ہندوستان دے شہر احمد آباد دے اک زچگی خانے وچ کرائے دی کوکھ (سرو گیٹ مدر) توں پیدا ہوئی اک بچی نوں نہیں پتہ جو قنون کیہہ ہے تے اوہنوں ماں دا آنچل نصیب ہووے گا کہ نہیں۔ پچھلی پنجھی جولائی نوں اک ہندوستانی ماں دی کوکھ توں جمن والی ایہہ کڑی سائنسی لحاظ نال اک جاپانی جوڑے دی اولاد ہے۔ پر عجیب گل ہے کہ جدوں اوہ ایس دنیا وچ آئی تے ماپیاں وچ طلاق ہو چکی سی، انج ستر سالاں دی دادی اپنی پوتری نوں لین لئی جاپان توں ہندوستان آئیاں ہین۔
اوہ بچی نوں جاپان کھڑنا چاہندیاں ہین پر ایس عمل وچ قنونی اڑیچاںہین۔ حالی نکی بچی داجے پور دے اک ہسپتال وچ علاج ہورہیا ہے تے اوہدی دادی اوہدی ویکھ بھال کر رہی ہے۔
بچی دے پیو ڈاکٹر یوکو فوسی یاں مادا طلاق دے مگروں وی اوہنوں اپنا بنانا چاہندے ہین پر قنونی ماہراں موجب ہندوستانی بچی نوں گودی لین لئی خاوند تے بیوی دوہواں دی رضا مندی ضروری ہے۔ جے پور دے جیس ہسپتال وچ ایہہ کڑی داخل ہے اوتھوں دے ڈاکٹر سنجے آریہ کہندے ہین:
ایہہ بچی ہن صحت مند ہے۔ ایتھے اوہ اپنی دادی دے نال ہے۔ پر دادی دا ہرکھ ایہہ ہے جو اوہناں نوں اُکا تن مہینیاں دا ویزا ملیا ہویا ہے تے اوہناں نوں ایس گل دی فکر ہے کہ جے اوہ بچی نوں جاپان کھڑن وچ کامیاب نہیں ہوسکیاں تے بچی دا کیہہ ہووے گا۔'
ہسپتال نے بچی نوں بے بی یاں مادا دا ناں دتا ہے۔ کیوں جو بچی ہندوستانی ماں دی ککھ توں جمی ہے ایس لئی جاپان کھڑن توں پہلوں ایہدا ہندوستانی پاسپورٹ بننا ضروری ہے۔ ڈاکٹر آریہ موجب ایس کڑی دا پاسپورٹ بنوایا جارہیا ہے۔ پر ایس وچ قنونی گنجل ایہہ ہے جو اوہدی ماں تے پیو دا کیہہ ناں لکھیا جاوے؟
کیوں جو ایس بچی نوں اک سروگیٹ ماں نے جمیا ہے، انج دی صورت وچ ماں دی پچھان گجی رکھی جاندی ہے۔ جے پور ہائی کورٹ دے وکیل اجے کمار جین کہندے ہین جو ہندوستانی قنون وچ سرو گیٹ ماں دا ناں نہیں ہے انج بچی ہندوستانی ہوئی تے جاپان کھڑن توں پہلوں اوہدا پاسپورٹ بنوانا لازمی ہے۔
چیتے رہوے جو چھبی جولائی نوں احمد آباد وچ ہوون والے بمب دھماکیاں توں مگروں بچی نوں سیکورٹی دے کارن جے پور منتقل کر دتا گیا سی۔ بچی ہسپتال وچ اپنی دادی دی راکھی وچ ہے۔ دادی نوں نہ تے ہندی آوندی ہے تے نہ انگریزی، اک مترجم راہیں کڑی دی دادی نے بی بی سی نوں دسیا جو ڈاکٹر یامادا اپنی دھی نوں بوہت چاہندے ہین۔ ' میں اپنی پوتری نوں بوہت پیار کراں گی، میریاں اکھاں وچوں نکلن والے ہنجو میرے جذبیاں دی عکاسی کر رہے ہین'۔
ملکاں دیاں کندھاں نوں ہٹا دیوو تے سائنسی اعتبار نال ایہہ بچی کیہدی اولاد ہے ڈاکٹر سنجے آریہ کہندے ہین '' پیو ڈاکٹر یامدا تے ماں یوکی جاپانی ہین ایس لئی ایہہ جاپانی ہے پر ایہہ ہندوستان وچ جمی ایس لئی اہنوں ہندوستانی کہیا جاسکدا ہے۔'
ایہہ حقیقت ہے جو سرحد تے قنون دیاں کندھاں بوہت سخت ہوندیاں ہین پر اک ایس ویلے اک بچی نوں ماں دی ککھ نصیب نہیں ہورہی جدوں کہ اوہدی سائنسی تے سرو گیٹ ماں دوہویں ہی جیوندیاں ہین۔
