کجھ لوکاں دی حیاتی دے راز اوہناں دی موت توں مگروں کھلدے نیں۔ جماعت اسلامی دے موڈھی رکن تے گذریل امیر مولانا طفیل محمد دے چلاناکرجاون توں مگروں اخباراں وچ اوہناں دے چاہن والیاں نے سگوں اوہناں دے راکھیاں نے وی جیہڑے مضمون لکھے نیں ایہدے نال اک گل تے ثابت ہو گئی پئی ساڈا ملک سگوں امت مسلم نابغہء روزگار عالم دین تے پاک باز سیاست دان توں ہتھ دھو بیٹھی۔
پر گل ایتھے ہی نہیں مکی۔ اک مضمون نگار نے اوہناں دے سدھے جنت جاون دی بشارت دتی جتھے حضرت مولانا مودودی اوہناں دا استقبال کرن گے اک نے فرمایا پئی اوہ ایس دور دے ولی سی۔ اوہناں دے نظریاتی مخالفاں نے اوہناں دی سادگی دیاں صفتاں دے پل بنھے تے اوہناں دیاں عبادتاں دا دسیا۔
میں اُڈیک دا رہیا پئی خورے کوئی حلوے دا ذکر وی کر دیوے۔ اوہناں دی جنرل ضیاء نال نیڑتا تے ایس روحانی مامے بھنویں دی ایس جوڑی نے ایس ملک نوں جیہڑی راہ تے پایا اوہدی گل وی نکل آوے۔ پر انج دا کجھ نہیں ہویا کیوں جو اجکل ساڈے کئی تجزیہ نگار کالم نگار کسے منبر تے بیہہ کے لکھدے نیں جے اتبار نہ ہووے تے کسے اردو اخبار دا ادارتی صفحہ چک کے ویکھ لوو کئی مضمون قرآنی آیتاں توں شروع ہوندے تے کسے دعا یاں بددعا تے مکدے نیں۔ انج دیاں اسمانی دلیلاں دے ساہمنے تاریخ حقیقتاں یاں تجزیہ کیہ حیثیت رکھدے نیں۔
دس سال پہلوں میری اللہ بخشے مولانا نال اک نکی جئی ملنی منصورہ وچ اوہناں دے گھر ہوئی سی۔پہلی گل جیہڑی مینوں حیرانی والی لگی اوہ ایہہ پئی منصورہ دے وچ دا ماحول اُکا اوہی سی جیہڑا فوجی چھاؤنیاں وچ ہوندا ہے۔ ہر شے بوہت ہی منظم تے ترتیب وار۔ صرف سڑکاں تے مارچ کردے رنگروٹاں دی کمی سی۔
اللہ بخشے مولانا نے انٹرویو بڑی بے زاری نال دتا۔ مسکان اوہناں دے نیڑے گناہ نہیں تے بدعت تے ضرور سی۔ پر انٹرویو وچ اک واری اوہناں توں ایہہ '' بدعت '' ضرور ہوئی۔ میں جنرل ضیاء دے دور تے حکومت تے بھٹو دی سولی بارے اک سوال کیتا۔ فرمایا اُس دیہاڑ تے لوکاں نے حلوے دیاں دیگاں پکائیاں تے ونڈھیاں سی۔ اوہناں دے بلھاں تے اک مٹھی مسکان آئی جیویں اوہناںنوں حلوے دی شرینی حالی تیکر چیتے ہووے۔
مولانا طفیل محمد نوں جماعت اسلامی دا مستقل جنرل سیکرٹری لاوندے ویلے حضرت مولانا مودودی نے پچھیا سی پئی کیہ میں اپنی تقریر وچ جماعت اسلامی بارے ایہہ کہہ دیواں پئی ایہ ہن لوہے دا چنا ثابت ہووے گی؟ مولانا نے تھوڑا چر کھلو کے فرمایا کہہ دیوو تے جماعت اسلامی واقعی لوہے دا چنا ثابت ہوئی۔
ساڈے اک بزرگ فرماوندے سی پئی اکھاناں وچ کدی کدی صدیاں دا سیانف لکیا ہونداہے تے کدی کدی صدیاں دی جہالت۔
لوہے دے چنیاں دا وی کجھ انج دا ہی حساب ہے۔ ایس چنے نال نہ تے غریب دا ڈھڈ بھردا ہے نہ ہی ایہدا لوہا کسے کاریگر دے کم آوندا ہے۔ ایہہ صرف دشمن دے دند کھٹے کرن لئی ہے تے جماعت اسلامی نے پہلوں جنرل ضیاء دے نال رل کے تے ایہدے مگروں مشرف دی حمیت کر کے وار وار اپنے ویریاں دے چھکے چھڈوائے نیں۔
یونیورسٹیاں وچ مخالفاں دیاں لتاں توڑن توں لے کے میڈیا دے نیوز روماں نوں ہائی جیک کرن تیکر، جماعت نے ہر حربہ آزما کے ویکھ لیا پر ایہہ قوم ہے پئی ہن وی اوہناںنوں شک دی نظر نال ویکھدی ہے۔ ووٹ دیون لئی نکلدی ہے تے پھیر کسے پرانے پاپی نوں آزماون لئی تیار ہو جاندی ہے ۔ کیہ ایہہ اُکا اتفاق ہے پئی جماعت اسلامی نوں دو واری اقتدار وچ حصہ ملیا دوہویں وار فوجی آمراں دے دور وچ۔
ہن جماعت اسلامی ہوس والیاں نظراں نال طالبان تے اوہناں دے حواریاں نوں ویکھدی ہے۔ مولانا صوفی محمد نوں اوہناں دا اصلی مشن یاد کرواندی ہے۔ پاک فوج نوں جہاد دے اصلی معنی سمجھاون دی کوشش کردی ہے۔ اے کاش کاش۔۔۔
مولانا طفیل تے اوہناں دے مرشد مودودی نے لوہے دے چنیاں دی جیہڑی فصل بیجی تے جنہوں پانی لایا کدی امریکی ڈالراں نال تے کدی سعودی ریالاں نال، اوہ فصل ہن پک کے تیار ہے تے اٹھاراں کروڑ دی بھکھی لوکائی ایہنوں ویکھ ویکھ پریشان ہے پئی یا اللہ ایہدا کیہ کرئیے۔حلوہ بھرے ڈھڈاں تے ہتھ پھیر کے جواب دتا جاندا ہے پئی اسیں ویریاں دے دند کھٹے کر دیواں گے۔
مولانا طفیل محمد اللہ بخشے کسے نے اوہناں نوں اک واری پچھیا مولانا مودودی دے افکار یاں ہستی نال کدی پاڑ ہویا اوہناں نے کہیا بالکل نہیں۔ بس اوہناں دیاں دو گلاں پسند نہیں سی اک تے نہاری کھاندے سی تے دوجا پان۔۔۔
