Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> شِوّ دے اتھرو تے نواز شریف دے پنجابی شعر

شِوّ دے اتھرو تے نواز شریف دے پنجابی شعر

January 12th, 2017

وکی پیڈیا دسدا اے پئی کٹاس دا مندر بہت پرانا اے تے ایس دی تواریخ مہابھارت تیک جاندی اے تے پانڈو بھرواں نے ایتھے کئی ورھے جلاوطنی دے کڈھے تے مُڑ ایتھے کرشن وی آیا سی تے اوس شوِ لنگ دی پُوجا وی ایتھوں شروع کیتی۔ ایہہ مندر شوِّ دے ناویں لگا ہویا اے۔ اک ریت ایہہ ہے پئی جد شوِّ دی بیوی ستیّ موئی شوِّ ایہناں رویا تے اینا چر رویا تے پھیر اوہدے اتھرواں نال دو پانی دے تلاب بنے تے ایہہ تلاب اوہناں وچوں اک ہے۔ ایہہ بہت وڈی تھاں سی تے ایتھے بہت وڈا میلہ لگدا سی۔

اج ساڈے وزیراعظم نواز شریف نے ایتھے اقلیتاں دے حق وچ تقریر کیتی تے کجھ پنجابی دے شعر پڑھے۔ پہلاں اوہناں پڑھیا،’ مکے جایاں گل مُکدی ناہیں جد تک دلوں مُکایئے نہ، ‘ ایس نال جُڑے تن ہور شعرپڑھے۔ پھیر اوہناں جگ دُھمیا شعر پڑھیا:

مندر ڈھاہ دے،مسجد ڈھاہ دے، ڈھاہ دے جو کجھ ڈھیندا
اک بندیاں دا دل نہ ڈھائیں،رب دلاں وچ رہندا

ایہہ شعر پہلی وار کسے وزیراعظم نے اکٹھ وچ پڑھیا اے۔ضیاالحق توں پہلاں ایہہ شعر عام سُنن وچ آوندا سی پھیر ساڈے چیتے توں لہہ گیا تے وسر وی گیا ۔خاص کر ساڈے نوجواناں نوں ایہہ تے ایس طراں دی شعری ریت تے کُھل دلی نوں دسن دی بہت لوڑ اے۔ وزیراعظم نے اج مُڑ ریت چیتے کرائی اے کیوں جے اوہ آپ وی اوس ریت دے جم پل نیں۔اوہناں دے گھر پنجابی بولی جاندی اے۔ اوہناں اسلام بارے جو گلاں کیتاں اوہناں نوں وی مُڑوار وار کرن دی لوڑ اے۔اوہناں دا ایہہ آکھنا پئی میں نرا مسلماناں دا وزیراعظم نہیں آں میں سارے پاکستان دا وزیراعظم آں۔ نالے رب کلا مسلماناں دا نہیں اے اوہ دوجے مذہباں دا وی اے۔اصل گل بندہ تے بندیائی اے۔

مریم نواز دا ٹوئیٹ دسدا اے نواز شریف پہلے وزیراعظم نے جیہڑے کٹاس راج مندر آئے نیں تے ایتھے اوہناں پانی دے منصوبے دا ہوکا(اعلان) وی دتا۔

سوال ایہہ ہے پئی کجھ دن پہلاں اوہناں ’ضرب قلم‘ کانفرس کیتی تے اتواد خلاف لکھن دی گل کیتی تے ہن اج دیاں گلاں کیہہ ریاست دا کہان(بیانیہ) بدل رہیا اے؟ کیہہ وزیراعظم کجھ گلاں کجھ ہور ریاستاں تیک اپڑانا چاہندے نیں؟ کیہہ اوہ جگ نوں اک نواں پاکستان وکھا رہے نیں؟ جیہڑا اقلیت دوست اے جیہڑا بندیائی تے بندے دے آدر اُتے کھلوتا ہویا اے۔ وزیراعظم جو آکھدے پئے نیں اوہ ایہناں وی ان ہونا نہیں،ایہہ قدرتی گلاں نیں پر کدی ہویاں نہیں۔ جاپدا اے نوازشریف کہان بدلنا چاہندے نیں۔

اک ہور گل جو لگدی اے اوہ ہندوستان نال تعلق دی اے۔کٹاس راج وچ اپنی گل بات راہیں اوہناں اک تیر نال دو شکار کیتے نیں۔ اک تاں اوہناں مودی سرکار نوں دسیا اے پئی میں مندر وی جا سکدا آں تے اقلیتاں دا ہمدرد آں۔ دوجے بنیّ ویکھو اسیں مندراں دا کناّں آدر کردے آں ایس لئی تہاڈے تے ہندوستان نال وی دوستی کرنا چاہندے آں۔ اپنی ساری گل بات لئی کٹاس مندر دی چون بڑے مطلب رکھدی اے۔کٹاس راج دی ہندواں وچ خاص مقام اے تے وزیراعظم نے اوس تھاں نوں وی چھیڑیا اے۔

ہن رہ گئی پنجابی دی گل۔ ہن وزیراعلی شہباز شریف نوں وی کجھ شرم کرنی چاہیدی تے پنجاب دی بولی بارے کجھ وچار کرنا چاہیدا اے۔پر ایہہ گل پکی اے پئی ات واد تے کٹرتا دے ورودھ جو اسلحہ پنجابی کول اے اوہ کسی ہور بولی کول نہیں۔تے ات واد تے سوڑ خلاف سبھ توں وڈا ہتھیار ای پنجابی بولی تے ایس دے مہان لوک شاعراں دی لڑی اے۔


Share |


 

Depacco.com


 

 

Your Name:
Your E-mail:
Subject:
Comments:


Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels