Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> امن دیہاڑ۔۔۔؟۔۔۔26 دسمبر

امن دیہاڑ۔۔۔؟۔۔۔26 دسمبر

روز وار لوکائی
December 26th, 2014

قومی مصالحتی کونسل دی تقریب وچ مختلف مسلمان، عیسائی تے سکھ بلیاراں نے تقریراں کردیاں جتھے 16 دسمبر نوں ہون والے پشاور دُکھانت دی نندیا تے شہیداں تے اوہناں دے ساکاں نال اک سرتا دا وکھالا کرن دی گل کیتی اوتھے ایس دُکھانت دی یاد وچ اج جمعے دے دن نوں ’’امن دیہاڑ‘‘ وجوں متھیا اے۔
دیہاڑ مناون دا رواج بہت پرا اے۔ اج دے دور وچ جتھے اقوام متحدہ ولوں بہت سارے دیہاڑ منائے جاندے نیں، اوتھے مقامی طور اُتے وی کئی دیہاڑ منائے جا رہے نیں۔ پشاور دے دُکھانت دے موقعے اُتے پوری قوم نے سوگ منایا تے ایس واقعے دے بعد دے اثرات اجے تیکر چل رہے نیں۔ مشکوک لوکاں دی گرفتاری دا سلسلہ تے جاری ای اے سیاستداناں دی بیان بازی واسطے وی اک بھرواں موضوع ہتھ آیا ہویا اے تے ایہدے اُتے سیاست چمکائی جا رہی اے۔ اودھر شمالی علاقیاں ول فوجی اپریشن دی کارروائی وی ودھا دتی گئی اے۔ ہُن قومی مصالحتی کونسل ولوں امن دیہاڑ مناون دا وی پک کیتا گیا اے۔
حقی گل تے انج اے کہ ایس قوم نوں امن دیہاڑ دی نہیں سگوں ’’امن سال‘‘ مناون دی لوڑ اے۔ ایہہ اوہ دیس اے جتھے کسے وی مذہب دے منن والے محفوظ نہیں۔ سنی عقیدے دے لوکاں دے اکثریت ہون دے باوجود نہ اوہناں دی جان تے مال محفوظ اے تے نہ ای کوئی شیعہ، دیو بندی، وہابی، سگوں ہزارے وال، عیسائی، قادیانی، ہندو تے سکھ وی سلامتی دی کوئی ضمانت اے۔ مسلماناں دے فرقے آپس و چ لڑ ای رہے نیں، عیسائیاں نال جو کجھ ہو رہیا اے اوہدے اُتے بھگیاڑ وی پناہ منگدا اے۔ ہزارے وال اپنے قتلام دا ماتم کردے نیں، قادیانی توبہ توبہ کردے نیں۔ ہندوواں دیاں مٹیاراں چک کے زبردستی مسلمان بنا کے اوہناں نال ویاہ رچا لئے جاندے نیں، شمالی علاقیاں و چ سکھاں کولوں جزیا وصول کیتا جاندا اے۔ ایہہ تاں مذہبی بنیادی، لسانی بنیاد ویکھو تاں پنجابیاں نال باقی صوبیاں وچ جو سلوک ہوندا رہیا اے تے ہو رہیا اے، اوہنوں کیہ آکھیا جاوے۔ بلوچستان وچ شناختی کارڈ ویکھ کے پنجابی قتل ہو رہے نیں، سندھ اندروں پنجابیاں نوں نسا دتا گیا اے۔ سندھ وچ ای اردو بولیندڑ تے سندھی والے اک دوجے نال مجبوراً ای امن نال رہندے نیں۔ ایہہ سارا کجھ ثابت کردا اے کہ ایہہ دیس دوزخ دا منظر پیش کر رہیا اے۔۔۔۔
ایس سارے مسئلے دا اکو حل اے کہ لوکاں وچ برداشت پید اکیتی جاوے۔ ایہہ کم سبھ توں مشکل کم اے۔ تعلیم تے میڈیا راہیں دوجیاں خلاف نفرت کھلارنا بہت سوکھا کم اے تے بیتے ستر سال توں ایہو کجھ ہو رہیا اے۔ لوکاں دے ذہن اپاسی ہو چکے نیں، اوہ سوائے اپنے عقیدے تے مسلک دے کسے نوں جین دا حق دین لئی وی تیار نہیں۔ اجیہی صورت حال وچ حکومت نوں اک بھرویں کمیٹی قائم کرنی چاہیدی اے جیہڑی اوہناں بنیاداں دی سوہ لائے جیہناں پاروں لوکاں وچ برداشت مک گئی اے فیر اوہناں دے اُپا لئی بھرویں تے با مقصد جتن کیتے جاون نہیں تے ایس دیس وچ امن تے شانتی دا جیون سدا لئی خواب خیال ای رہوے گا۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels