چنڈی گڑھ اتے ہریانہ پولیس نے ہائی وے ڈکیتاں دا جیہڑا گروہ قابو کیتا ہے، اوہنے پنجاب لئی خطرے دی وج رہی گھنٹی نوں ہور اُچا کر دتا ہے۔ پچھلے ویلے وچ وی ڈاکیاں، لُٹاں، کھوہاں اتے قتلاں دیاں وارداتاں وچ سردے پجدے جاں گبھلے میل دے ٹبراں دے پڑھے لکھے منڈیاں دی رلت دے معاملے ساہمنے آؤندے رہے ہین۔ پنجاب اتے چنڈی گڑھ جاں نیڑلے علاقیاں وچ اجیہے کنے ہی جرماں پچھے کسے نہ کسے روپ وچ کھاندے پیندے گھراں دے نوجوان ہی ذمہ وار ہوندے سن اتے ایہناں وچ پولیس دے اہلکار وی رلتی پائے جاندے رہے ہین۔ ہائی وے گروہ بارے ساہمنے آئے تتھاں نے صفتی طور تے ایہہ ثابت کر دتا ہے کہ پنجاب اتے نیڑلے کھیتراں وچ اجیہے گھناؤنے جرماں لئی ہورناں صوبیاں توں آئے مجرم ذمہ وار نہیں ہین۔
کوئی ویلا سی جدوں ایہہ ہوا بنی ہوئی سی کہ چوریاں اتے لٹ مار پردیسی مزدوراں دے بھیس وچ آئے ہوئے مجرم ہی کردے ہین، کسے حد تک ایہہ گل ٹھیک وی سی۔ کالے کچھیاں والے گروہاں وچ لٹ مار کرن والے کجھ مہاجر وی رلتی سن۔ کجھ لوک اجے وی اوہی پرانی گل تے ہی کھڑے ہین۔ پردیسی مجرم کڈھر قسم دی لٹ مار کردے سن اتے اس لئی اوہ ڈھنگ طریقے وی اجیہے ہی پرانی قسم دے ورتدے سن پر ہن مجرماں دا خاصہ وی بدل گیا ہے تے جرماں دی قسم اتے ڈھنگ طریقے وی۔ پچھلے ویلیاں وچ لٹاں کھوہاں تے بینک ڈکیتیاں دے الزام وچ جنے وی گروہ جاں مجرم پھڑے گئے اوناں وچوں بہتی گنتی پنجاب دے پنڈاں تے شہراں دے اوہ نوجوان سن جیہناں دا فوری مقصد صرف روٹی ٹک دا نہیں سگوں سوکھے ڈھنگ نال پیسہ کماؤن اتے اس نال عیش و آرام کرن اتے چمک دمک والی حیاتی دا سواد ماننا ہوندا ہے۔ راجیو عرف راجا دی اگوائی ہیٹھلے ہائی وے گروہ وچ رلتی جنے وی مجرم پھڑے گئے ہین ایہہ سارے ایسے طبقے دے ہین۔ ایہناں وچوں اک تاں چنڈی گڑھ پولیس دے انسپکٹر دا پتر ہے اتے اوہ پولیس لائن وچ ہی رہ رہیا سی جتھے کسے نوں شک وی نہیں ہوندا۔ پولیس دی پچھ گچھ توں ایہی گل ساہمنے آئی ہے اک اس گروہ ولوں کیتی گئی لٹ مار دے پیسے اسلحے لئی، عیش آرام لئی تے جاں فیر آپنے جال نوں ہور ودھاؤن لئی ورتے گئے۔ چیتے رہے کہ ہوشیارپور وچ اسلحے دی دوکان تے ڈاکہ وی ایسے گروہ ولوں ماریا گیا سی۔
بے روزگاری بنام گلیمر
اک پاسے پنجاب دی جوانی، خاص کرکے پینڈو نوجوان پیڑھی نشیاں دی مار ہیٹھ آئی ہوئی ہے، اوتھے اپر ذکر کیتے مجرم طبقے دا ودھنا سماج لئی بے حد چنتا دا موضوع ہونا چاہیدا ہے۔ کارن اس دے کئی ہین، بے روزگاری وی ہے، نویں سکھ سہولتاں اتے مایہ دا کجھ ہتھاں وچ اکٹھے ہوندے جانا اتے اس دی کانی ونڈ ہونا وی۔ اس معاملے وچ سبھ توں خطرناک کردار میڈیا اتے خاص کرکے ٹی وی میڈیا دا ہے۔ جتھے اک پاسے فلماں اتے جرماں بارے پروگرام نوجواناں نوں جرم کرن دے نویں نویں ڈھنگ طریقے سکھاؤندے ہین اوتھے سارے ٹی وی رییلٹی شو نوجواناں نوں سوکھی طرحاں پیسہ کماؤن، صرف نچ گا کے ہی جیون وچ کامیاب ہون اتے چمک دمک والی خیالی دنیا وچ رہن دی اوہناں وچ امنگ پیدا کر رہے ہین۔
اوہ اجیہے بازارو کلچر نوں ہلارا دے رہے ہین جس وچ کرت کرن اتے محنت نال زندگی دیاں کوڑیاں حقیقتاں دا ساہمنا کرکے نیک کمائی دی تھاں راتو رات امیر بنن دی لالسا نوں ہوا دتی جاندی ہے۔ کجھ ورلے ٹاویں پروگرام ہی ہین جیہناں وچ صبر سنتوکھ نال آپنی محنت دے اتے لگن دے سر تے عام جیون وچوں اٹھ کے وکھ وکھ کھیتراں وچ کسے مقام تے پہنچے سائنسداناں، انجینیئراں، ڈاکٹراں، کساناں اتے ہور ماہراں دیاں کامیابیاں دیاں کہانیاں پیش کیتیاں جاندیاں ہون۔ اک طرحاں نال سماج دے نوجوان طبقے وچ اک بیمار ذہنیت پیدا ہو رہی ہے جس دے نتیجے مارُو ہو رہے ہین۔ بے شک پیسہ کماؤن دی دوڑ وچ آپا دھاپی والا کلچر بازارو اتے کھپت کاری پونجی وادی نظام دا اک اگھڑواں لچھن ہی ہوندا ہے پر فیر وی آگواں، سرکاراں اتے لوک مکھی ستھاں ولوں نوجواناں وچ اجیہے جذبے دے پھیلاء نوں گنبھیرتا نال لیا جانا چاہیدا ہے۔ نہیں تاں اک راجا پھڑیا جاوے گا تاں کوئی ہور دوجا راجا آپنا گروہ کھڑا کر لوے گا کیونکہ ایہہ صرف امن قانون دا ہی مسئلہ نہیں سگوں نشیاں اتے کڑیاں نوں جمدیاں مارن وانگ اک معاشی، سماجی اتے وسیبی ورتارا ہے۔ اس پکھوں پنجابی سماج لئی اگلا ویلا بہت خطرے بھریا ہے۔ چٹ کپڑیئے جرم تاں ودھ ہی رہے ہین، اس دے نال نال ماردھاڑ وی سبھ حد بنے النگھ سکدی ہے۔ خاص کرکے اوہناں حالتاں وچ جدوں کہ راج تے قابض سیاستداناں، پولیس مشینری اتے سرکارے دربارے رسوخ والے بندیاں دے ناپاک گٹھ جوڑ دی سرپرستی نال اجیہے جرم کیتے جا رہے ہون۔
ٹٹیہری دے بچے
پچھلے ہفتے دی گل ہے ترنتارن دے اک پنڈ توں اک کسان پڑھنہار دا فون آیا۔ اوس نے کجھ پل فون ہولڈ کرن لئی کہیا تے فون دا منہ آپنے کھیت ول کرکے اک پنچھی دی آواز سنائی۔ کہن لگا ایہہ آواز سندے ہو کس دی اے؟ میں جواب دتا ایہہ ٹٹیہری دی آواز اے۔ اوہ کہن لگا ایہہ ٹٹیولی دی آواز ہے۔ میں دسیا کہ ایسے جنور نوں ٹٹیہری کہندے ہین۔ چلو، خیر اوہ کہن لگا کہ اوہ ٹٹیہری اس لئی چیک رہی ہے تاں جو خطرہ پیدا کرن والے جیو اوس دے بچیاں توں پرے رہن۔ اوس دی اگلی گل بڑی سوادی سی۔ کہن لگا کہ ایہہ ٹٹیہری دے بچے جھونے دی ١٠ جون توں پہلاں لوائی تے لائی گئی پابندی دا نتیجہ ہین۔ پہلاں اگیتا جھونا لا لئی دا سی تے ٹٹیہری نوں پیلیاں وچ آپنے آنڈے تے فیر بچے کڈھن لئی کوئی سکی جگہ ہی نہیں سی ملدی۔ ہن ١٠ جون توں پہلاں تاں واہن خالی ہوندے ہین جس کرکے ایہہ بچے پیدا کر سکی۔ کہن لگا اگیتے جھونے تے لائی اس پابندی نے صرف پانی دی ہی بچت نہیں کیتی سگوں ساڈے چوگردے تے اس وچلے جیو جنتواں دا توازن رکھن وچ وی مدد کیتی ہے۔ ایہہ ٹٹیہری اوہی جانور ہے اس بارے وزیر اعلیٰ سردار پرکاش سنگھ بادل ولوں جس دے ناں دی ورتوں نے پنجاب اسمبلی دے اندر تے باہر وڈا سیاسی ہنگامہ کھڑا کر دتا سی۔
اوس کسان دی اس گل وچ وزن سی کہ فصلاں تے کھیتی دے قدرتی چکر نوں الٹا پلٹا کرن اتے رکھاں دی وڈے پدھر تے کٹائی نے پنچھیاں جانوراں تے ہور جیو جنتواں دیاں کئی نسلاں مکا دتیاں ہین۔ اوہناں دے رہن سہن تے ودھن پھلن لئی جتھے اک پاسے قدرتی ماحول نہیں رہیا اوتھے فصلاں تے زمین لئی کیمیائی کھاداں تے کیڑے مار دوائیاں نال زمین تے پانی چ پیدا ہوئے زہریلے مادے نے وی پشو پنچھیاں دے جیون نوں بہت سٹ ماری ہے۔ جس دا الٹا اثر کسے نہ کسے روپ وچ انسانی جیون تے چوگردے تے وی پے رہیا ہے۔
