امریکہ وچ ایس ویلے اپنی تاریخ دے سب توں بوہتے رضا کار ہین

اگلے دساں سالاں وچ گھٹو گھٹ ست کروڑ ستر لکھ بندے اپنی نوکریاں توں ریٹائر ہو جاون گے تے آس ہے جو اوہناں وچوں بوہتے رضا کار دے طورکم کرن گے۔ ماہراں دا کہنا ہے جو ایہدا وڈا کارن ایہہ ہے جو صحت دا معیار چنگا ہوون دے کارن کم کرن دی صلاحیت تے عمراں وچ فرق ہے۔

روبرٹا گڈمین دی عمر 69 سال ہے۔ اوہناں ساری عمر کم کیتا ہے۔ اوہ ہن وی کم کر رہیاں ہین پر رضا کار دے طور تے اپنی مرضی دا کم۔ اوہ ماحولیات ولوں ستھاں نال کم کررہیاں ہین۔ اجکل اوہ رُکھاں دے بچاون وچ مدد دا کم کررہیاں ہین۔ جیہڑا اوہناں نوں بوہت پسند ہے۔

اوہ کہندیاں ہین میں اک انج دا کم کررہی ہاں جنہوں کرن وچ مینوں بوہت سواد آوندا ہے ایہہ اک انج دا کم ہے جیہدے وچ بوہت سواد ہے۔

روبرٹا پنج سال پہلوں ریٹائر ہوئیاں سن۔ اوہناں نے واہوا چر سائنسی مواد لکھن دا کم کیتا ہے۔ کجھ سال پہلوں اوہناں نوں ایہہ خیال آیا جو گھر بیکار بیہن دی بجائے کجھ کرنا چاہی دا۔ اجکل اوہ واشنگٹن ڈی سی دے اک پارک وچ درختاں نوں جڑی بوٹیاں توں بچاون تے اوہناں نوں پانی دیون دا کم کردیاں ہین۔

کجھ سال پہلوں اوہناں نے واشنگٹن دے نباتاتی پارک وچ اک رضا کار دے طور تے اپنا ناں درج کرایا تے کسے ٹریز ناں دی اک رضاکار ستھ دے نال ایس پارک وچ درختاں دی حفاظت لئی کم کررہیاں ہین۔

اوہ کہندیاں ہین جو تہانوں عالمی گرمی دے مسئلے دا پتہ ہے تے ایہہ وی پتہ ہے جو درختاں تے دوجے نباتات دے نال کاربن ڈائی آکسائیڈ دی پدھر نوں گھٹ کیتا جاسکدا ہے۔

نیانیاں تے وڈی عمر دے بندیاں دی مدد تے ماحولیات انج دے شعبے ہین جتھے عام طور تے بوہت رضا کار جاندے ہین تے اپنیاں اپنیاں کمیونیٹز وچ اہناں شعبیاں وچ لکھاں رضا کار کم کررہے ہین۔ مشعل ہینز نیانیاں نوں پڑھائی وچ مدد دیون والی ملک دی سب توں وڈی رضا کار ستھ دی ڈائریکٹر ہین۔ اوہ کہندیاں ہین جو ست کروڑ ستر لکھ بے بی بومرز دو سال پہلوں سٹھ سال دی عمر نوں اپڑنا شروع ہو گئے سن تے ایس ویلے ساڈے کول سٹھ سال دی عمر دے، جنہوں روایتی طور تے ریٹائرمنٹ دی عمر کہیا جاندا ہے تاریخ دی سب توں وڈی جنریشن موجود ہے۔

بے بی بومر اک اصطلاح ہے جیہڑی امریکہ وچ اوہناں بندیاں لئی ورتی جاندی ہے جیہڑے دوجی جنگ عظیم توں مگروں جمے سن۔ جیہدے کارن اُنی سو چھتالی تے اُنی سوسٹھ دے مڈھلے سالاں وچکا امریکہ دی آبادی بوہت کالھی نال ودھی سی۔کئی مطالعیاں توں ایہہ پتہ لگیا ہے جو تقریبا اک تہائی بے بی بومرز والنٹیر ورک کرن گے۔

ہینز دا کہنا ہے جو پچھلے سال ریٹائر ہوون والے دو ہزار توں ودھ بندے اوہناں دی ستھ وچ آئے ہین تے اوہناں نے اپنے علاقے دے سکولاں وچ پنج لکھ گھٹے کم کیتا ۔ جیہڑا کہ اک کروڑ ڈالر دے نیڑے ہے۔ اوہناں دا کہنا ہے جو ہن پنجاہ توں سٹھ سال دی عمر دے پچھوکڑ توں ودھ بندے رضا کارانہ طور تے کم کررہے ہین۔

مشعل کہندیاں ہین جو ایہہ رضا کار بوہت کم کر رہے ہین۔ ایہہ جواناں توں بوہتا ویلا دیندے ہین تے ایس کم نوں بوہت اہمیت دیندے ہین۔

گلوریا شرمین دس سال پہلوں اک لائبریرین دے طور تے ریٹائر ہوئیاں سن۔ اوہناں دا کہنا ہے اوہ رضا کار ستھ دے نال نیانیاں تے پودیاں دی ویکھ بھال وچ بوہت مصروف ویلا گزار دیاں ہین۔ گلوریا کہندیاں ہین میں اپنے ویلے دے بارے آپوں فیصلہ کرنی ہاں جو مینوں کیہہ کرنا ہے جیس نال مینوں وی تے دوجے لوکاں نوں وی فیدا ہووے۔

ماہراں دا کہنا ہے کئی مطالعے ایہہ ظاہر کردے ہین جورضا کاراں دے کم دے معاشی فیدے بوہتے ہین۔ ہن جدوں کہ بوہت سارے ریٹائر بندے رضاکاراں دی لین وچ لگ رہے ہین تے ایہدے نال وسیب نوں وڈے پیمانے تے فیدے ہوون گے۔