پاکستان وچ عدلیہ اتے حکومت وچکار لڑائی تے حکومت تے اپوزیشن وچ توں توں میں میں دے ماحول وچ رائے ونڈ فارم تے میاں نواز شریف نال دوپہر دی روٹی تے گل بات دا ویلا ملیا۔ اجوکے سیاسی حالاں وچ سسٹم نوں بچان دا ٹرمپ کارڈ نواز شریف دے کول ہے۔ ایس لئی پچھلے دناں وچ جدوں اوہناں دا بیان آیا پئی جمہوریت لئی سب توں وڈا خطرہ صدر آصف علی زرداری ہین تے یار لوکاں نے ایہدے توں ایہو مطلب کڈھیا پئی دمادم مست قلندر ہو گیا ہن سسٹم دا جھلی بسترا چکیا جانا فیر ایسے وچکار شہباز شریف تے چودھری نثار علی دی جنرل کیانی نال اک ہور ملنی وی معمہ بن گئی۔
گلاں باتاں شروع ہوئیاں تے نواز شریف نے مینوں اصلی گل دسدیاں ہوئیاں کہیا اسلام آباد وچ مسلم لیگ نون دا جیہڑا صلاح مشورے دا اجلاس ہویا ایہدے وچ مینوں کہیا گیا پئی ہن ویلا آگیا ہے تسی صدر زرداری کولوں استعفے دی منگ کرو مسلم لیگ نون دے آگواں نے میرے توں ایہہ منگ کیتی پئی تسی مڈٹرم الیکشن دی کال دیوو مینوں صلاح دتی گئی پئی آئین وچ ترمیماں تے گوہ کرن والی کل جماعتی پارلیمانی '' آئینی کمیٹی '' دا بائیکاٹ کر دیوو۔ اک آواز ایہہ وی سی پئی گھٹو گھٹ پنجاب وچ پیپلز پارٹی دی وزیراں دی چھٹی کروا کے ایتھے اتحاد توڑ دتا جاوے۔ نواز شریف نے دسیا پئی اوہناں نے اوہناں وچوں کوئی صلاح وی نہیں منی تے بڑی احتیاط نال ٹرے رہے تے چاہیا پئی سسٹم کسے طرحاں چالو رہوے تے بس اینا ہی کہنا بہت سمجھیا پئی صدر زرداری '' جمہوریت لئی بہت وڈا خطرہ نیں ''۔
میں نواز شریف توں پچھیا پئی کیہ ہن پیپلز پارٹی نال گل بات دے بوہے بند ہو گئے تے اوہ مسکائے میں پچھیا پئی کیہ چارٹر آف ڈیموکریسی تے عمل راہیں ہن وی مسئلے حل ہو سکدے نیں تے میاں نواز شریف دا جواب ایہہ سی پئی چارٹر آف ڈیموکریسی اک انج دا حل ہے جیہدے نال ایہہ سارے مسئلے نبڑ سکدے نیں۔ میں فیر پچھ لیا پئی آئینی کمیٹی نے اپنا کم پورا کرن لئی مارچ دی ڈیڈ لائن دتی ہوئی ہے کیہ تسیں اودوں تیکر دے نتیجیاں نوں اُڈیکو گے۔ میاں نواز شریف نے کہیا ایس ویلے تیکر بہت کویل ہو گئی ہووے گی۔ چارٹر آف ڈیمو کریسی تے عمل تے ایسے مہینے ہوونا چاہی دا۔ مسلم لیگ نون دے حلقیاں دا ایہہ خیال ہے پئی آئینی کمیٹی مارچ تیکر وی کم مکا نہیں سکے گی۔
میاں نواز شریف نال ایس لمی چوڑی ملنی توںمگروں میرا ایہہ خیال سی پئی حکومت کولوں اپنے فیدیاں دے کم وی نہیں ہورہے ایہدے توں وڈی نااہلی کیہ ہوسکدی ہے۔ ججاں دیاں تقرریاں دے حوالے نال چارٹر آف ڈیموکریسی وچ جوڈیشل کمشن دا خیال دتا گیا ہے۔ جیہدے وچ پارلیمنٹ نوں ایہناں تقرریاں تے بہتی اہمیت دتی جاوے گی فرض کرو جے چارٹر آف ڈیموکریسی تے عمل ہو گیا ہوندا تے ایہہ مسئلہ ہی نہ بن دا۔
میاں صاحب نال عدلیہ تے حکومت دے جھیڑے تے وی گل بات ہوئی اُس دن ایہہ معاملہ بڑا زوراں تے سی ہن تے خیر وردی والیاں، وزیر اعظم گیلانی تے صدر ہوراں دی سانجھ تے اعتزاز احسن دی صلاح نال ایہہ معاملہ ٹھنڈا پے گیا۔ ایس ویلے مسلم لیگ نون دا پینترا ایہہ ہے پئی چیف جسٹس دے کہن موجب ججاں دی تقرریاں کیتیاں جاون میں میاں صاحب نوں سوال کیتا پئی پربندھیاں پارلیمان تے عدلیہ وچکار اختیاراں وچ پارلیمان تے پربندھی بے وس ہوندے جارہے نیں میاں صاحب نے مسکا کے آکھیا ایہناں اداریاں وچ توازن ہوونا چاہی دا میں فیر پچھیا پئی پی پی پی سمجھدی ہے پئی عدلیہ پارلیمان دے اختیار آپوں لے رہی ہے۔ میاں نواز شریف نے کہیا ایس معاملے تے بحث ہوونی چاہی دے ہے جیہدے لئی اک ہور ملنی ہوونی چاہی دی اے۔
میاں نواز شریف ہوون یاں ملک دے دوجے جمہوریت پسند ساریاں نوں فکر ہے پئی دساں سالاں دے جتناں صبر تے اُڈیک توں مگروں جیہڑی جمہوریت آئی ہے اوہنوں ٹوریا تے اک دھکے نال جاسکدا ہے پر اوہنوں واپس لیاونا سوکھا نہیں ہووے گا۔ صبر رواداری تے برداشت نال ہی ایہہ سسٹم چل سکدا ہے۔ حکومت غلطیاں کر رہی ہے پر لوکائی ساہمنے ہینے ہو کے اپنے فیصلے وی بدل رہی ہے۔ ایسے نوں جمہوری سپرٹ کہندے نیں آمرانہ دور وچ حکومتاں وچ لچک نہیں ہوندی۔ سدھر ہے ایہہ سسٹم چلے پر حاکم کجھ عوامی بھلیائی تے گوہ کرن۔
