Punjabi Wichaar
کلاسک
وچار پڑھن لئی فونٹ ڈاؤن لوڈ کرو Preview Chanel
    



مُڈھلا ورقہ >> شاہ مُکھی وچار >> کالم تے کالمسٹ >> ویل امر جیت چندن دی(شاعری ،ہڈ بیتی تے ویروا) ریکارڈنگ نال

ویل امر جیت چندن دی(شاعری ،ہڈ بیتی تے ویروا) ریکارڈنگ نال

ریڈیو پروگرام لوک لہر، مست ایف ایم103، لہور
February 10th, 2018

ٹوٹے اتے لشکارے
غدری پچھوکڑ،کیمونسٹ چھل تے نکسل باڑی گھلوگھاڑیاں توں لنگھ کے اچے سراں نوں کومل انگ دین والے چندن ہوراں نال اساں فروری دی اٹھ تریخ نوں اپنے جمعراتی پروگرام وچ لوڈے ویلےچار توں چھ وجے وچکار گل بات کیتی۔ ایس وچ نین سکھ، زبیر احمد تے اکرم وڑائچ وی رلت کیتی۔ تساں ایس پروگرام نوں وی سنو۔
ویڈیو لنک دا ٹوٹا
https://www.facebook.com/aamirr/videos/10155618124234032/
پنجابیاں نوں انگریزاں دے پنجاب تے قبضیاں بعدوں پردیس دا روگ لگیا، پردیس روگ ہوندا ہے
لہور وچ مشرقی افریقہ دا اک ٹھیکے دار جیون جی ہوندا سی،گجراتی خوجہ، اوہ ایتھوں پنج سو کاریگر بھرتی کر کے لے گیا سی1895وچ
میرے والد1929وچ اینج ہی نیروبی (کینیا)گئے سن، اوہ نکودر(جلندھر) دے واسی سن
والد ٹریڈ یونین نال جڑ گئے تے آگو بنے۔
میں کجھ چر پہلاں ہیر وارث شاہ دے ڈھائی سو ورہے پورے ہون تے ایس نوں مناون دا ہوکا دتا سی پت کسے میری گل نہ سنی، نہ ایتھے نہ مشرقی پنجاب وچ، پر اساں لندن وچ وڈا اکٹھ کیتا سی
اسی لندنی پردھان تعلیمی ادارے سکول آف افریقن تے ایشین سڈیذ(SOAS) وچ پنجابی سنگت نامی جتھے بندی بنائی ہوئی ہے
وارث شاہ کراں کیہہ صفت تیری
لکھن لگاں تے لگدے لفظ تھوڑے
تینوں آکھدے شاہاں دا شاہ وارث
بڑے جوڑے، جنہاں نیں ہین روڑے
اول حمد خدا دا ورد کر کے
قصہ ہیر دا نواں توں جوڑیا سی
میں آریا ہائی سکول نکودر پڑھیا اتے پنجاب دی جڑاں وچ تیل دین والی کوڑ لہر آریا سماجی تحریک ہے
ایہہ لالہ لاجپت رائے سی جس 1925وچ پنجاب نوں مذہبی بنیاداں تے ونڈن دی گل کیتی سی اتے اوس دا بیان اخباراں وچ چھپیا سی
میں1946وچ نیروبی جمیا تے کوئی گیارہ، بارہ سال دا سی جداں اسی نکودر آ گئے
1950دے دہاکے دے اخیری سالاں وچ مینوں دھرمی ونڈ دے اشارے نظر آون لگے سن، ہندو، مسلم، سکھ شناختاں نال جڑی سیاستاں جیہڑی بعدوں ہور تگڑی ہوئیاں
جناح صاحب نے دو قومی نظریہ لالہ لاجپت رائے توں لتا سی
مشرقی پنجاب وچ پنجابی صوبہ بناون دی لہر مگر سکھاں دی اکثریت دا صوبہ بناون دی ہشیار لہر سی
تاں مارے اوہ پنجابی صوبہ نہیں سگوں سکھ صوبہ بنیا
پنجابی زبان نوں جنہاں تسی پاکستانی پنجاب وچ سمجھدے ہو اوس د ے مقابلے وچ مشرقی پنجاب وچ ککھ وی نہیں
میرے وڈکے غدری سن، پیو کیمونسٹ پارٹی وچ سی تے جداں میں کالج وچ ساں تے ویتنام دی جنگ خلاف وکھالیاں پاروں اساں وی سیاسی ہو گئے۔ لگدا سی پئی ہن انقلاب نوں کوئی ڈک نہیں سکدا
1967وچ مغربی بنگال وچ چوناں پاروں کیمونسٹ پارٹی (ایم) دی سرکار بنی تے نال ہی نکسل باڑی لہر کھڑی ہو گئی
نکسل باڑی والے بہوں اتاولے سن۔طوطے وانگ انقلابیاں نوں ماؤ دی لکھتاں رٹیاں سن
ایہہ لہر سی پی آئی(ایم) خلاف سی تے انہاں اوس نوں دبانا ہی سی
آندھرا پردیش ورگی غربتاں وچ ڈبیاں تھاواں تے نکسل باڑی لہر دا کجھ جواز سمجھ آندا ہے پر پنجاب وچ ایس دی کوئی لوڑ نہیں سی
سکھاں گرواں ویلے توں شہیدیاں ویکھیاں نیں تے ہورے انہاں نوں ہر ویہہ، پنجھی سال بعدوں کجھ ہون لگدا ہے۔ کدے نکسل باڑی لہر چل پیندی ہے تے کدی خالصتانی لہر
ہک ہور ویڈیو ٹوٹا
https://www.facebook.com/aamirr/videos/10155619014514032/
پنجاب میرا تے دنیا جڈا
پنجاب میرا انہد ہے
ایس وچ سبھو دریا بہندے
ایس وچ ہر کوئی پنجابی وچ چپ سندا ہے
ایہہ کسے فقیر دی صد ہے
جڈی دلیلاں مسلح جدوجہد والیاں کول نیں اڈیاں ہی دلیلاں انہاں کول جیہڑے سیاسی تے جمہوری جدوجہداں کردے نیں
اوروبیندو گوش تے بھگت سنگھ ہوراں بماں تے پستولاں والے راہ نوں بعدوں رگیدیا سی۔ بھگت سنگھ دی چٹھی وی ریکارڈ تے ہے ایس بارے۔اوس پنجاب دے طالب علماں نوں سیاسی جدوجہد دا آکھیا سی۔ اوس آکھیا سی جتھے بندیاں بناؤ، کسے پلس والے، جاگیر دار، وعدہ معاف گواہ یا سود خور نوں قتل کرن نال کوئی تبدیلی نہیں آئے گی۔پراوس دی ایہہ گلاں بھلا دتیاں گیاں
اک اکھان ہے، پئی بھگت سنگھ گھر گھر جمے، پر گوانڈیاں دے گھر جمے
بھگت سنگھ آکھیا سی انقلاب دی تلوار عقل دی سان تے تکھی ہوندی ہے
مشرقی پنجاب دے ہر شہر وچ بھگت سنگھ دا مجسمہ ہے، اوس دا ذکر وادھو، پر جیہڑے سفنے بھگت سنگھ ویکھے اوس نوں کوئی جاننا نہیں چاہندا
اندرا گاندھی توں مودی تیک سب اوس دے مجسمے تے ہار پاوندے، جیہڑے آپ قاتل
کس نے گنیاں، کنی چڑیاں
جنیاں سدراں، انیاں چڑیاں
چھڈ دے بھائی، ساریاں چڑیاں
ویسے تے ویہہ سال دی عمرے میری پہلی نظم پریت لڑی وچ چھپی سی، فیر چل سو چل
اک نظم میری اجہی وی سی جس نوں ایتھوں دے لال طوطے چھاپن توں انکار کر چھڈیا سی
مشرقی پنجاب وچ اخباراں والے خبرچیاں تے تے یونیورسٹیاں دے پروفیسراں نے پنجابی دا حلیہ ٹیٹ کر دتا ہے
ہندی نما پنجابی پاروں عام پنجابیاں دی زبان نال توڑ وچھوڑا ہو چکیا ہے، پکا
شاعری نال ترقی پسندی، بنیاد پرستی دی پکھاں لاون دی کوئی لوڑ نہیں
اک بنیاد پرست بندہ وی چنگی شاعری کر سکدا ہے، بورخیس دی مثال ساڈے سامنے ہے۔ اوہ ارجنٹائن دا سی پر قدامت پرست سی، پر شاعر بڑا وڈا ہے، بابا ہے۔
چین تے روس وچ انقلاباں توں بعدوں کیہڑا وڈا ادب پیدا ہویا؟ اوس مگر ایہو سوچ سی۔ادب برائے ادب تے ادب برائے زندگی ورگیاں ونڈاں جھوٹیاں ونڈیاں سن جس بہوں نقصان دتا سانوں۔
پنجابی لکھن دے سکرپٹ دا مسلہ وی ہے۔ میں شاہ مکھی وچ پنجابی نہیں پڑھ سکدا تے ایہہ بڑی ماڑی گل ہے
گھٹ و گھٹ ایہہ کم تے ہو سکدا ہے بندہ کمپیوٹر تے شاہ مکھی نوں کلک کرے تے گرمکھی ہو جائے یا الٹ۔ایس تے کم دی لوڑ ہے
فیر ترکی والیاں وانگ اساں رومن سکرپٹ ول وی جاسکدے ہاں
نوٹ:ایہہ امر جیت چندن ہوراں دی گل بات دے ٹوٹے نیں ، پر پوری گل سمجھن لئی تہانوں ریکارڈنگ سننی ہو سی تے اوس دا لنک تھلے دے رہے ہاں۔
پورے ریڈیو شو دی ریکارڈنگ
https://vocaroo.com/i/s12PasvlnGpF


Share |


 

Depacco.com


 

 

Support Wichaar

Subscribe to our mailing list
نجم حسین سیّد
پروفیسر سعید بُھٹا
ناول
کہانیاں
زبان

 

Site Best Viewd at 1024x768 Pixels