ ایہو جہیا کوئی وی کم خطرے دی لیک نوں اُلنگھن دے برابر ہووے گا۔
اُچ پدھری حکومتی وزیراں دے اک اکٹھ نال گل کردیاں پیوٹن نے آکھیا کہ سانوں کیوبا اتے دوجے ملکاں نال فیر نوں سانگے بناؤنے چاہیدے نیں۔ امریکی ریاست فلوریڈا دے ساحل توں صرف 144 کلومیٹر دے پینڈے تے کیوبا دے حالے وی امریکہ نال کوئی رسمی سفارتی سانگے نہیں ہین۔
پیوٹن دا ایہہ بیان روس دے نائب وزیر اعظم ایگور سچن نے کیوبا دا تن دیہاڑیاں دا دورہ کیتا جتھے اوہناں نے کیوبا وچ سرمایہ کاری اتے اوہدے نال وپار بارے فیدل کاسترو دے بھرا راؤل کاسترو نال گل بات کیتی جیہڑے ہُن کیوبا دے پردھان ہین۔ سچن دا آکھنا ہے کہ 'اسیں ہتھ ونڈائی لئی انرجی، زراعت، ٹرانسپورٹ، صحت اتے مواصلات دے شعبیاں تے گوہ کیتا ہے۔'
