Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> مکے گیاں گل مُکدی ناہیں

مکے گیاں گل مُکدی ناہیں

مقصود ثاقب
December 10th, 2014

سرکارں جے بالاں نوں ماں بولی وچ پڑھان وی لگ پین تاں جیہڑی پڑھائی لکھائی ایس ویلے چلدی پئی اے، بالاں نوں جیہڑے اڈے لاندی پئی اے۔۔۔ ساری بدل جاسی؟ ایہدا ٹیچا لوک پکھی ہو جاسی یاں اوہ ٹیچا بن جاسی جیہڑا لوک کُھل دے سیانے متھدے نیں؟نہیں اصلوں نہیں۔
اینا ای ہو سی سرکاری ہتھ جیہڑا اجے اُتوں اُتوں بالاں دی سمجھ سُرت توں لاپردہ اے ڈونگھا ہو کے جڑا ں نوں وی کھگن لگ پوسی۔ سرکار اپنیاں غرضاں پوریاں کرن لئی ماں بولی نوں وی اپنا اوازار بنا لیسی۔ بالاں نوں پڑھن لکھن وچ جیہڑی سوکھ آوسی اوہدا لابھ وی نرا پُرا سرکار نوں ای جاسی۔ ایہدی پرکھ کرنی ہووے تاں ایس ویلے جیہڑیاں ماڑیاں موٹیاں ماں بولی دیاں کتاباں پنجابی یاں کسے ہور سرناویں نوں مضمون بنا کے کجھ جماعتاں لئی پروانیاں ہوئیاں نیں ویکھیاں جا سکدیاں نیں۔ کیہ وچارنیں ایہناں وچ جچڑھیاں لکھتاں دے؟ کنے کو وکھ نیں چالو پڑھائی ویہار دے وچاراں توں؟
نر ابھیڑی چنگی بولی ای بدلی ہوئی اے باقی تاں اوہا کجھ اے۔ بندے تے جگ بابت اوہو سوچ نہیں جیہڑا پڑھائی لکھائی دا بھارا دھارا پیار ورتاوندا اے؟ اردو تے انگریزی بولی دا ورتن پیا چلاوندا اے؟ سرکاری پڑھائی ویہار دا کُل پربندھ اوسے ٹیچے موجب اے جیہڑا سرکار نوں وارا کھاندا اے۔
سرکار کیہڑی اے؟ پُرانے کالونی گیر ویہار دی وارث۔ ایس وراثتی کالونی گیراں توں وی ڈھیر اگے لنگھی ہوئی۔ کالونی گیراں نوں تے فیر کوئی کانو ماردی سی اوبھڑ تھاویں راج گھوکاون لئی۔ پورا سچ ویکھنا ہوندا سی، اوہدا تروڑ کرن لئی، لوکاں نوں اپنے جولے تھلے رکھن لئی ڈھیر اُچیچ تے آہر کرنا پوندا سی۔ ساڈی سرکار نوں تاں اجیہی کوئی کانو نہیں ماردی۔ ایہہ تاں ایتھاویں (لوکل) اے۔ کسے سچ، کسے حقیقت دی پرواہ نہیں ایہنوں اپنے لابھاں لئی لوکائی نوں نیپڑی رکھن باجھ۔ ایتھاویں سرکار نے پڑھائی لکھائی دا پڑ انگریزی راج توں وی سوڑا کر دتا ہویا اے۔
کُل لوک بولی نوں کیلنا ایہناں دے وس دی گل نہیں ایس کر کے انگریزاں دیاں لاگو کیتیاں اُتلی ہیٹھلی پدھر دیاں بولیاں نال ای کم چلاونا سوکھا پیندا سُو۔ سرکار دا ورتارا ای لوکائی نوں محتاج رکھنا اے ایس کر کے پڑھائی لکھائی راہیں دی ایہہ محتاجی ای ورتاندی اے۔ ایہہ محتاجی اے چالو میل بند (طبقاتی) ویہار نال رس مس کے ٹُرے رہن دی۔ غلامی نہ سہی (محسوس) کرن دی۔ ویہار نال گجھ کے رہن دی۔
دنیا دے سیانے آکھدے نیں پڑھائی لکھائی دا آہر اصل وچ بندے دی کھُل دا آہر اے۔ ایہدے وچ بندے دی بولی نوں لیاون دا مطلب اے بندے دا بندے وجھوں اگے انا۔ ایہدے لئی پڑھائی لکھائی دیاں نیہاں خیالاں، بھرماں تے وہماں اُتے نہیں سگوں پُنے نتارے سچ اُتے ہوون۔ بندے بارے وی تے جگ بارے وی۔
پڑھائی لکھائی توتے رٹ دی تھاں سُنن سوچن دا وسیلا بنے۔ ایہہ وسیلا پچھاں نال بندی اے۔ پچھاں استاد شاگردی دی اُچ جھلک نال نہیں جاگدیاں۔ ایہناں لئی دوہاں دِھراں دا ساویاں ہوونا ات ضروری اے۔اُستاد شاگرد بنے تے شاگرد اُستاد۔ دوویں اپنی تھاں نت وٹائی رکھن۔ کے دی تھاں وی پکی تے ان وٹاویں نہ ہووے۔ سارا معاملہ سماج اُساری دا اے۔ نج اُساری دا نہیں۔ سماج اُساری سر بھرنے ہوندی نوں پیراں پرنے کرن دا آہر اے۔
(بشکریہ: روز وار لوکائی)


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels