امریکی پربندھیاں نے ملک دے ساریاں توں وڈے کریڈٹ تے ڈیبیٹ کارڈ فراڈ دے معاملے وچ گیاراں بندیاں تے الزام لائے ہین۔ اہناں بندیاں تے چالی ملین کریڈٹ تے ڈیبیٹ کارڈ دے نمبر چوری کر کے اوہناں نوں دوجے لوکاں نوں ویچن دا الزام ہے۔ کریڈٹ تے ڈیبٹ کارڈ دی چوری نوں پچھان دی چوری دے ناں توں جانیا جاندا ہے۔
انج دے دھوکے وچ ڈیبیٹ تے کریڈٹ کارڈ بناون والیاں فرضی کمپنیاں صرف ورتن والیاں توں اوہناں دی پوری انفارمیشن لیندیاں ہین تے مگروں ایہہ کارڈ دوجے لوکاں نوں ویچ دیندے ہین جیس نال فرضی ہولڈر دوجے بندے دی پچھان دے مڈھ تے فرض کردے ہین تے کریڈٹ کارڈ نوں ورت دے ہین یاں کریڈٹ تے ڈیبیٹ کارڈ دی انفارمیشن دی چوری کردے ہین ۔
امریکی پربندھیاں دا کہنا ہے جو اہناں گیاراں بندیاں نے اک دوکان تے بینک وچ وڑ کے کمپیوٹر تے ' وارڈ ڈرائیونگ' ناں دی تکنیک دی مدد نال کمپیوٹر ہیک کیتے تے اوہدے کولوں ورتن والیاں دا ڈیٹا لیا۔
وکیلاں دا کہنا ہے جو ایہہ دھوکہ دہی دی اک ' عالمی سازش ' ہے۔ جنہاں بندیاں تے الزام لائے گئے ہین اوہناں وچوں تناں دا تعلق امریکہ نال ہے جدوں کہ رہندیاں دا استونیا ، یوکرین، بیلا روس تے چین نال ہے۔
اہناں بندیاں تے الزام ہے جو اوہناں غیر قنونی طریقے نال لوکاں دے کریڈٹ کارڈ نمبر، بینک اکاؤنٹ انفارمیشن تے پاسپورٹ شہر وچ گھم کے لوکاں نوں مورکھ بنا کے وائر لیس اکیوپمنٹ نوں ہیک کر کے چوری کیتے ہین۔ اوہدے مگروں اوہناں نے امریکہ تے یورپ دے کمپیوٹر سرورز وچ ایہہ معلومات گھلیاں ہین۔
امریکہ دے ڈپارٹمنٹ آف جسٹس دا کہنا ہے جو ایس دھوکے دہی نال بینکس پرچون ویچن والیاں تے عام ورتن والیاں نوں بوہت نقصان ہویا ہے۔ حالانکہ اوہنے ایہہ نہیں دسیا جو ایس دھوکے نال کنی رقم دا نقصان ہویا ہے۔
وکیلاں دا الزام ہے جو ملزماں نے گھٹو گھٹ گیاراں تیٹیل چینز نوں نشانہ بنایا ہے۔ اوہناں وچ ٹی جے ایکس کارپوریشن، جو ٹی جے میکس ناں توں ہٹیاں چلاوندے ہین۔ بی جے ہول سیل کلب، بارنز اینڈ نوبل، اسپورٹس اتھارٹی، باسٹن مارکیٹ، آفس میکس، ڈیو اینڈ بسٹرس ،ڈی ایس ڈبلو شو اسٹورز تے فارایور 21 رلتی ہین۔
ٹی جی ایکس کاپوریشن دا کہنا ہے جو پوری دنیا وچ اوہدے اسٹور انج دی دھوکے دہی دا نشانہ بنے ہین۔ جسٹس ڈیپارٹمنٹ نے عام بندیاں نوں کہیا جنہاں بندیاں نوں ایہہ ڈر ہے جو اوہناں دی ذاتی تفصیل نوں غلط ورتے جاون دا ڈر ہے اوہ اپنے اپنے بینکاں نال رابطہ کرن۔
پربندھیاں دا کہنا ہے جو امریکہ وچ ہوون والا اپنی نوعیت دا سب توں وڈا تے گنجل دار فراڈ ہے۔ جیس دے تت وچ ایہدے وچ رلتی لوکاں دے خلاف ایکشن لینا پیا تے چارج وی کیتا گیا۔
امریکہ دے اٹارنی جنرل مائیکل موکاسی دا کہنا ہے ' ایہہ معاملہ ایس گل ول اشارہ کردا ہے جو ساڈی ذاتی تفصیل دا چوری ہو جاناکنا سوکھا ہے ۔' اوہناں ہور کہیا سی جو ' ایس فراڈ وچ رلتی بندیاں نوں بے نقاب کرن تے ایس سارے معاملے نال اوہناں بندیاں نوں وی سنیہا اپڑ دا ہے جو ساڈے کمپوٹر نیٹ ورک ذاتی تفصیلاں تے شہریاں تے وپاریاں نوں نقصان اپڑانا چاہندے ہین۔'
جے کوئی اہنوں کردا ہے تے اسیں گرفتار کر کے جیل گھل دیواں گے بھاویں اوہ دنیا وچ کِتے وی ہووے۔'
