Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> علی پور چٹھہ توں پارلیمنٹ تائیں

علی پور چٹھہ توں پارلیمنٹ تائیں

ڈاکٹر صغرا صدف
December 23rd, 2014

سڑک دے دوواں پاسے نِمے نِمے چانن وچ ایہہ طے کرنا مشکل تے ضرور سی پر ایہہ اندازہ لانا اوکھا نہیں سی کہ ایس دھرتی دی کُکھ بنجر نہیں۔۔۔ سگوں ایہدا من اوس تخلیقی قوت دی نِرمل کونپلاں نال بھریا ہویا اے جس پاروں زمین دی زرخیزی پورے ماحول نوں شادابی عطا کر دیندی اے، ویکھیا جائے تے ہر علاقے دی زمین اک خاص مزاج دی حامل ہوندی اے تے اوہدا رنگ اوتھے دے لوکاں دے مزاج وچ رچ وس جاندا اے۔ محبت کرن والے، سدھے سادھے لوک جیہناں نوں سنہری دُھپ، ٹھنڈی چھاں، شام تے سویر دے ویلے، دن چڑھن تے ڈھلن دے منظر تے چن ستاریاں دی سنگت حاصل اے۔ جیہڑے فطرت نال جڑے نیں تے جیہناں تے فطرت دی خاص عنایت اے۔ اوہناں دی بولی اوتھے دی زمین، رہتل تے موسماں دی عکاس اے ایس لئی اوہ ہر ویلے فطرت نال گلاں کردے رہندے نیں۔ دھرتی نال ایہہ جڑت اوہناں نوں اوہ سچائی تے دانش عطا کردی اے جیہڑی کتاباں تے سکولاں وچوں نہیں لبھدی۔ ایہہ علاقہ علی پور چٹھہ دا پِنڈ ورپال اے جتھے لوک سیوا دی راہ تے ٹُرن والا اک صوفی ڈاکٹر سلیمان عبد اللہ ڈار نگِھے خلوص تے پریم دے پھُل لئی ایس قافلے نوں جی آیاں نوں آکھ رہیا سی جیہڑا اوہدی نویکلی کتاب دی مُکھ وکھالی تے مشاعرے دے سلسلے وچ اوتھے اپڑیا سی۔ اوہدی ذات خوشی، سرشاری تے شکر دے احساس وچ گُنّھی ہوئی سی۔ ایس کتاب دی مُکھ وکھالی لاہور وچ وی ہو چکی سی پر ایس دور دراڈے علاقے وچ دوجی واری ایس تقریب دا پربندھ اصل وچ ساڈے جیہے فطرت توں وِچھڑے لوکاں نوں فیر اوہدے نال کلام کرن تے اوہدے ول پلٹن دی ترغیب دینا سی۔ جٹ برادری دے ایس اکثریتی علاقے دے لوک نہ صرف محبت کرن والے سگوں سارے تعصباں توں اُچیرے سن۔ میں اجے ڈاکٹر صاحب دی کتاب دے روحانی کیف تے ایس شہر دے سچے شاعراں دی خوبصورت شاعری دے سحر وچ گواچی ہوئی ساں کہ اسلام آباد توں سُنیہا آ گیا جتھے پارلیمنٹ ہاؤس وچ ماروی میمن نے اسٹینڈنگ کمیٹی دی اک میٹنگ رکھی سی۔ ایہہ کوئی روٹین دی میٹنگ نہیں سی سگوں تاریخی فیصلیاں ول ودھدی ہوئی کارروائی سی جیہدے وچ سارے صوبیاں دیاں زباناں دی نمائندگی کرن والے سرکاری تے غیر سرکاری اداریاں دے سربراہ موجود سن جیہڑے وار و واری بریفنگ راہیں اپنی اپنی زبان دی اہمیت دس رہے سن۔ ایہہ اوہ میٹنگ سی جیہڑی پاکستان بنن توں فوراً بعد ہونی چاہیدی سی پر زمینی حقیقتاں توں ناآشنا کجھ سوجھواناں نے ایس پاسے توجہ دوان دی بجائے اوہدے اُلٹ فیصلے کرن بارے مشورہ دِتا۔ ایس طرح ایس میٹنگ دے ہون وچ کجھ چِر ہو گیا سی تے ایس دیر پاروں پاکستان توں بنگال وکھ ہو کے بنگلہ دیش بن گیا۔ جے اوس ویلے اردو نوں رابطے دی زبان قرار دے کے باقی ساریاں وڈیاں زباناں نوں قومی زبان بنا دِتا جاندا تے خورے اج حالات کجھ ہور ہوندے۔ ایس میٹنگ دی روحِ رواں ماروی میمن سن جیہناں نوں ساریاں حقیقتاں دا علم سی تے جیہڑیاں ذاتی تے سرکاری حیثیت نال ایہنوں توڑ چاڑھن دی خواہشمند سن۔ سید عامر حسین تے نعیمہ توں اڈ باقی ممبر تے صرف خانہ پری لئی اوتھے موجود سن تے ایہہ مسئلہ اوہناں دا مسئلہ وی نہیں سی ایس لئی اوہ اردو نوں ای قومی زبان دا درجہ دین تے ڈٹے ہوئے سن۔ ایہہ اک اٹل حقیقت اے کہ اردو زبان راہیں پاکستان وچ جِناں لٹریچر ہو چکیا اے اوہنوں بالکل نظرانداز نہیں کیتا جا سکدا، اوہدی اپنی اک منی پرمنی حیثیت اے پر ایہنوں قومی زبان آکھنا ٹھیک نہیں کیوں جے نیشنل زبان اوہ ہوندی اے جیہڑی کسے خاص قوم دی زبان ہووے تے جیہدا تعلق دھرتی نال وی ہووے جد کہ ایتھوں دیاں وڈیاں زباناں پنجابی، بلوچی، سندھی، پشتو وغیرہ نیں ایس لئی ایہہ قومی زباناں نیں۔ ماروی میمن نے پچھلی حکومت وچ وی ایس حوالے نال اک بل پیش کیتا سی پر اسمبلی ممبران دی دلچسپی نہ ہون پاروں پاس نہ ہو سکیا۔ موجودہ حکومت دی ایس حوالے نال بھج نَس ایس گل ول اشارہ کردی اے کہ اوہ پاکستان دیاں وڈیاں زباناں نوں قومی زبان دا درجہ دین وچ مخلص اے پر ایہدے لئی حکومت نوں خاص ہوم ورک یعنی اپنے ممبراں نوں قائل کرن دی بہوں لوڑ اے۔ سوجھواناں تے زبان دے ماہراں نے اپنی کھوج مکمل کر رکھی اے تے جیہناں مسئلیاں دے باعث اج تک تاخیری حربے آزمائے جا رہے نیں اوہناں دا حل ٹیکسٹ بکس راہیں کڈھیا جا سکدا اے۔ اک صوبے وچ جے اک توں چوکھیاں زباناں یا لہجے رائج نیں تے درسی قاعدے راہیں ایہدے تے قابو پایا جا سکدا اے۔ پنجاب دی گل کریئے تے جغرافیائی طور تے ایتھے دی زبان اک ہزار سال توں سٹینڈرڈ زبان دا درجہ حاصل کر چکی اے پر فیر وی کسے اک لہجے دی اُچیائی نہیں ہونی چاہیدی سگوں ایہدے وکھرے وکھرے لہجیاں یعنی ماجھی، لہندی، پوٹھوہاری، چھاچھی، دوآبی تے ہندکو دی بھرویں نمائندگی ہونی چاہیدی اے تے ایس مقصد لئی ابتدائی قاعدے وچ ہر ضلع یاں ڈویژن دی سطح تے اوتھے دے لہجے دی عکاسی ہونی چاہیدی اے تاں جے سٹینڈرڈ زبان دے نال نال اوس علاقے دے مخصوص لہجے دی وی ترجمانی ہو سکے۔ ایسے طرح سرائیکی دا مسئلہ وی حل ہو سکدا اے۔ ایس توں اڈ ایہہ وی یاد رکھنا چاہیدا اے کہ سارے صوفی شاعراں نے جس زبان وچ شاعری کیتی اے اوہنوں پورے پنجاب دے عوام سمجھدے نیں۔ صوفی دا پیغام پوری لوکائی دا اثاثہ اے، ایہدے وچ تے مذہب دی وی تفریق نہیں تے فیر اوہ خواجہ فریدؒ جیہڑے ایہہ آکھن ’زیر بن زَبر نہ بن متاں پیش پوی‘ اوہناں نوں کیویں ونڈیا جا سکدا اے؟ جے خواجہ فریدؒ نوں کسے خاص علاقے تک محدود کرنا مقصود اے تے فیر شاہ حسینؒ نوں کس علاقے نال منسوب کیتا جائے گا؟ پنجاب دے حوالے نال ایتھے دی زبان پنجابی اکھواندی اے۔ ایہہ مخصوص لوکاں دی زبان نہیں، ایہہ پورے پنجاب دے لوکاں دی ترجمانی اے، تسیں ایہنوں ماں بولی آکھو یاں سرائیکی آکھو سانوں کوئی اعتراض نہیں صرف ایہنوں لاگو کراؤ۔ اسلام آباد دیاں سڑکاں تے بار بار بھُلن تے میرا ڈرائیور بار بار آکھدا، عجیب اَنھا جیہا شہر اے پر مینوں ایہدا مصنوعی پن چوکھا چُبھدا اے جیہڑا ایہدیاں عمارتاں تے فضاواں توں دلاں تک اپڑ چُکیا اے۔ بھاویں ایہہ سارے صوبیاں دا ترجمان اے پر صوبیاں دی کوئی پچھان ایہدی کسے سڑک یاں عمارت دے متھے تے نظریں نہیں آؤندی۔ ایہنوں زندہ تے مانوس بنان لئی صوبیاں دے مختلف ثقافتی رنگ ایہدیاں عمارتاں تے سڑکاں دی رونق بنان دی لوڑ اے۔ خورے ایس طرح ایس شہر دی اجنبیت وچ کوئی اپنا پن پیدا کیتا جا سکے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels