Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> گھلدے ادارے تے تاجا حوالدار

گھلدے ادارے تے تاجا حوالدار

عامر ریاض
May 18th, 2014

آندے نیں جداں چنگیز خاں ہوری بغداد دے نیڑے اپڑے سن تاں بغدادی مسلمان اجہی بحثاں وچ رجھے سن جنج’’سوئی دے نکے تے فرشتہ کھلو سکدا ہے یا نہیں؟‘‘ چنگیز ہوراں نوں کیہہ چاہیدا سی چوپڑیاں اتے اوہ وی دو، دو۔ بس اس فیتی فیتی ہوئی اتے گھلدی سوسائٹی دا کھان بچہ کوہلو کر چھڈیا۔ اینج جاپدا ہے پئی ملک پاکستان وچ اجہے’’بغدادی مسلماناں‘‘ دے پچھلگ اج کل بڑے تیز ہوئے نیں۔ جیہڑی لڑائیاں ملک پاکستان وچ آج کل ہورہیاں نیں ایس بارے تے کدی سوچیا وی نہیں سی۔ اک دوجے نوں کھلم کھلا گلاں کڈہیاں جا رہیاں نیں۔ کافر، غدار، وطن ویری، مذہب ویری تے پتہ نہیں کیہڑے کیہڑے الزام اک دوجے تے لائے جا رہے نیں۔ اج اساڈا’’آزاد میڈیا‘‘ وی پورا ننگا ہوگیا ہے اتے اداریاں دے اندر بیٹھے’’گھس بیٹھیاں‘‘ نقاباں نوں الٹ دتا ہے۔ چاروں پاسیوں ہر کوئی زور لا رہیا ہے تے آپدی آپدی ریڈ لائناں ہر کوئی کراس کیتی بیٹھا ہے پر آپدے ول تکن دی تھاں دوجیاں ول اشارے کریندا پیا ہے۔ عمران خان دی پریس کانفرنس ایہناں حرکتاں دا تازہ ثبوت ہے۔ اج پتہ چلیا ہے پئی مشرف کیوں2013دی چوناں توں پہلاں ایتھے ول منہ کیتا سی۔ طاقت دے کھڈاری دو دھاری تلوار بناون وچ ماسٹر ہوندے نیں۔ اوہ جاندے سن پئی جے عدالتاں مشرف نوں چھڈیا تاں عدالتاں نوں بھنڈیا جا سی۔ جے حکومت مشرف تے کیس نہ بنایا تے حکومت مخالفتاں نوں ودھایا جا سی اتے جے عدالتاں تے حکومت رل مل کے مشرف نوں قابو کیتا تاں فیر کھیڈ’’سول ملٹری لڑائیاں‘‘ دی آڑاں وچ اگے ودھ سی۔ ایس لڑائی نوں ہر سرکاری تے غیر سرکاری ادارے وچ ودھانا وی ایسے ایجنڈے دا دوجا حصّہ سی۔ میڈیا تے مولویاں وچ بہوں تگڑی سرمایہ کاریاں سن تاں مارے یقین سی پئی پرانے تاجے حوالدار اخیر کس دن کم آون گے۔
اک تکلیف ایہہ وی سی پئی ایہہ 65ورہیاں بعد جیہڑا’’پہلا جمہوری تسلسل‘‘ پاکستانیاں ویکھیا ہے اوہ کتھے ایس تے پکے ہی نہ ہو جاون۔ بس نرا اک سال اوکھے سوکھے ہوکے کڈھیا اتے مشرف دی عدالتی پیشی توں بعد اینج جاپدا ہے پئی’’صبر دا پیمانہ پورا ہوگیا‘‘۔ پہلاں تے مشرف حمائیتاں لئی’’مہاجر کارڈ‘‘ چلا گیا تے ایم کیو ایم ورگیاں نوں نال جوڑ کے ایہہ دسیا پئی’’مہاجر‘‘ نال زیادتیاں ہورہیاں نیں۔ جداں پچھیا گیا پئی عبدالقدیر وی مہاجر ہی سی تے حضرت اس کولوں ٹی وی تے بلا کے معافیاں منگوایاں سن۔ اج جداں شکنجے وچ آپوں پھسیا ہے تے آپدا مہاجر پچھوکڑ یاد آگیا ہے۔ جداں ایہہ وار خالی گیا تاں’’سول ملٹری تعلقاں‘‘ دا ہتھیار کڈھ لتا۔ ایہہ آکھیا گیا پئی سیاستدان فوج دے خلاف نیں۔ ایہہ تاثر دین وچ وڈے وڈے سیکولر وی پیش پیش سن پئی چاروں مارشلاء سیاستداناں دی حرکتاں پاروں لائے گئے سن۔ سوال ایہہ ہے فوج’’متنازعہ‘‘ کنج ہوئی؟ 1950وچ تے’’فوج‘‘ متنازعہ نہیں سی ہوندی۔ لوگ مال روڈ لہور تے آپدے بچیاں تے زنانیاں نال فوجی پریڈ ویکھن وی جاندے سن، فوجیاں نوں سلوٹ وی ماردے سن۔ 1960توں 2013تیک اخیر اوہ کیہڑیاں گلاں واپریاں سن کہ جس پاروں فوجاں دی عزتاں گھٹ گیاں۔ سب جاندے نیں ایس وچ غیر سیاسی تے پروفیشنل فوجیاں دا کوئی دوش نہیں۔ ایہہ سب کیتا دھریا تے چار جرنیلاں اتے انہاں نال جڑے چند افسراں دا ہے پئی انہاں نرا آپدے اقتداراں لئی ’’فوج‘‘ دے ادارے نوں رگیدیا ہے نرا اقتدار دے مزے لین لئی کیانی ہوراں بڑی مشکلاں نال ایس کھوبے توں کڈھیا سی پر مشرف دی واپسی بعدوں گل مڑ اتھے ہی آن کھلوتی۔ جو کجھ اج پاکستان وچ ہورہیا ہے ایہہ سب اک وڈا کھوبہ ہے۔ ایس کھوبہ نوں ڈونگا کرن والیاں دی نظر ملک دے اندر تے ہے پر ملک دے ارد گرد تیزیاں نال بدل چکے منظراں تے نہیں۔ اک پاسے بی جے پی بھاری مینڈیٹاں نال نریندر مودی دی قیادتاں وچ سر چک چکی ہے اتے اگلے مہینے جون وچ افغانستان دے صدر دا فیصلہ ہورے عبداللہ عبداللہ دے حقاں وچ ہوسی۔
پاکستان وچ جے ادارے اینج ہی گھلدے رہے تے اجہے حالات نال نجھٹن دی پالیسیاں کون بنا سی؟ اج تے ایہہ گل لوڑی دی ہے پئی پاکستان دے سارے جی، سیاستدان، فوجی، میڈیا، عدالتاں اک مک ہوکے پالیسی بناون۔ مودی دی پٹاری کھلن والی ہے اتے ایس وچوں نکلن والا’’سپ‘‘ تبت(چین) والے بارڈر ول جا سی یا واہگے ول آسی ایس دا کجھ پتہ نہیں۔ ایہہ وی نہیں پتہ پئی مودی دی پٹاری وچ کڈے’’سنپولیے‘‘ نیں۔ دوجے بنے غنی آئے یا عبداللہ عبداللہ افغان بارڈر تے کیہہ ہونا ہے ایہہ وی اک وڈا سوال ہے۔ اجہے وڈے سوالاں بارے نہ تے کوئی اک ادارہ اکلا پالیسی بنا سکدا ہے نہ ہی ایس نوں اج 21ویں صدی وچ باقی ادارے منن گے۔ جے اجہے فیصلیاں وچ پاپولر سیاسی جماعتاں رلتی نہ ہون گیاں تے اوہ توڑ نہیں چڑھن گے۔ تاں مارے لوڑی دا ہے پئی سب’’سوئی دے نکے تے نچن والے فرشتیاں‘‘ والی بحثاں نوں پراں کرکے سر جوڑ کے بیٹھن۔ پر تاجے حوالدار نوں کون سمجھائے بھلا؟ اوہ تے آپدے پرانے بدلے لین وچ’’بغض معاویہ‘‘ نوں گل لا کے بیٹھا ہے۔ اوس نوں ایہہ سمجھنا لوڑی دا ہے پئی جداں مسئلہ سر تے پئے جاندا ہے تاں فیر پالیسی نہیں بن سکدی۔ بھرنویں وڈی پالیسیاں اودوں بنائی جا سکدیاں نیں جداں پالیسیاں نوں بہوں ساری آپشناں نوں سامنے رکھ کے بنایا جائے۔ ایس رلت پاروں ہی انہاں پالیسیاں وچ برکتاں پیندیاں نیں۔ پالیسیاں اوہی چلدیاں نیں جیہڑیاں سب رل مل بنا دے نیں اتے جتھے ادارے گھلدے رہن اتے رل مل بیٹھن دا پربندھ نہ ہوئے اتھے’’باہرلیاں دی موجاں ہوندیاں نیں۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels