کیلی فورنیا امریکہ دی اک انج دی پہلی ریاست بن گئی ہے جتھے جمن والی چکنائی یعنی ٹرانس فیٹ دے ورتن تے روک لا دتی گئی ہے۔ ماہراں دا کہنا ہے جو ایہہ چکنائی شریاناں وچ جم کے اوہناں نوں تنگ کردیندی ہے جیہدے کارن دل دیاں بماریاں، فالج تے کئی دوجیاں بماریاں لگ جاندیاں ہین۔
ماہراں نے حکومت دے ایس فیصلے نوں سلاہیا ہے جدوں کہ کجھ تنقید کرن والیاں نے ایس روک نوں شخصی آزادی تے اک دھاڑا آکھیا ہے۔ کیلی فورنیا وچ ایس روک دا سب توں بوہتا اثر فاسٹ فوڈ ریسٹورانٹس تے پیا ہے کیوں جو اوہ چپس تے کئی دوجے پکوان کرارے تے سوادی بناون لئی اوہناں نوں انج دے تیل وچ تلدے سن جنہاں وچ ٹرانس فیٹ وی رلتی ہوندی سی۔ ہن اوہناں نوں قنونی طور تے ٹرانس فیٹ دا ورتنا چھڈنا ہووے گا۔ جیہدا اثر اوہناں دے بنائے ہوئے فاسٹ فوڈ دے سواداں تے وی پے سکدا ہے۔ ایہہ بدلی اوہناں دے گاہکاں دی گنتی تے وی اثر پاسکدی ہے تے ایہہ وی امکان ہے جو اوہ انج دے فاسٹ فوڈ ول توجہ دیون جیہڑا ٹرانس فیٹ توں بغیر ہووے پر خوشبو تے سواد وچ انج دا ہی ہووے۔
کیلی فورنیا دے اک ریسٹورنٹ دے مالک پٹسی لین دا کہنا ہے جو ریاست دا ایہہ فیصلہ شخصی آزادیاں دے خلاف ہے۔ سانوں گاہک دسدے ہین جو اوہناں نوں کیویں دا کھانا چاہی دا۔ طبی ماہراں دا کہنا ہے جو حکومت دا ایہہ فیصلہ لوکاں نوں جان لین والیاں بماریاں توں بچاون ول اک قدم ہے۔ اوہناں دا ایہہ وی کہنا سی جو ٹرانس فیٹ انسان دا اپنا بنایا ہے۔ جدوں کسے نباتاتی تیل وچوں ہائیڈروجن گیس شامل کیتی جاندی ہے تے اوہ ٹرانس فیٹ وچ بدل جاندا ہے۔
ڈاکٹر مائیکل ہرٹ کہندے ہین جو ٹرانس فیٹ تے روک اک چنگا فیصلہ ہے۔ ہر سال لکھاں لوک صرف ٹرانس فیٹ دے نتیجے وچ پیدا ہوون والیاں بماریاں نال مارے جاندے ہین۔ ہوٹلاں وچ اوہناں تے ورتن تے روک لا کے لکھاں جاناں بچائیاں جاسکدیاں ہین تے لوکاں نوں صحت مند رکھن وچ مدد مل سکدی ہے۔
ہوٹلاں نے کئی ورہے پہلوں ٹرانس فیٹ ورتنا اوہدے سستے ہوون کارن شروع کیتا سی۔ دوجا ایہہ کہ ایہدے وچ پکیا کھانا بوہتا چر محفوظ رکھیا جاسکدا ہے تے ایہہ کہ ایہدے نال کھانے دا سواد وی چنگا ہوجاندا ہے۔فاسٹ فوڈ دے اک شوقین جیسن دا کہنا سی جو ایہہ اختیار صرف میری گھر والی نوں ہے جو اوہ مینوں ایہہ دسے میں کیہہ کھانا ہے کیلی فورنیا دے گورنر نوں نہیں۔
ایس نویں قنون ہیٹھ کیلی فورنیا دے سارے ہوٹلاں تے ریستوراناں نوں ڈیڈھ سال دے وچ ٹرانس فیٹ نوں ورتنا بند کرنا ہووے گا۔ ایہدے مگروں اوہناں نوں بھاری جرمانے دا ساہمنا کرنا پے سکدا ہے۔
