جنرل سرتھ فونسیکا دے دستیاں نے جدوں پچھلے سال گرمیاں وچ دنیا دیاں کجھ کرڑیاں عسکری تحریکاں وچوں اک یعنی تامل ٹائیگرز نوں مکا دتا تے ٹائیگرز دے آگو پربھا کرن دی لوتھ ٹی وی سکرین تے وکھا دتی گئی تے سری لنکا دے صدر مہندا راجہ پکسا نے جنرل فونسیکا نوں دنیا دا سب توں چنگا جنرل متھیا۔ پر فیر اوہی ہویا جو ہوندا ہے۔ صدر راجہ پکسا تے جنرل فونسیکا دے حمیتیاں وچ بحث چھڑ پئی اصل فاتح کون ہے ؟ اوہ صدر جنہے ٹائیگرز دے مکاون لئی سب توں بہتے وسیلے دتے یاں اوہ جنرل جنہے ٹائیگرز نوں مکا چھڈیا۔
ایہو بحث دوہواں نوں اک دوجے توں دور لے گئی تے جنرل فونسیکا نے اپنی مشہوری نوں آزماون لئی صدارتی چوناں لڑن دا فیصلہ کیتا۔ پر انسانی حقاں دی پامالی دے خراب ریکارڈ تے مالی بے ایمانی دے الزاماں دے مگروں وی صدر راجہ پکسا صرف اٹھاراں فیصد بہتے ووٹ لے کے صدارتی چوناں جت گئے سگوں تن حاضر سروس میجر جنرلاں تن بریگیڈئیراں تے دوہواں کرنلاں نوں وی جنرل فونسیکا دی حمیت تے معطل کر دتا۔ تے ایس سارے سیاسی کھیڈ وچ سری لنکا دی فوج نے آپنے آپ نوں غیر جانبدار رکھیا۔
لیفٹیننٹ جنرل اودیش پرکاش حکومت ہندوستان دے اٹھ کلیدی فوجی مشیراں وچ گنے جاندے سی۔ پر جنرل پرکاش نے لہندے بنگال دار جلنگ وچ فوجی مالکی دی ستر کلے زمین کوڈیاں دے بھاء اک بلڈر نوں ویچ دتی۔ وزیر دفاع اے کے انتونی نے فوج دے پردھان جنرل دیپک کپور نوں پچھیا پئی ایہہ کیہ ہورہیا ہے۔ فوج دے پردھان نے لیفٹیننٹ جنرل پرکاش تے چار ہور فوجی افسراں نوں کالھی نال ریٹائر کر کے کورٹ مارشل کرن دا حکم دے دتا۔ ہن اہناں افسراں دے سر تے قید تے پنشن سنے ہور سوکھتاں کھسن دی تلوار لمک رہی ہے۔ سن دو ہزار توں دو ہزار چھ تیکر ہندوستانی فوج ست ہزار توں ودھ کورٹ مارشل کر چکی ہے۔
جنوری دے چھیکڑلے ہفتے وچ بنگلہ دیش دے موڈھی شیخ مجیب الرحمان تے اوہناں دے گھر والیاں سنے اٹھائی جیاں نوں قتل کرن والے پنج گذریل فوجی افسراں نوں ڈھاکہ سنٹرل جیل وچ پھانسی دے دتی گئی۔
پندراں اگست انی سو پچھتر نوں جدوں شیخ مجیب الرحمان قتل کیتے گئے تے جنرل ضیاء الرحمان فوج دے نائب پردھان سی۔ قتل توں چھیتی مگروں بنن والی حکومت دے صدر خوندکر مشتاق احمد نے اک اُچیچا قنون بنا کے مجیب دے قاتلاں نوں معافی دے دتی۔ اگلے گیاراں سالاں تیکر بنگلہ دیش وچ فوجی حکومتاں آوندیاں جاندیاں رہیاں۔ شیخ مجیب دے قتل وچ رلتی دوہواں افسراں نے سیاست وچ ہی حصہ نہیں لیا سگوں چوناں وی لڑیاں جدوں کہ دو ملزم باہرلے ملک سفارتی عہدیاں تے وی لگے رہے۔
انی سو چھیانوے وچ جدوں شیخ مجیب دی دھی شیخ حسینہ وزیر اعظم بنیاں تے معافی دا قنون منسوخ کر دتا گیا تے پہلی واری لبھے ملزماں نوں عدالت وچ پیش کیتا گیا۔ انی سو اٹھانوے وچ نکی عدالت نے پندراں ملزماں نوں موت دی سزا سنائی۔پر ہائی کورٹ نے اپیل سنن توں مگروں تناں نوں بری کر دتا۔ فیر شیخ حسینہ چوناں ہار گئیاں تے اوہناں دی تھاں لین والی وزیر اعظم خالدہ ضیا نے عدالتی کم نوں اوتھے دا اوتھے روک دتا۔ جدوں دو ہزار نو وچ شیخ حسینہ فیر وزیر اعظم بنیاں تے مقدمہ اگے ودھیا تے سپریم کورٹ نے باراں ملزماں دی موت دی سزا برقرار رکھی۔ انج شیخ مجیب دے قتل دے پینتی سال مگروں پنجاں مجرماں نوں پھانسی دے دتی گئی۔ چھ مجرم ملکوں باہر نیں اوہناں وچوں دوہواں بارے کہیا جاندا ہے پئی مر گئے نیں۔
ایہہ تنے خبراں جنوری دیاں نیں تے دکھنی ایشیا دیاں نیں۔ پر پاکستان وچ بیٹھ کے انج دیاں خبراں سنن دا سواد ہی وکھرا ہے۔
