سارے سال دی لمی محنت توں مگروں گرمیاں وچ کجھ دناں دیاں چھٹیاں نہ کیتیاں جاون تے تھکیواں تے اکتاہٹ ہوون لگدی ہے۔ جون دا مہینہ شروع ہویا تے امریکہ آون دے پروگرام بناونے شروع کیتے اخیر طے ایہہ ہویا جو اٹھائی جولائی نوں فیملی نال کینیڈا اتراں گے پر جناب آفاق خیالی ہوراں نے اک ہی دن وچ پروگرام نوں بدلوا دتا تے پنجھی جولائی نوں اچن چیتی ایہہ پروگرام بن گیا جو اگلے ہی دیہاڑ اسیں نیویارک اترئیے تاں جو اٹھائی جولائی دوہزار اٹھ نوں اسیں وزیر اعظم یوسف رضا گیلانی دے آون دے موقعے تے واشنگٹن وچ ہویے تاں جو اپنے صحافی سنگیاں، وزیراں تے وزیر اعظم دے حالات ویکھیے۔
حالیں پاکستان دے لمے سفر دا تھکیواں وی نہیں لتھیا سی کہ اسیں وزیر اعظم گیلانی دے واشنگٹن وچ اترن توں پہلوں ہی اوتھے اپڑ گئے۔ جمہوری وزیر اعظم دے پہلے امریکی دورے وچ کئی چنگے پہلو نظر آئے کئی سالاں توں مگروں پہلی وار کمیونٹی ولوں کوئی وکھالا نہیں ہویا نہیں تاں بینظیر بھٹو نواز شریف تے جنرل پرویز مشرف ساریاں دے امریکہ دے دورے دے وچکار کمیونٹی اوہناں دے خلاف وکھالے کردی رہی سی۔ امریکہ ولوں بڑے جوش دا وکھالا ہویا۔ 7.5 ارب ڈالر امداد دی گل ہوئی، انرجی دے معاہدے کرن دی گل ہوئی، اناج وچ امداد دی گل ہوئی تے سب توں ودھ کے ایہہ کہ پاکستان دی خودمختاری، سلامتی تے ایکا ہویا تے فوج دی بجائے جمہوریت نوں مضبوط کرن دا بیان آیا۔ اہناں ساریاں گلاں دا مطلب صاف ظاہر ہے جو حالیں نہ تے صدر مشرف اٹھونجاہ ٹو بی لا سکدے ہین تے نہ ہی حکومت نوں فوج راہیں ہٹایا جاسکدا ہے۔
وزیر اعظم یوسف رضا گیلانی نے دورہ امریکہ دے وچکار بینظیر بھٹو نوں بوہت یاد کیتا، لوکاں نوں وی بی بی بوہت یاد آئیاں۔ وزیر اعظم یوسف رضا گیلانی بوہت ہی سیانے تے دانا سیاستدان ہین پراوہناں نوں ملک دے دھندے چلاون تے اُچیچا سفارتی بولی بولن تے انگریزی وچ گل کرن دا بوہت گھٹ تجربہ ہے اوہ بڑے پراعتماد ہین پر کونسل آف فارن ریلیشنز ورگے ادارے وچ خارجہ پالیسی دے چتراں دے ساہمنے سوالاں دا جواب دیون دی آس کرنا اوہناں دے نال زیادتی سی۔ میرے خیال وچ اوہناں نے بڑی بہادری تے سادگی نال سوالاں دے جواب دتے، پر انگریزی تے مکمل کمانڈ نہ ہوون کارن اوہ کئی تھاں مار کھا گئے۔ کئی سوالاں نوں ہی نہ سمجھ سکے۔ انگریزی بولنا کوئی اینی وڈی گل نہیں پر جے تسیں ایس امتحان وچ پے جاؤ تے پھیر ایس توں نکلنا اوکھا ہوندا ہے، ہوسکدا ہے جو اوہناں دی انگریزی دی مہارت تے کسے امریکی نوں اعتراض نہ ہووے پر اوہناں دے وزیراں تے پاکستانی پریس دی حالت ویکھن دے قابل سی اوہ سارے شرمندہ نظر آرہے سن۔ چنگا ہوندا ہے جو وزیر اعظم صرف ضروری میٹنگز کردے تے دن وچ دو تن وار پاکستانی پریس نوں بریف کردے۔ کونسل آف فارن ریلیشنز وچ انگریزی تقریر کرن نال اوہناں قد نہیں ودھیا سگوں نکا ہویا ہے۔
دوجے پاسے اپنے وطن پاکستان دے حالات اُنج دے اُنج ہین۔ طیارے وچ آوندیاں ہوئیاں مولانا فضل الرحمن لندن تیکر اوہناں دے نال سفر کردے رہے اوہناں دی رائے ایہہ سی جو صوبہ سرحد وچ حکومت دی رٹ مک چکی ہے۔ صوبہ سرحد وچ صاف صرف تے صرف بیت اللہ محسود داحکم چلدا ہے،اوہدیاں ہی بنیاں عدالتاں وچ فیصلے ہوندے ہین تے اوہدے کہن تے اغواء کیتے گئے لوک تاوان دے کے چھٹ دے ہین۔ مولانا فضل الرحمن نے دسیا جو پچھلے دناں وچ اتحادیاں دی جیہڑی سانجھی کانفرنس ہوئی سی ایس وچ ایہہ طے ہویا سی جو قبائلیاں نال مذاکرات کیتے جاون۔ مولانا فضل الرحمن دا کہنا سی جو ایہہ پریس کانفرنس اوہناں دے کہن تے ہوئی، اوہناں دی تقریر سب توں لمی سی ایسے تے سب نے ایکا کیتا تے ہن ایسے پالیسی تے عمل ہووے گا۔ مولانا فضل الرحمن دا خیال سی کہ جے ہن حکومت نے عقلمندی نال اپنے کارڈز نہ کھیڈے تے صوبہ سرحد پورا طالبان دے قبضے وچ جاسکدا ہے، کیوں جو طالبان نے ہر ضلعی ہیڈ کوارٹر دے کول اپنے اڈے بنائے ہوئے ہین تے اوہ جدوں چاہن ضلعی ہیڈکوارٹرز تے قبضہ کرسکدے ہین۔
وزیر اعظم دے دورہ امریکہ تے مولانا فضل الرحمن دیاں گلاں نوں رلا کے ویکھا جاوے تے انج لگدا ہے جو حالیں حکومت نوں کوئی خطرہ نہیں۔ اتحادی کٹھے ہو کے صدر مشرف دے خلاف مواخذہ لے آون تے خورے امریکہ اعتراض نہ کرے۔ طالبان امریکہ تے پاکستان دوہواں لئی سب توں وڈا خطرہ ہین۔ طالبان نال لڑن یاں مذاکرات کرن دے حوالے نال پاکستان نوں کجھ آزادی ملی ہے پر خورے ایہہ وی طے ہو گیا ہے جو ہن دے نتیجیاں دی ذمے واری پاکستان تے ہووے گی۔پر پاکستانی دی چاہ ایہو ہے جو حالات چنگے ہوون تاں جو معاشی بھلیائی ہووے۔ دورہ امریکہ توں وی ایہو آس کیتی جانی چاہی دی ہے جو ایہدے چنگے اثر ہی ساہمنے آون۔
