حکومت نے تحریک طالبان پاکستان نوں کالعدم قرار دے دتا

حکومت نے تحریک طالبان پاکستان تے روک لاوندیاں ہوئیاں ستھ دے سارے بینک کھاتے تے اثاثے بند کرن دا حکم دے دتا ہے۔ وزارت داخلہ موجب تحریک طالبان پاکستان تے روک دا کارن ستھ دا خود کش دھاڑیاں وچ رلتی ہوونا ہے۔ روکاں تے ردعمل ظاہرکردیاں ہوئیاں تحریک طالبان دے ترجمان مسلم خان نے کہیا ہے جو نہ تے اوہناں دی ستھ کِتے رجسٹرڈ ہے تے نہ ہی اوہدے کسے بینک وچ کھاتے ہین۔

اسلام آباد وچ امریکی سفارتخانے دے ترجمان نے حکومت دے ایس فیصلے نوں سلاہندیاں ہوئیاں وائس آف امریکہ نوں دسیا جو پاکستان قیادت نے ات واد نوں روکن تے اپنے شہریاں دی حفاظت نوں یقینی بناون دا ارادہ کیتا ہویا ہے۔ چیتے رہوے جو انسداد دہشت گردی دے قنون ہیٹھ کالعدم قرار دتی جاون والی ستھ دی مالی مدد کرن والے بندیاں نوں انسداد دہشت گردی دے قنون ہیٹھ دس سال دی سزا دتی جاسکدی ہے۔

دو ہزار ست دے اخیر وچ بنن والے تحریک طالبان دی سربراہی پاکستان نوں بوہت مطلوب بیت اللہ محسود کر رہے ہین تے ستھ دا گڑھ پاکستان دے قبائلی علاقے جنوبی وزیرستان نوں سمجھیا جاندا ہے۔ پر اپنے بنن دے مگروں ہور قبائلی علاقیاں نال تعلق رکھن والے عسکریت پسند وی ایس ستھ دا حصہ بن دے گئے تے ہن تحریک طالبان دا دعویٰ ہے جو سارے قبائلی علاقیاں توں وکھ صوبہ سرحد دے کئی شہراں وچ وی اہدا اثر ودھیا ہے۔

تحریک طالبان نے ہن تیکر سیکورٹی اداریاں تے کیتے جاون والے کئی خود کش دھاڑیاں دی ذمے واری قبول کیتی ہے جیس وچ پچھلے ہفتے اِکی اگست نوں اسلام آباد توں قریباََ پنتالی کلو میٹر دور واہ وچ ملک دی سب توں وڈی اسلحہ فیکٹری پاکستان آرڈیننس فیکٹری تے ہوون والے دو خود کش دھاڑیاں دی ذمے واری شامل ہے۔ واہ آڑڈیننس فیکٹری تے ہوون والے خود کش دھاڑیاں وچ نوے بندے مارے گئے سن۔

چیتے رہوے جو حکومت ولوں بیت اللہ محسود تے ستائی دسمبر دوہزار ست نوں مقتول گذریل وزیر اعظم بینظیر بھٹو تے ہوون والے خود کش دھاڑے دا وی الزام ہے۔ چیتے رہوے جو جنگجو آگو بیت اللہ محسود دے کالعدم ستھ القائدہ دے نال نیڑلے سانگے ہین۔